Ayan 1 bob
1 Bul – tez arada ju'z beriwi kerek bolg'an waqıyalardı O'z xızmetshilerine bildiriw ushın Qudaydın' İysa Masixqa bergen ayanı. Al Ol O'z perishtesin jiberip, bul ayandı xızmetshisi Yuxang'a bildirdi.
2 Yuxan Qudaydın' so'zin ha'm İysa Masixtın' gu'walıg'ın, yag'nıy o'zi ko'rgen na'rselerinin' ha'mmesin bayan etti.
3 Bul payg'ambarshılıq so'zlerdi oqıytug'ın ha'm bul jerde jazılg'anlardı tın'lap, orınlaytug'ınlar qanday baxıtlı! Sebebi bul waqıyalardın' bolatug'ın waqtı jaqın.
4 Men, Yuxannan, Aziya u'lkesindegi jeti ja'ma'a'tke sa'lem! Ha'zir bar, burınnan bar bolg'an, keleshekte de bar bolatug'ın ha'm keletug'ın Qudaydan, Onın' taxtı aldında turg'an jeti ruwxtan, isenimli gu'wa bolg'an, o'liler arasınan birinshi bolıp tirilgen ha'm jer ju'zi patshalarının' Hu'kimdarı bolg'an İysa Masixtan miyrim ha'm tınıshlıq sizlerge berilsin!
5 İysa Masix bizlerdi su'yip, O'z qanı menen bizlerdi gu'nalarımızdan azat qıldı.
6 ha'm bizlerdi O'z Patshalıg'ına eristirip, A'kesi Qudaydın' xızmetindegi ruwxaniyleri etti. Ullılıq ha'm qu'diret ma'n'gige Onıki bolsın! Awmiyin.
7 «Mine, Ol bultlar menen kelmekte! Ha'r bir ko'z Onı ko'redi, Onın' denesin teskenler de ko'redi. Jer ju'zinin' barlıq xalıqları, Ol sebepli o'kirip jılaydı» . Awa, usılay boladı, awmiyin.
8 Ha'zir bar, burınnan bolg'an, keleshekte de bar bolatug'ın ha'm keletug'ın, ha'mme na'rsege qu'diretli Quday İyemiz bılay deydi: «Men – Alfa ha'm Omegaman».
9 Men, İysanın' qayg'ı-ha'siretine, patshalıg'ına ha'm sabırlıg'ına sizler menen birge sherik bolg'an tuwısqanın'ız Yuxan, Qudaydın' so'zin ha'm İysa haqqında ja'riyalag'anım ushın Patmos atlı atawg'a su'rgin etilgen edim.
10 İyemizdin' ku'ninde, meni Muxaddes Ruwx basqarıp turg'anda, arqamnan ka'rnaydın' dawısına uqsag'an ba'lent bir dawıstı esittim.
11 «Ko'rip turg'anların'dı kitapqa jaz ha'm jeti ja'ma'a'tke, yag'nıy Efes, Smirna, Pergam, Tiatira, Sardis, Filadelfiya ha'm Laodikiyag'a jiber», – dedi dawıs.
12 So'ylep turg'andı ko'riw ushın, men arqama burıldım. Burılıp, jeti altın shıra qoyg'ıshtı ko'rdim.
13 Olardın' ortasında u'stine uzınlıg'ı ayag'ına tu'setug'ın kiyim kiygen, ko'kiregine altın o'n'irshe baylag'an Adam Ulına uqsag'an birew tur edi.
14 Onın' bası ha'm shashları aq ju'n sıyaqlı, qarday appaq edi. Ko'zleri bolsa, ottın' jalınınday jarqırap turg'an edi.
15 Onın' ayaqları peshte qızdırılg'an jıltıraq qolag'a uqsag'an bolıp, dawısı sarqırap aqqan suwdın' sestindey edi.
16 Al on' qolında jeti juldız bar bolıp, awzınan eki ju'zli o'tkir qılısh shıg'ıp turg'an edi. Ju'zi ku'shli jarqırap turg'an quyashtay edi.
17 Men Onı ko'riwden-aq, o'li sıyaqlı ayaqlarına jıg'ıldım. Al Ol on' qolın u'stime qoyıp, bılay dedi: – Qorqpa! Men – birinshi ha'm son'g'ıman.
18 Men tirimen. O'lgen edim, biraq, mine, ma'n'gige tirimen. O'limnin' ha'm o'liler ma'kanının' giltleri Menin' qolımda.
19 Sonlıqtan ko'rgenlerin'di, ha'zir ju'z berip atırg'an na'rselerdi ha'm bunnan son' bolatug'ınlardı jaz.
20 On' qolımda sen ko'rgen jeti juldızdın' ha'm jeti altın shıra qoyg'ıshtın' sırı mınaw: jeti juldız – jeti ja'ma'a'ttin' jetekshileri, jeti shıra qoyg'ısh – jeti ja'ma'a't.
