Evreyler 7 bob
1 Bul Melxisedek Sa'lem patshası ha'm Qu'diretli Qudaydın' ruwxaniyi edi. Ol patshalardı jen'iliske ushıratıp qaytıp kiyatırg'an İbrayımdı qarsı alıp, og'an pa'tiyasın bergen edi.
2 Al İbrayım og'an ha'mme na'rsenin' onnan birin bergen edi. Onın' eki atı bar, birinshisi Melxisedek bolıp, bul attın' ma'nisi «a'dillik patshası», al ekinshisi Sa'lem patshası bolıp, bul attın' ma'nisi «tınıshlıq patshası» degendi an'latadı.
3 Onın' a'kesi, anası ha'm shejiresi belgisiz. O'mirinin' bası, ya son'ı joq. Ol sol jag'ınan Qudaydın' Ulına uqsaydı ha'm ma'n'gige ruwxaniy bolıp qaladı.
4 Qaran'lar, ol qanshelli ullı! Ha'tte, tu'p babamız İbrayım da tu'sken oljalarının' onnan birin og'an bergen edi.
5 Lebiy urıwınan shıqqan ruwxaniyler Muxaddes Nızamdag'ı buyrıq boyınsha o'z tuwısqanlarınan, yag'nıy xalıqtan, ha'mmesi de İbrayımnın' urpaqları bolsa da, onnan birin alıwı tiyis edi.
6 Melxisedek Lebiy urıwınan bolmasa da, İbrayımnan onnan birin alıp, Qudaydın' wa'desine iye bolg'an og'an pa'tiyasın bergen edi.
7 Pa'tiya bergen adam pa'tiya alg'an adamnan ullı ekeni so'zsiz.
8 Onnan birin alatug'ın ruwxaniylerdin' basında o'lim bar. Biraq, İbrayımnan onnan birin alg'an Melxisedektin' tiri ekeni haqqında gu'walıq bar.
9 Demek, onnan birin alatug'ın Lebiydin' o'zi de İbrayım arqalı onnan birin berdi, dep aytıwg'a boladı.
10 O'ytkeni Melxisedek İbrayımdı qarsı alg'anda, Lebiy ele babası İbrayımnın' belinde edi.
11 İzrail xalqı Muxaddes Nızamdı lebiylilerdin' ruwxaniylik xızmeti tiykarında alg'an edi. Biraq eger Xaron a'wladınan bolg'an lebiylilerdin' ruwxaniylik xızmeti arqalı minsizlikke erisiw mu'mkin bolg'anda, onda Melxisedek sıyaqlı basqa bir ruwxaniydin' keliwine ha'jet bar ma edi?
12 Sebebi ruwxaniylik xızmeti o'zgertilse, Muxaddes Nızam da o'zgertiliwi tiyis.
13 Aldın so'z etilgen adam, yag'nıy İysa basqa urıwdan shıqqan edi. Sol urıwdan hesh kim qurbanlıq shalınatug'ın orında xızmet etpegen.
14 Al İyemiz İysanın' Yahuda urıwınan kelip shıqqanı anıq. Muwsa bul urıwg'a baylanıslı ruwxaniylik haqqında hesh na'rse aytpag'an edi.
15 Melxisedekke uqsag'an basqa bir ruwxaniy payda bolg'anınan bul so'zlerimiz ele de anıg'ıraq boladı.
16 İysa Lebiy urıwına baylanıslı bolg'an Muxaddes Nızamdag'ı qag'ıydalar boyınsha emes, al tawsılmaytug'ın o'mir qu'direti menen ruwxaniy boldı.
17 O'ytkeni Muxaddes Jazıwda Ol haqqında: «Sen Melxisedek sıyaqlı, Ma'n'gige ruwxaniysen'», – degen gu'walıq bar.
18 Ruwxaniylik haqqında a'welgi qag'ıydalar ha'lsiz ha'm paydasız bolg'anlıqtan biykar etildi.
19 Sebebi Muxaddes Nızam hesh bir na'rseni minsizlikke eristirmedi. Bunın' ornına, bizlerdi Qudayg'a jaqınlastıratug'ın jaqsı u'mit berildi.
20 İysa Qudaydın' bergen antı boyınsha ruwxaniy boldı. Al lebiyli ruwxaniyler Qudaydın' antı boyınsha ruwxaniy bolg'an joq.
21 İysa O'zine: «Quday İyemiz ant ishti, Ol antınan taymaydı: „Sen ma'n'gige ruwxaniysen'“» , – degen Qudaydın' antı boyınsha ruwxaniy boldı.
22 Solay etip, İysa ele de jaqsıraq kelisimnin' girewi boldı.
23 Ja'ne bir ayırmashılıg'ı mınaday: a'piwayı ruwxaniylerdin' sanı ko'p edi. O'ytkeni o'lim olarg'a xızmetlerin dawam etiwge tosqınlıq qılatug'ın edi.
24 Biraq İysa ma'n'gi jasaytug'ın bolg'anlıqtan, Onın' ruwxaniyligi de ma'n'gi.
25 Sonlıqtan Ol O'zi arqalı Qudayg'a kelgenlerdi pu'tkilley qutqaratug'ın ku'shke iye. Sebebi Ol ma'n'gige tiri bolıp, Qudaydan olar ushın o'tinip soraydı.
26 İysa bizlerge kerek bolg'an bas ruwxaniydin' anıq O'zi boladı. O'ytkeni Ol muxaddes, ayıpsız, pa'k, gu'nakarlardan ajıratılg'an ha'm aspannan da joqarı ko'terilip, ullı abırayg'a iye bolg'an.
27 Basqa bas ruwxaniyler sıyaqlı, ha'r ku'ni a'weli O'z gu'naları ushın, al son'ınan xalıqtın' gu'naları ushın qurbanlıq beriwdin' Og'an ha'jeti joq. Sebebi Ol O'zin qurban etip, bul isti bir ma'rtebe ha'm birotala orınladı.
28 Muwsanın' Nızamı adam bolg'anlıqtan minsiz emes bolg'anlardı bas ruwxaniy qılıp qoyadı. Biraq Muwsanın' Nızamınan son', Qudaydın' ant etip bergen wa'desi Onın' ma'n'gige minsiz Ulın bas ruwxaniy etip qoydı.
