Evreyler 4 bob
1 Sonlıqtan Quday beretug'ın dem alıstı, yag'nıy Ol beretug'ın tınıshlıqtı alıw haqqında wa'de ele de ku'shke iye eken, aran'ızdag'ı ha'r birin'iz usı wa'deden bos qalıp qoyıwdan qorqıp, saq bolın'lar.
2 Sebebi bizlerge ja'riyalang'an Xosh Xabardı ata-babalarımız da esitken edi. Biraq olar esitken so'zlerin isenim menen qabıl etpegenlikten, bul so'zlerdin' olarg'a paydası tiymedi.
3 Quday du'nyanı jaratıp bolg'annan keyin-aq, dem alıw ushın beretug'ın ma'kandı tayarlap qoyg'an bolsa da, olar haqqında bılay degen: «Men qa'ha'rlengenimde: „Olar Menin' dem alıw ushın beretug'ın ma'kanıma hesh qashan kirmeydi“, – dep ant ishtim» . Biraq, isenetug'ın bizler sol ma'kang'a kiremiz.
4 Muxaddes Jazıwdın' bir jerinde jetinshi ku'n haqqında bılay delingen: «Quday jetinshi ku'ni barlıq islerinen dem aldı» .
5 Ja'ne de, Muxaddes Jazıwdın' basqa jerinde Quday bılay degen: «Olar Menin' dem alıw ushın beretug'ın ma'kanıma hesh qashan kirmeydi» .
6 Solay etip, aldın Xosh Xabardı esitkenler so'zge qulaq aspag'anlıqtan, dem alatug'ın ma'kang'a kirmedi. Biraq, basqalar ushın ol jerge kiriwge mu'mkinshilik bar.
7 Sol sebepten Quday «bu'gin» dep atalatug'ın ja'ne bir ku'ndi belgilep, aldın aytılg'anday, ko'p waqıtlardan son', Dawıt arqalı bılay degen edi: «Eger bu'gin Qudaydın' dawısın esitsen'ler, Qaysarlıq etpen'ler» .
8 Eger Eshua izraillılardı Qudaydın' dem alıw ushın beretug'ın ma'kanına eristirgende, Quday son'ınan basqa bir ku'n haqqında aytpag'an bolar edi.
9 Demek, Qudaydın' xalqı ushın haqıyqıy dem alatug'ın waqıt keledi.
10 Quday du'nyanı jaratqannan son' qalay dem alg'an bolsa, Ol beretug'ın dem alıstı, yag'nıy Ol beretug'ın tınıshlıqtı alg'an ha'r bir adam da o'z islerinen solay dem aladı.
11 Solay eken, hesh birimiz boysınbag'an sol adamlarg'a erip adaspay, Quday beretug'ın dem alıstı, yag'nıy Ol beretug'ın tınıshlıqtı alıwg'a tırısayıq.
12 Qudaydın' so'zi tiri ha'm ta'sirli. Ol eki ju'zli qılıshtan da o'tkir bolıp, jan menen ruwxtı, buwın menen su'yeklerdi bo'letug'ın da'rejede sug'ılıp kiredi: ol ju'rektegi oy ha'm niyetlerdi a'shkara qıladı.
13 Jaratılg'an hesh bir na'rse Quday aldında jasırın emes. Onın' ko'z aldında ha'r bir na'rse ashıq ha'm ayan. Bizler usı Qudayg'a esap beremiz.
14 Biraq, bizlerde aspang'a ko'terilgen ullı bas ruwxaniyimiz – Qudaydın' Ulı İysa bar. Sonlıqtan o'zlerimiz ashıq ta'n alg'an isenimimizdi bekkem saqlayıq.
15 Ol – bizlerdin' ha'lsizliklerimizdi bo'lise alatug'ın bas ruwxaniy. Onın' O'zi ha'r ta'repleme bizler sıyaqlı sınaldı, biraq gu'na islemedi.
16 Sonlıqtan rehimlilik alıw ushın ha'm kerek waqtında o'zlerimizge ja'rdem etetug'ın miyrimge erisiw ushın, Qudaydın' miyrimge iye taxtına batıllıq penen jaqınlayıq.
