Evreyler 10 bob
1 Muxaddes Nızam keleshektegi jaqsı na'rselerdin' haqıyqıy kelbeti emes, al ko'len'kesi g'ana. Sonlıqtan usı Muxaddes Nızam boyınsha ha'r jılı u'zliksiz beriletug'ın birdey qurbanlıqlar Qudayg'a sıyınatug'ınlardı hesh qashan tolıq pa'kley almaydı.
2 Eger tolıq pa'kley alsa, qurbanlıq beriliw toqtatılmas pa edi? O'ytkeni sıyınıwshılar bir ma'rtebe gu'nalarınan tazalang'anınan son', olarda qaytıp gu'nakarlıq sezimi qalmag'an bolar edi.
3 Biraq usı qurbanlıqlar adamlarg'a jıl sayın gu'naların esine tu'siredi.
4 Sebebi o'gizler menen tekelerdin' qanı gu'nalardı joq qıla almaydı.
5 Sol sebepten Masix du'nyag'a kelip, Qudayg'a bılay degen edi: «Qurbanlıq penen sadaqanı Sen qa'lemedin', Biraq, Men ushın bir dene tayarladın'.
6 Jag'ılg'an sadaqalardı Ha'm gu'na ushın berilgen qurbanlıqlardı Sen xosh ko'rmedin'.
7 To'mendegilerdin' Muxaddes Nızam boyınsha beriletug'ınına qaramastan, Masix aldın: «Qurbanlıqlardı, sadaqalardı, jag'ılg'an sadaqalardı ha'm gu'na ushın berilgen qurbanlıqlardı Sen qa'lemedin' ha'm olardı xosh ko'rmedin'», – degen edi.
8 Son'ınan Masix: «Senin' qa'lewin'di orınlaw ushın, Men keldim», – dedi. Yag'nıy, Ol ekinshi kelisimdi ornatıw ushın, birinshi kelisimdi biykar etti.
9 Qudaydın' usı qa'lewi boyınsha, İysa Masix O'z denesin birinshi ha'm son'g'ı ma'rtebe qurban etiwi arqalı bizler muxaddes qılındıq.
10 Ha'r bir ruwxaniy ha'r ku'ni xızmette turıp, birdey qurbanlıqlardı qayta-qayta beredi. Biraq bul qurbanlıqlar gu'nalardı hesh qashan joq qıla almaydı.
11 Al bizlerdin' bas ruwxaniyimiz Masix gu'nalar ushın ma'n'gilikke tatırlı tek bir qurbanlıq berip, Qudaydın' on' ta'repine otırdı.
12 Ol sol waqıtlardan beri, O'z dushpanlarının' ayaqlarının' astına basılıwın ku'tpekte.
13 O'ytkeni Ol muxaddes qılıng'anlardı tek bir qurbanlıq penen ma'n'gilikke minsiz qıldı.
14 Muxaddes Ruwx ta bul haqqında bizlerge gu'walıq beredi. A'weli Ol bılay degen:
15 «Jaratqan İyemiz bılay deydi: „Sol ku'nlerden son', Olar menen du'zetug'ın kelisimim mınaw: Nızamlarımdı olardın' ju'reklerine salıp, Sana- sezimlerine oyıp jazıp qoyaman“».
16 Son'ınan Ol qosımsha qılıp, bılay deydi: «Olardın' gu'naların ha'm nızamsız islerin qaytıp esime almayman».
17 Demek, gu'nalar keshirilgen bolsa, endi olar ushın qurbanlıq beriwdin' de keregi joq.
18 Sonlıqtan ha'y tuwısqanlarım, İysanın' qanı sebepli aspandag'ı En' muxaddes bo'lmege kiriwge bizlerde batıllıq bar.
19 Ol bizlerge Muxaddes shatırdag'ı perde arqalı, yag'nıy O'z denesi arqalı sol En' muxaddes bo'lmege kiriwge jan'a ha'm tiri jol ashıp berdi.
20 Usı İysa – Qudaydın' shan'arag'ın basqaratug'ın bizlerdin' ullı ruwxaniyimiz.
21 Sol sebepten Onın' qanı menen hu'jdanımız ayıplag'an islerden janımızdı tazalap ha'm denemizdi taza suw menen juwıp, tolıq isenim menen shın ju'rekten Qudayg'a jaqınlayıq.
22 O'zlerimiz ashıq moyınlag'an u'mitimizdi ekilenbey bekkem saqlayıq. Sebebi wa'de bergen Quday sadıq.
23 Birbirimizge g'amxor bolıp, bir-birimizdi su'yispenshilikke ha'm jaqsı isler islewge ruwxlandırayıq.
24 Birbirimizge g'amxor bolıp, bir-birimizdi su'yispenshilikke ha'm jaqsı isler islewge ruwxlandırayıq.
25 Ayırım adamlardın' a'detke aylandırg'anınday, jıynalıslarımızdı qaldırmayıq. Kerisinshe, İyemiz keletug'ın sol ku'nnin' jaqınlag'anın bilip, bir-birimizdi ele de ko'birek jigerlendirip barayıq.
26 O'ytkeni eger bizler haqıyqattı bilgenimizden son' da, bile tura gu'na islewdi dawam etsek, onda endi gu'nalar ushın beriletug'ın basqa qurbanlıq joq.
27 Tek hu'kimdi ha'm Qudayg'a qarsı bolg'anlardı jandırıp joq qılatug'ın lawlag'an ottı qorqınısh penen ku'tiw g'ana qaladı.
28 Muwsanın' Nızamın ta'n almay buzg'an adam eki yamasa u'sh gu'wanın' gu'walıg'ı menen ayawsız tu'rde o'ltiriletug'ın edi.
29 Endi bir oylanıp ko'rin'ler, Qudaydın' Ulın ayaq astı etip, o'zin muxaddes qılg'an qandı, yag'nıy kelisimdi bekitken qandı qa'dirsiz ko'rgen ha'm Qudaydın' miyirimli Ruwxın masqaralag'an adam bunnan da awırıraq jazag'a ılayıqlı bolmay ma?
30 Sebebi bizler «O'sh alıw Menin' qolımda, sazayın O'zim beremen» ha'm ja'ne de «Jaratqan İyemiz O'z xalqın hu'kim etedi» , – degen Qudaydı bilemiz.
31 Tiri Qudaydın' qolına tu'siw qanshelli qorqınıshlı!
32 Al sizler o'zlerin'izge haqıyqatlıq nurı tu'skennen son', azapaqıretlerge tolı gu'reske shıdag'an da'slepki ku'nlerin'izdi eske tu'sirin'ler.
33 Geybir waqıtları o'zlerin'iz el-jurt aldında masqara etilip, ja'bir shegetug'ın edin'ler. Al ayırım waqıtları usınday awhalg'a tu'skenlerdin' ha'siretin bo'lisetug'ın edin'ler.
34 Sizler isenim sebepli qamaqta bolg'anlardın' da da'rtlerine sherik boldın'lar. O'zlerin'izdi ele de jaqsıraq ha'm ma'n'gige bar bolatug'ın mal-mu'lik ku'tip turg'anın bilip, malmu'lkin'izdin' talan-taraj qılınıwın quwanısh penen qabıl ettin'ler.
35 Solay etip, usı bekkem isenimin'izdi joytpan'lar. O'ytkeni ol ushın alatug'ın sıyın'ız u'lken.
36 Qudaydın' qa'lewin orınlap, wa'de etilgendi alıwın'ız ushın, sizlerge sabırlılıq kerek boladı.
37 Sebebi Quday bir payg'ambarı arqalı bılay degen: «Endi az-maz waqıttan keyin, Keletug'ın tez arada keledi, Ol keshikpeydi.
38 Mag'an tiyisli aqlang'an adam isenimi menen jasaydı, Eger ol arqag'a sheginse, og'an kewlim tolmaydı».
39 Bizler arqag'a sheginip nabıt bolatug'ınlardan emespiz. Al, isenip qutqarılatug'ınlardanbız.
