Evreyler 1 bob

Quday O'z Ulı İysa arqalı so'yledi (1-3),Qudaydın' Ulı İysa perishtelerden ullı (4-14),

¹ Quday a'yyemgi zamanlarda payg'ambarlar arqalı ko'p ma'rtebe ha'm ha'r tu'rli jollar menen ata-babalarımızg'a so'ylegen edi.

² Al bul son'g'ı waqıtlarda bolsa, Quday bizlerge O'z Ulı İysa arqalı so'yledi. Quday O'z Ulın pu'tkil barlıqtın' miyrasxorı etip belgilep, Ol arqalı pu'tkil du'nyanı jaratqan edi.

³ Qudaydın' Ulı – Qudaydın' saltanatının' jarqırag'an nurı bolıp, Ol Qudaydın' ta'biyatının' haqıyqattan qanday ekenin ko'rsetedi. Ul O'zinin' qu'diretli so'zi menen pu'tkil barlıqtı saqlap tur. Ol O'zin qurban etip, bizlerdi gu'nalarımızdan tazalag'annan son', joqarıdag'ı qu'diretli Qudaydın' on' ta'repine otırdı.

⁴ Qudaydın' Ulı perishtelerden qanshelli joqarı attı alg'an bolsa, Ol olardan sonshelli u'stin turadı.

⁵ O'ytkeni Quday perishtelerdin' qaysı birine: «Sen Menin' Ulımsan', Bu'gin Men Sag'an A'ke boldım» . Ja'ne de: «Men Og'an A'ke bolaman, Ol Mag'an Ul boladı» , – degen edi?

⁶ Ja'ne de, Quday tun'g'ısh Ulın du'nyag'a jiberip atırıp bılay degen: «Menin' barlıq perishtelerim Og'an tabınsın».

⁷ Al perishteler haqqında bolsa, Muxaddes Jazıw bılay deydi: «Quday O'z perishtelerin samalday, Xızmetshilerin ottın' jalınınday qıladı».

⁸ Biraq, Qudaydın' Ulı haqqında Muxaddes Jazıw bılay deydi: «O Quday, Senin' taxtın' ma'n'gi turadı, Patshalıq biyligin' – a'dil biylik .

⁹ Sen haqlıqtı su'yip, nızamsızlıqtı jek ko'rdin'. Sonlıqtan Quday, Senin' Qudayın', Seni xızmetke tayınlap, Sag'an joldasların'a qarag'anda, Dan'q ha'm quwanıshtı ko'birek berdi».

¹⁰ Ja'ne de, bılay deydi: «O İyemiz, A'wel basta jerdin' tiykarın Sen salg'ansan'. Aspandı da Senin' qolların' jaratqan.

¹¹ Jer ha'm aspan joq bolıp ketedi, biraq Sen ma'n'gige barsan'. Olardın' ha'mmesi de kiyimdey tozıp qaladı.

¹² Olardı shapan sıyaqlı orap qoyasan', Olar kiyim sıyaqlı o'zgertiledi. Biraq, Sen hesh qashan o'zgermeysen', O'mir jılların' da tamam bolmaydı» .

¹³ Quday perishtelerdin' hesh birine de: «Dushpanların'dı ayaqların'nın' astına bastırmag'anımsha, Menin' on' jag'ımda otır» , – demegen.

¹⁴ Aqırı perishtelerdin' ha'mmesi qutqarılıwg'a iye bolatug'ınlarg'a xızmet qılıw ushın jiberilgen xızmetshi ruwxlar-g'o.