Filimon 1 bob

Sa'lemnama(1-3),Filimonnın' isenimi ha'm su'yispenshiligi (4-7),Paveldin' Onisim ushın o'tinish etiwi (8-22),Son'g'ı sa'lemnama(23-25).

¹ İysa Masix ushın tutqın bolg'an men, Pavelden ha'm tuwısqanımız Timofeyden, bizler menen birge xızmet etetug'ın su'yikli Filimong'a sa'lem!

² Ja'ne de, apamız Afiyag'a, bizler menen birge Qudaydın' a'skeri bolg'an Arxipke ha'm senin' u'yin'degi iseniwshiler ja'ma'a'tine de sa'lem jollaymız.

³ A'kemiz Quday ha'm İyemiz İysa Masix sizlerge miyrim ha'm tınıshlıq bersin!

⁴ Men duwa etkenimde seni tilge alıp, Qudayıma ba'rqulla shu'kirlik bildiremen.

⁵ Sebebi senin' İyemiz İysag'a degen isenimin' ha'm pu'tkil iseniwshilerge degen su'yispenshiligin' haqqında esitip atırman.

⁶ İsenimin'di basqalar menen bo'lisiwde ta'sirli bolıwın' ushın, qullası, Masix arqalı bizler iye bolatug'ın ha'r qanday iygilikti biliwde jetilisip barıwın' ushın duwa etip atırman.

⁷ O'ytkeni tuwısqanım, sen sebepli iseniwshilerdin' kewilleri ko'terilip qaldı. Solay etip, senin' su'yispenshiligin' mag'an u'lken quwanısh ha'm ta'selle berdi.

⁸ Sonlıqtan Masixtın' elshisi sıpatında wazıypan'dı atqarıwdı sag'an buyırıwg'a biyligim bolsa da,

⁹ ha'zir İysa Masix ushın tutqın bolg'an men, g'arrı Pavel,

¹⁰ qamaqta menin' ulım bolg'an Onisim ushın sennen su'yispenshilik penen o'tinip sorayman.

¹¹ Ol bir waqıtları sag'an paydasız bolg'an edi, biraq endi bolsa sag'an da, mag'an da ju'da' paydalı bolıp qaldı.

¹² Onı, yag'nıy o'z ju'rek-bawırımdı sag'an qaytarıp jiberip atırman.

¹³ Xosh Xabar ushın qamaqta bolg'anımda, senin' ornın'da mag'an xızmet etiwi ushın onı janımda alıp qalıwdı qa'ler edim.

¹⁴ Biraq, senin' isleytug'ın jaqsılıg'ın' ma'jbu'riy tu'rde emes, al o'z ıqtıyarın' menen bolıwı ushın, senin' qayılshılıg'ın'sız hesh na'rse islegim kelmedi.

¹⁵ Mu'mkin, onın' sennen waqıtsha ayra tu'skeninin' sebebi onı ma'n'gige qaytarıp alıwın' ushın bolg'an shıg'ar.

¹⁶ Onı endi qul dep emes, al quldan zıyat su'yikli tuwısqanın' sıpatında qabıl et. A'sirese men ushın ol ju'da' qa'dirli. Al sen ushın bolsa, ol ha'm qul sıpatında, ha'm İyemizdegi bir tuwısqan sıpatında ja'ne de qa'dirlirek boladı.

¹⁷ Sonlıqtan eger meni joldasım dep sanaytug'ın bolsan', onı meni qabıl etkendey, qabıl et

¹⁸ Ol sag'an qanday da bir jamanlıq islegen bolsa yamasa qarızdar bolsa, menin' esabıma jazıp qoy.

¹⁹ Men, Pavel, bunı o'z qolım menen jazıp atırman: men to'leymen. Al senin' mag'an o'z o'mirin' menen qarızdar ekenin'di aytpay-aq qoyayın.

²⁰ Awa, tuwısqanım, men sennen İyemiz aldında bir ja'rdem alayın. Masix aldında kewlimdi ko'ter.

²¹ Qulaq asatug'ının'a isenip, sag'an jazıp atırman. Senin' aytqanımnan da artıq isleytug'ının'dı bilemen.

²² Sonın' menen birge, mag'an turatug'ın bir orın da tayarla. O'ytkeni Quday sizlerdin' duwa etip sorag'anların'ızg'a juwap berip, meni sizlerge jiberetug'ınınan u'mit etemen.

²³ İysa Masix ushın menin' menen birge tutqın bolg'an Epafras sag'an sa'lem aytıp atır.

²⁴ Ja'ne de, bizler menen xızmet etip atırg'an Mark, Aristarx, Dimas ha'm Luka da sag'an sa'lem jollap atır.

²⁵ İyemiz İysa Masixtın' miyrimi sizlerge yar bolsın!