Titus 1 bob
1 Qudaydın' qulı ha'm İysa Masixtın' elshisi bolg'an men, Pavelden, Titusqa sa'lem! Qudaydın' tan'lag'an adamlarının' isenimi bekkem bolıwı ushın ha'm o'zlerin Qudaydın' jolı menen alıp ju'retug'ın haqıyqatlıqtı olardın' biliwi ushın men tayınlandım
2 Usı isenim ha'm haqıyqatlıqtı biliw o'tirik so'ylemeytug'ın Qudaydın' du'nya jaratılmastan burın wa'de etken ma'n'gilik o'mirin alıw u'mitine tiykarlang'an.
3 Waqtı kelgende, Quday O'z so'zin ja'riyalaw arqalı ashıp berdi. Al men usı so'zdi ja'riyalaw ushın Qutqarıwshımız Qudaydın' buyrıg'ı menen tapsırma aldım.
4 Ortaq isenimimiz boyınsha haqıyqıy ulım bolg'an Titusqa A'kemiz Quday ha'm Qutqarıwshımız İysa Masix miyrim ha'm tınıshlıq bersin!
5 Juwmaqlanbay qalg'an islerdi ta'rtiplestirip, menin' sag'an buyırg'anımday, ha'r bir qalada ja'ma'a't aqsaqalların tayınlawın' ushın, seni Kritte qaldırg'an edim.
6 Aqsaqal bolıp tayınlanatug'ın adam ayıpsız, tek bir hayallı bolsın. Onın' balaları da iseniwshi bolıp, a'depsiz ha'm ta'rbiya ko'rmegen, dep ayıplanbawı tiyis.
7 Sebebi ja'ma'a't jetekshisi Qudaydın' xızmetshisi sıpatında kemshiliksiz bolıwı kerek. Ol qaysar, qızba, ma'sku'nemlikke berilgen, ja'njelkesh, haram paydanı go'zleytug'ın bolmawı tiyis.
8 Kerisinshe, ol miymandos, jaqsılıqtı su'yiwshi, saldamlı, haq, muxaddes ha'm o'zin tutıp biletug'ın bolıwı kerek.
9 Ja'ne de, ja'ma'a't jetekshisi basqalardı durıs ta'liymat penen jigerlendiriwi ushın ha'm haqıyqatqa qarsı shıqqanlardı a'shkaralawı ushın, iseniwshilerge u'yretilgen haqıyqat so'zi boyınsha is tutıwı tiyis.
10 O'ytkeni haqıyqatqa boysınbaytug'ın, pa'tiwasız ha'm o'tirikshi ko'p adamlar bar. Onday adamlar a'sirese yahudiy toparları arasında ko'p.
11 Bunday adamlardın' awzın jawıw kerek. Olar o'z haram na'psi ushın, u'yretiwge bolmaytug'ın na'rselerdi u'yretip, barlıq xojalıqlardı buzıp ju'r.
12 Ha'tte, kritlilerdin' o'z shayırı: «Kritliler ba'rqulla o'tirikshiler, jawız haywanlar ha'm jalqaw ashko'zler bolg'an», – degen edi.
13 Bul gu'walıq – haqıyqat. Sonlıqtan isenimde bekkem turıwı ushın, olardı qatan' eskertip qoy.
14 ha'm olardı yahudiylerdin' ma'nissiz an'ızlarına, haqıyqattan adasqan adamlardın' buyrıqlarına qulaq astırma.
15 Pa'k adamlar ushın ha'mme na'rse pa'k. Biraq, napa'k adamlar menen isenbeytug'ın adamlar ushın hesh bir na'rse pa'k emes. Sebebi olardın' aqıl-oyları da, hu'jdanı da iplaslang'an.
16 Qudaydı bilemiz, dese de, islegen isleri menen Onnan tanadı. Olar – jerkenishli, Qudaydın' so'zine qulaq aspaytug'ın ha'm ha'r qanday jaqsı iske jaramsız adamlar.
