2 Timofey 1 bob
1 Masix İysadag'ı wa'de etilgen o'mir haqqında ja'riyalaw ushın, Qudaydın' qa'lewi menen Masix İysanın' elshisi bolg'an men, Pavelden
2 su'yikli ulım Timofeyge sa'lem! Quday A'kemiz ha'm İyemiz Masix İysa sag'an miyrim, rehim ha'm tınıshlıq bersin!
3 Men ata-babalarım sıyaqlı pa'k hu'jdan menen xızmet etetug'ın Qudayg'a ku'ni-tu'ni duwa etkenimde seni u'zliksiz eske alıp, shu'kirlik bildiremen.
4 Senin' ko'z jasların' yadımda. Ja'ne diydarlasıp, quwanıshqa bo'leniwim ushın, seni ko'riwdi an'sap atırman
5 Senin' haqıyqıy isenimin' de yadımda. Burın mama kempirin' Loidada ha'm anan' Evnikada bolg'an usı isenimnin' ha'zir sende bar ekenine tolıq isenemen.
6 Sonlıqtan qollarımdı u'stin'e qoyıp duwa etiwim arqalı Qudaydın' sag'an bergen sıyın bar inta menen qollana beriw* kerekligin esin'e tu'sirip atırman.
7 O'ytkeni Quday bizlerge qorqaqlıq ruwxın emes, al ku'sh, su'yispenshilik ha'm saldamlılıq ruwxın berdi.
8 8Solay etip, İyemiz haqqında gu'walıq beriwden ha'm Ol sebepli tutqın bolg'an mennen arlanba. Kerisinshe, Qudaydın' bergen ku'shi menen Xosh Xabar ushın menin' menen birge qıyınshılıq ko'.
9 Quday bizlerdi islegen islerimiz sebepli emes, al O'z maqseti ha'm miyrimi menen qutqarıp, muxaddes bolıp jasawg'a shaqırdı. Bul miyrimdi Ol bizlerge du'nya jaratılmastan burın Masix İysa arqalı bergen edi.
10 Al endi bolsa, bul miyrimdi Qutqarıwshımız Masix İysanın' du'nyag'a keliwi menen ashıq ko'rsetti. Masix İysa o'limnin' ku'shin joq qılıp, Xosh Xabar arqalı jog'almaytug'ın ma'n'gilik o'mirdi ayan qıldı.
11 Men Quday ta'repinen usı Xosh Xabar ushın xabarshı, elshi ha'm mug'allim bolıp tayınlandım.
12 Sonlıqtan bul sebepli azap shegip atırman. Biraq ta, men arlanbayman. Sebebi Kimge isengenimdi bilemen ha'm Onın' mag'an tapsırg'anın O'zi sol ku'nge deyin saqlay alatug'ınına da isenemen.
13 Mennen o'zin' esitken durıs ta'liymattı o'rnek qılıp, Masix İysag'a degen isenim ha'm su'yispenshilik penen jasa.
14 Sag'an tapsırılg'an iygilikli ta'liymattı ishimizde jasaytug'ın Muxaddes Ruwx* ja'rdeminde saqla.
15 Aziya u'lkesindegilerdin'* ha'mmesinin', solar arasında Figel ha'm Ermogennin' meni taslap ketkenin bilesen'.
16 İyemiz Onisifordın' u'y- ishine O'z rehmin bersin. O'ytkeni ol ko'p ma'rte mag'an jubanısh berdi ha'm tutqınlıg'ımnan arlanbadı.
17 Kerisinshe, Rimge kelgende, meni tapqansha, erinbey izledi.
18 Sol ku'ni İyemiz og'an O'z rehmin bersin! Onın' Efeste mag'an qansha xızmet etkenin sen de ju'da' jaqsı bilesen'.
