1 Timofey 6 bob
1 Qudaydın' atına ha'm ta'liymatına til tiymew ushın, qullıq moyıntırıg'ı astında bolg'anlardın' ha'mmesi o'z xojayınların tolıq hu'rmetke ılayıqlı dep sanasın.
2 Xojayınları iseniwshi bolg'an qullar bolsa, tuwısqanbız-g'o dep, hu'rmetsizlik qılmay, kerisinshe, olarg'a ja'ne de jaqsıraq xızmet etsin. Sebebi olardın' bul jaqsı xızmetinen payda ko'retug'ın xojayınlar – su'yikli iseniwshiler-g'o. Usılardı u'yretip, na'siyatla.
3 Kim de kim o'zge ta'liymattı u'yretip, İyemiz İysa Masixtın' haqıyqat so'zlerin ha'm Qudaydın' jolına tiykarlang'an ta'liymattı maqullamasa,
4 ol menmen ha'm hesh na'rseni bilmeytug'ın adam bolg'anı. Aytısıw ha'm tartısıw keseline jolıqqan bunday adamnın' ga'pleri ku'nshillik, alawızlıq, o'sek ha'm jaman gu'manlardı keltirip shıg'aradı.
5 Aqıl-oyları uwlang'an, haqıyqatlıqtı joytqan, Qudayg'a xızmet etiw arqalı bayıwg'a boladı, dep oylaytug'ın bul adamlar arasında ba'rqulla tartıslar boladı.
6 O'zin'de barg'a qanaat etip, Qudaydın' jolı menen ju'riw – u'lken jetiskenlik.
7 O'ytkeni bizler bul du'nyag'a hesh na'rse alıp kelmedik ha'm onnan hesh na'rse de alıp kete almaymız.
8 Jeytug'ın ha'm kiyetug'ın na'rselerimiz bolsa, usılarg'a qanaat eteyik.
9 Al bayımaqshı bolg'anlar azg'ırılıwg'a ushıraydı. Olar adamlardı ba'lege jolıqtırıp nabıt qılatug'ın ko'p ma'nissiz ha'm zıyanlı ha'weslerdin' duzag'ına ilinedi.
10 Sebebi ha'r tu'rli jamanlıqtın' negizi – aqshanı su'yiw. Ayırımlar aqshanın' izine tu'sip, isenimnen qayttı ha'm o'zlerin ko'p azaplarg'a duwshar etti.
11 Ha'y, Qudaydın' adamı, sen bul na'rselerden awlaq bol. Al haqlıqqa, Qudaydın' jolı menen ju'riwge, isenimge, su'yispenshilikke, sabırlıqqa ha'm mu'la'yimlikke umtılıp jasa.
12 İsenim ushın bolatug'ın jaqsı gu'reste jan-ta'nin' menen ha'reket etip, ma'n'gilik o'mirdi jen'ip al. O'ytkeni Quday seni usı ma'n'gilik o'mir ushın shaqırg'an ha'm sen ko'plegen gu'walar aldında isenimin'di ashıq ta'n alg'ansan'Ha'mmege o'mir beretug'ın Qudaydın' ha'm Pontiy Pilat tergegende turaqlılıq penen gu'walıq bergen Masix İysanın' aldında sag'an mınanı buyıraman:.
13 Ha'mmege o'mir beretug'ın Qudaydın' ha'm Pontiy Pilat tergegende turaqlılıq penen gu'walıq bergen Masix İysanın' aldında sag'an mınanı buyıraman:
14 İyemiz İysa Masix kelgenshe, o'zin'e berilgen buyrıqlardı orınlap, minsiz ha'm ayıpsız bol.
15 Quday O'zi belgilegen waqıtta İysa Masixtın' qayta keliwin ko'rsetedi. Quday – alg'ıs-maqtawlarg'a ılayıqlı jalg'ız Ha'kim, patshalar Patshası, hu'kimdarlar Hu'kimdarı.
16 Jalg'ız Qudaydın' g'ana basında o'lim joq. Ol hesh kim jaqınlay almaytug'ın nurda jasaydı, Onı hesh kim ko'rmegen ha'm ko'riwi de mu'mkin emes. Hu'rmet ha'm ma'n'gilik ku'sh-qu'diret Onıki bolsın! Awmiyin.
17 Bul du'nyadag'ı bay adamlarg'a menmen bolmawdı ha'm o'tkinshi baylıqtan u'mit etpewdi buyır. Al olar ra'ha't ko'riwimiz ushın bizlerge ha'mme na'rseni mol-mol etip beretug'ın Qudaydan u'mit etsin.
18 Olarg'a jaqsılıq islewdi, jaqsı isler menen bay bolıwdı ha'm o'zinde barın basqalar menen bo'lisip, saqıy bolıwdı da tapsır.
19 Sonda olar haqıyqıy o'mirge iye bolıwı ushın, o'zlerine keleshekte bekkem tayanısh bolatug'ın g'a'ziyne toplaydı.
20 Ha'y Timofey, sag'an isenip tapsırılg'andı saqla. Jaramas so'zlerden, o'tirikten «bilim» dep atalıp, haqıyqatqa qarsı turatug'ın ta'liymatlardan awlaq bol.
21 Sebebi ayırım adamlar bul jalg'an bilimge berilip, isenimnen qayttı. Qudaydın' miyrimi sizlerge yar bolsın!
