2 Salonikalılar 3 bob
1 Qullası, tuwısqanlar, İyemizdin' so'zi sizlerdin' aran'ızda qalay jayılg'an bolsa, ele de solay tezlik penen jayılıp, hu'rmetke bo'lene bersin dep, bizler ushın duwa etin'ler.
2 Jaman ha'm jawız adamlardan qutılıwımız ushın da duwa etin'ler. O'ytkeni adamlardın' ha'mmesi iseniwshi emes.
3 Biraq, İyemiz sadıq. Ol sizlerge ku'sh-quwat berip, shaytannan saqlaydı.
4 İyemiz sizler menen qarım-qatnasta bolg'anlıqtan, buyırg'anlarımızdı islep atırg'anın'ızg'a ha'm isleytug'ının'ızg'a isenemiz.
5 İyemiz ju'reklerin'izdi Qudaydın' su'yispenshiligine ha'm Masixtın' sabırlılıg'ına qaray jetelesin.
6 Tuwısqanlar! İyemiz İysa Masixtın' atı menen buyıramız: bizlerden alg'an ta'liymattı tın'lamay, isjaqpaslıq etip ju'rgen barlıq tuwısqanlardan awlaq ju'rin'ler!
7 Bizlerden qalay o'rnek alıwın'ız kerek ekenligin o'zlerin'iz bilesizler. Sebebi bizler aran'ızda bolg'anımızda, talapsız ju'rgen joqpız.
8 Hesh kimnin' nanın biypul jemedik. Kerisinshe, hesh birin'izge awırmanlıg'ımız tu'spesin dep, ku'ni-tu'ni awır miynet ettik.
9 Ja'rdemin'izdi qabıl etiwge haqımız bolmag'anı sebepli emes, al sizler bizlerge eliklesin dep, o'rnek bolıwımız ushın usılay isledik.
10 Ha'tte, bizler sizler menen birge bolg'anımızda: «Kim de kim miynet etiwdi qa'lemese, awqat ta jemesin», – degen buyrıqtı bergen edi.
11 O'ytkeni aran'ızdag'ı ayırımlardın' talapsız bolıp, hesh jumıs islemey, basqalardın' isine aralasıp ju'rgenin esitip atırmız.
12 Bunday adamlarg'a İyemiz İysa Masixtın' atı menen jalbarınamız ha'm mınanı buyıramız: tınısh miynet etip, o'z nanın o'zi tawıp jesin.
13 Al sizler, tuwısqanlar, jaqsı is islewden jalıqpan'lar.
14 Eger bul xattag'ı so'zlerimizge qulaq aspag'anlar bolsa, onı ayırıp qoyın'lar. Onı uyaltıw ushın, baylanıstı u'zin'ler.
15 Biraq, onı dushpan dep sanamay, tuwısqan sıpatında eskertin'ler.
16 Tınıshlıq beriwshi İyemizdin' O'zi sizlerge ha'mme waqıtta, ha'r qanday jag'dayda tınıshlıq bersin. İyemiz ha'mmen'izge yar bolsın!
17 Men, Pavel, bul sa'lemdi o'z qolım menen jazıp atırman. Menin' ha'r bir xatımda bul belgi bar. Men usılay jazaman.
18 İyemiz İysa Masixtın' miyrimi ha'mmen'izge yar bolsın!
