2 Salonikalılar 2 bob
1 Tuwısqanlar! Endi İysa Masixtın' qayta keliwine ha'm bizlerdin' Onın' aldına jıynalıwımızg'a baylanıslı sizlerden mınalardı o'tinemiz.
2 İyemizdin' ku'ninin' a'lle qashan kelgenin aytqan ha'r qanday payg'ambarshılıq, so'z yamasa bizler jibergendey etip ko'rsetilgen xat sebepli aqıldan da'rhal azıp, ta'shiwishlenben'ler.
3 O'zlerin'izdi hesh kimge hesh qanday jol menen aldatpan'lar. Sebebi sol ku'n keliwge deyin da'slep isenimnen qaytıw baslanıp, nızamdı buzıwshı, yag'nıy ta'g'dirine nabıt bolıw jazılg'an adam payda boladı.
4 Sol adam – Qudayg'a yamasa adamlar «quday» dep sıyınatug'ın ha'r bir na'rsege qarsı shıg'ıp, o'zin ha'mmeden joqarı qoyadı, ha'tte, ol Qudaydın' İbadatxanasındag'ı Muxaddesxanada otırıp, o'zin «qudayman» dep ja'riyalaydı.
5 Sizler menen birge bolg'anımda usılardı aytqanım eslerin'izde joq pa?
6 Sol adamnın' o'z waqtında payda bolıwına deyin ha'zir onı ne uslap turg'anın bilesizler.
7 Awa, nızamsızlıqtın' sırlı ku'shleri a'lle qashan ha'reket etpekte. Biraq usı ku'shti uslap turıwshı joq qılınbag'ansha, ol o'z isin dawam ete beredi.
8 Bunnan son', nızamdı buzıwshı payda boladı. Biraq İyemiz İysa onı awzınan shıqqan demi menen o'ltiredi ha'm O'zinin' ullı saltanatı menen kelgende joq qıladı.
9 Sol adam shaytannın' ku'shi menen kelip, ha'r tu'rli qu'diret, jalg'an belgiler menen tan' qalarlıq na'rselerdi.
10 ha'm nabıt bolatug'ınlardı aldawshı ha'r tu'rli jamanlıqlardı ko'rsetedi. O'ytkeni olar o'zlerinin' qutqarılıwı ushın haqıyqatlıqtı su'yiwden bas tartqanlıqtan, nabıt boladı.
11 Sonlıqtan jalg'ang'a isensin dep, Quday olarg'a aldawshı bir ku'sh jiberedi.
12 Solay etip, haqıyqatqa isenbey, jamanlıqtan ra'ha'tlenetug'ınlardın' ha'mmesi hu'kim etiledi.
13 Biraq bizler İyemiz su'ygen tuwısqanlarımız bolg'an sizler ushın ha'mme waqıt Qudayg'a shu'kirlik etiwge parızlımız. Sebebi Quday Muxaddes Ruwx ta'repinen muxaddes qılınıwın'ız arqalı ha'm haqıyqatqa iseniwin'iz arqalı qutqarılıwın'ız ushın, sizlerdi a'wel bastan tan'lap alg'an edi.
14 İyemiz İysa Masixtın' ullılıg'ına erisiwin'iz ushın, bizler ja'riyalag'an Xosh Xabar arqalı Quday sizlerdi usı qutqarılıwg'a shaqırdı.
15 Sol sebepli, tuwısqanlarım, bekkem turın'lar! Bizlerdin' so'z yamasa xat arqalı sizlerge u'yretken ta'liymatımız boyınsha is tutın'lar.
16 İyemiz İysa Masixtın' O'zi ha'm bizlerdi su'yip, miyrim-sha'pa'a'ti menen bizlerge sheksiz jubanısh ha'm jaqsı u'mit bergen A'kemiz Quday.
17 sizlerdin' kewillerin'izdi jigerlendirip, ha'r qanday jaqsı iste de, so'zde de ku'sh-quwat bersin.
