Eshua 7 bob
1 Degen menen, izraillılar bag'ıshlang'an na'rselerge qıyanet isledi. Yahuda urıwınan bolg'an Zeraxtın' shawlıg'ı, Zabdiydin' aqlıg'ı, Karmiydin' ulı Axan bag'ıshlang'an na'rselerdin' ayırımların alg'anlıqtan, Jaratqan İyenin' izraillılarg'a qa'ha'ri keldi.
2 Eshua Erixodan Beyt-Eldin' shıg'ısında, Beyt-Awenge jaqın jerde jaylasqan Ay qalasına adamlardı jiberip atırıp, olarg'a: – Barıp, eldi ko'zden o'tkizin'ler, – dedi. Adamlar barıp, Ay qalasın ko'zden o'tkizdi.
3 Keyin olar Eshuanın' qasına qaytıp kelip, og'an: – Pu'tkil xalıqtın' ol jerge barıp, a'were bolıwının' ha'jeti joq. Sanı jag'ınan az bolg'an Ay qalasının' xalqın jen'iwge eki-u'sh mın' adam jetkilikli, – dedi.
4 Solay etip, u'sh mın'g'a jaqın izraillılar qalag'a qaray ju'ris qıldı. Biraq olar Ay xalqınan qasha basladı.
5 Ay xalqı izraillılardı qala da'rwazasınan Shebarimge deyin quwıp, olardı to'beshikten tu'serlikte qırıp basladı ha'm olardın' shama menen otız altı adamın o'ltirdi. Bunnan qorqqanınan izraillılardın' ruwxları tu'sip, ju'rekleri suwladı.
6 Sonda Eshua kiyimlerin jırtıp, İzraildın' aqsaqalları menen birlikte baslarına topıraq shashtı ha'm Jaratqan İyenin' sandıg'ının' aldında etbetinen jerge jıg'ılıp, keshke deyin sol awhalda jattı
7 Son'ınan Eshua bılay dedi: – O, Quday İye, Sen bizlerdi amorlarg'a ta'slim etip, joq qılıw ushın İordan da'ryasınan o'tkizgen be edin'? Qa'nekey, da'ryanın' arg'ı ta'repinde qalsaq edi!
8 O, İyemiz, İzrail xalqı dushpanlarınan qashqannan son', men ne ayta alaman?
9 Kenaanlılar ha'm usı jerde jasaytug'ın basqa xalıqlar bunı esitkende, a'tirapımızdı qorshap alıp, atımızdı jer ju'zinen joq qıladı. Sonda Sen O'zin'nin' ullı atın'dı saqlap qalıw ushın ne isleyjaqsan'.
10 Jaratqan İye Eshuag'a bılay dedi: – Ornın'nan tur! Nege bulay et-betin'nen jerge jıg'ılıp jatırsan'?
11 İzraillılar gu'na islep, Menin' olarg'a orınlan' dep buyırg'an kelisimimdi buzdı. Olar bag'ıshlang'an na'rselerdin' bir bo'legin urladı ha'm aldap, o'z zatlarının' arasına jasırdı.
12 Sol sebepli, endigiden bılay izraillılar dushpanlarına qarsı tura almaydı, olar artqa qaytıp, dushpanlarının' aldına tu'sip qashadı. Sebebi olar joq qılınıw jazasına tartılg'an. Sizler o'zlerin'izdegi bag'ıshlang'an na'rselerdi joq etpesen'iz, Men artıq sizler menen birge bolmayman.
13 Bar, sen xalıqtı pa'kle ha'm olarg'a bılay de: «Erten'gi ku'n ushın o'zlerin'izdi pa'klen'ler. O'ytkeni İzraildın' Qudayı Jaratqan İye: „Ha'y, İzrail, sizlerdin' aran'ızda bag'ıshlang'an na'rseler bar. Sol na'rselerdi joq etpegenin'izshe, dushpanların'ızg'a qarsı tura almaysızlar“, – deydi.
14 Tan' atqanda, sizler urıw-urıw bolıp dizilip, gezek penen aldıg'a shıg'asızlar. Jaratqan İyenin' ko'rsetken urıwı tiyre-tiyre bolıp aldıg'a shıg'adı. Son' Jaratqan İye ko'rsetken tiyre xojalıqları menen birme-bir aldıg'a shıg'adı. Keyin Jaratqan İye ko'rsetken xojalıqtın' er adamları aldıg'a shıg'adı.
15 Bag'ıshlang'an na'rselerdi aldı dep ko'rsetilgen adam o'zine tiyisli ha'r bir na'rse menen birlikte jag'ıp jiberiledi. Sebebi ol adam Jaratqan İyenin' kelisimin buzıp, İzrailda jerkenishli gu'na isledi».
16 Tan' azannan turg'an Eshua İzrail xalqın urıw boyınsha aldıg'a shıg'ardı. Sonda olardın' ishinen Yahuda urıwı ko'rsetildi.
17 Yahuda tiyreleri aldıg'a shıg'arılg'anda, Zerax tiyresi ko'rsetildi. Zerax tiyresi xojalıqları menen aldıg'a shıg'arılg'anda, Zabdiy xojalıg'ı ko'rsetildi.
18 Zabdiy xojalıg'ının' er adamları aldıg'a shıg'arılg'anda, Yahuda urıwınan Zeraxtın' shawlıg'ı, Zabdiydin' aqlıg'ı, Karmiydin' ulı Axan ko'rsetildi.
19 Sonda Eshua Axang'a: – Ulım! İzraildın' Qudayı Jaratqan İyenin' hu'rmetin ornına qoy ha'm Onın' ullılıg'ın ta'n alıp, haqıyqatın ayt, ne isledin'? Mennen jasırma, – dedi.
20 Axan Eshuag'a bılay dedi: – Durıs, men İzraildın' Qudayı Jaratqan İyege qarsı gu'na isledim. Men mına isti qılg'an edim:
21 oljalardın' ishinde Shınardan a'kelingen sulıw bir shapan, eki ju'z shekel gu'mis, eliw shekel awırlıg'ında bir altın quymanı ko'rgenimde ha'wesim kelip, olardı aldım. Gu'misti en' astına salıp, olardın' ha'mmesin shatırımnın' ishine, jerge jasırdım.
22 Eshua jibergen adamlar da'rhal shatırg'a qaray juwırıp ketti. Olar sol jerge ko'milgen zatlardı taptı. Gu'mis en' astına ko'milgen eken.
23 Olar bul na'rselerdin' ha'mmesin shatırdan aldı da, Eshuag'a ha'm İzrail xalqına a'kelip berip, Jaratqan İyenin' aldına qoydı.
24 Eshua ha'm pu'tkil İzrail xalqı Zerax ulı Axandı, gu'misti, altın quymanı, shapandı, Axannın' ul-qızların, iri ha'm mayda malların, esheklerin, onın' shatırın ha'm shatırının' ishindegi barlıq zatların Axor oypatlıg'ına apardı.
25 Eshua Axang'a: – Sen nege bizlerdi bul ba'lege jolıqtırdın'? Jaratqan İye bu'gin o'zin'di ba'lege jolıqtıradı, – dedi. Son'ınan pu'tkil İzrail xalqı Axan menen onın' xojalıg'ındag'ılardı tas boran qılıp o'ltirdi ha'm olardı otqa jag'ıp jiberdi.
26 Keyin olar Axannın' u'stine u'lken tas u'yindisin u'ydi. Bul u'yindi bu'gin de bar. Solay etip, usı waqıyadan son', Jaratqan İyenin' qa'ha'ri basıldı. Sol jerdin' bu'gingi ku'nge deyin Axor oypatlıg'ı dep atalıwının' ma'nisi usı.
