Eshua 17 bob
1 Yusuptin' tun'g'ısh ulı Menashshenin' urpaqlarına, Menashshe urıwına berilgen u'les jerler mınalar edi: Giladtın' a'kesi Maxir Menashshenin' tun'g'ısh ulı edi. Maxir batır a'sker bolg'anlıqtan, Gilad ha'm Bashan jeri onıki boldı.
2 Menashshenin' basqa ulları Abiezer, Xelek, Asriel, Shexem, Xefer ha'm Shemidanın' ullarına da tiyre sanına qaray u'les berildi. Bular tiyre ko'semleri bolıp, Yusuptin' ulı Menashshenin' er balaları edi.
3 Menashshenin' quwlıg'ı, Maxirdin' shawlıg'ı, Giladtın' aqlıg'ı, Xeferdin' ulı bolg'an Selofexadtın' ul balası bolmadı. Onın' tek Maxla, Noa, Xogla, Milka ha'm Tirsa degen qızları boldı.
4 Sol qızlar ruwxaniy Elazarg'a, Nun ulı Eshuag'a ha'm basshılarg'a kelip, olarg'a: «Er tuwısqanlarımız qatarı bizlerge de u'les beriliwin Jaratqan İye Muwsag'a buyırg'an edi», – dedi. Sonda Eshua Jaratqan İyenin' buyrıg'ı boyınsha olarg'a da er tuwısqanları qatarı jerden u'les berdi.
5 Solay etip, Menashshe urıwına İordan da'ryasının' shıg'ısındag'ı Gilad ha'm Bashan jerinen basqa, ja'ne on jer u'les etip berildi.
6 O'ytkeni Menashshenin' qız urpaqları da er urpaqları qatarı jerden u'les alg'an edi. Al Gilad jeri bolsa, Menashshenin' basqa ullarına berildi.
7 Menashshe urıwının' jeri Asherden Shexemnin' shıg'ısındag'ı Mixmetatqa sozılatug'ın edi ha'm shegarası ol jerden qublag'a burılıp, EnTappuax xalqının' jerlerine deyin baratug'ın edi.
8 Tappuax qalasının' a'tirapındag'ı jerler Menashshe urıwına, al onın' shegarasındag'ı Tappuax qalasının' o'zi Efrayım urıwına tiyisli edi.
9 Son'ınan shegara Qana sayına tu'sip, saydın' qublasındag'ı Menashshe urıwına tiyisli qalalar arasındag'ı Efrayım urıwına tiyisli qalalarg'a deyin baratug'ın edi. Menashshe urıwının' jer shegarası saydın' arqa ta'repi boyınsha sozılıp, Jer Orta ten'izine barıp toqtaytug'ın edi.
10 Qubladag'ı jerler Efrayım urıwıniki, al arqadag'ı jerler Menashshe urıwıniki bolıp, batısta Jer Orta ten'izi, arqada Asher, shıg'ısta İssaxar urıwının' jerleri menen shegaralasatug'ın edi.
11 İssaxar ha'm Asher urıwlarına tiyisli jerlerdegi Beyt-Shean ha'm onın' awılları, İbleam ha'm onın' awılları, Dor, yag'nıy Nafat-Dor xalqı ha'm onın' awılları, En-Dor xalqı ha'm onın' awılları, Taanax xalqı ha'm onın' awılları, Megiddo xalqı ha'm onın' awılları Menashshe urıwına tiyisli edi.
12 Degen menen, Menashshenin' urpaqları bul qalalardı qolg'a kirgize almadı. Sebebi kenaanlılar sol jerlerde qalıwg'a qarar etken edi.
13 İzraillılar ku'shke tolg'anda, kenaanlılardı erksiz xızmetshige aylandırdı, biraq olardı tolıq quwıp shıg'armadı.
14 Bir ku'ni Yusuptin' urpaqları Eshuag'a kelip: – Ne ushın bizlerge tek bir ma'rte shek taslap, bir u'les jer berdin'? Jaratqan İye bizlerdi jarılqag'anlıqtan, bizler ju'da' ko'ppiz, – dedi.
15 Eshua olarg'a: – Sizler sonshelli ko'p bolsan'ız ha'm sizlerge Efrayımnın' tawlı u'lkesi tarlıq etip atırg'an bolsa, perizler ha'm refalardın' jerlerindegi tog'aylardı shawıp, o'zlerin'izge jer ashıp alın'lar, – dep juwap berdi.
16 Yusuptin' urpaqları Eshuag'a: – Awa, tawlı jerler bizlerge jetpeydi. Biraq Beyt-Shean menen onın' awıllarında ha'm İzreel oypatlıg'ında jasaytug'ınlardın', yag'nıy sol jerde jasaytug'ın barlıq kenaanlılardın' temir arbaları bar-g'o, – dedi.
17 Eshua Yusuptin' ulları Efrayım menen Menashshenin' urpaqlarına bılay dedi: – Sizler ko'p sanlı ha'm ku'shlisiz. Sizler tek bir u'les penen qalmaysızlar.
18 Tawlı jerler ha'm ondag'ı tog'aylıqlar da sizlerdiki boladı. Sizler tereklerdi shawıp, tazalasan'lar, ol jerler tolıg'ı menen sizlerdiki boladı. Kenaanlılar ku'shli bolsa da, olardın' temir arbaları bolsa da, sizler olardı quwıp shıg'arasızlar.
