Eshua 1 bob

Jaratqan İyenin' Eshuag'a bergen buyrıg'ı(1-9),Eshuanın' xalıqqa bergen buyrıg'ı(10-18).

¹ Jaratqan İye O'z qulı Muwsanın' o'liminen son', onın' ja'rdemshisi Nun ulı Eshuag'a bılay dedi:

² – Menin' qulım Muwsa o'ldi. Qa'nekey, endi sen pu'tkil xalıq penen birge İordan da'ryasın kesip o'tip, Men sizlerge, yag'nıy İzrail xalqına beretug'ın elge kirin'ler.

³ Muwsag'a aytqanımday, ayag'ın'ız tiygen barlıq jerlerdi sizlerge beremen.

⁴ Sizlerdin' jer shegaran'ız qubladag'ı sho'lden arqadag'ı Lebanong'a deyin, shıg'ıstag'ı ullı Evfrat da'ryasınan pu'tkil xettlerdin' eli arqalı batıstag'ı Jer Orta ten'izine deyin sozılg'an boladı.

⁵ O'mirin' boyı hesh kim sag'an qarsı tura almaydı. Muwsa menen birge bolg'anım sıyaqlı, Men senin' menen de birge bolaman. Seni hesh qashan qaldırmayman ha'm taslap ketpeymen.

⁶ Ku'shli ha'm ma'rt bol. Sebebi Men ata-babalarına beremen dep ant ishken jerdi bul xalıq iyelewi ushın, sol jerdi olarg'a sen alıp beresen'.

⁷ Tek ku'shli ha'm ju'da' ma'rt bolıp, qulım Muwsanın' sag'an buyırg'an pu'tkil Nızamın muqıyatlı tu'rde orınla. Qay jerge barsan' da, tabısqa iye bolıwın' ushın, bul Nızamnan uzaqlama ha'm onnan ya on'g'a, ya solg'a awıp ketpe.

⁸ Nızam kitabında jazılg'an so'zlerdi awzın'nan tu'sirme. Onda jazılg'anlardın' barlıg'ın tolıq orınlaw ushın, ol haqqında ku'ni-tu'ni oy juwırtıp ju'r. Sonda sen tabısqa iye bolıp, maqsetin'e erisesen'.

⁹ Sag'an ku'shli ha'm ma'rt bol demegen be edim? Qorqpa ha'm ruwxın'dı tu'sirme. O'ytkeni Qudayın' Jaratqan İye sen baratug'ın ha'r bir jerde senin' menen birge boladı.

¹⁰ Solay etip, Eshua xalıq qadag'alawshılarına bılay dep buyırdı:

¹¹ – Ordanı aralap shıg'ıp, xalıqqa mına buyrıqtı berin'ler: «O'zlerin'izge azıq-awqat tayarlan'lar. Sebebi Qudayın'ız Jaratqan İye sizlerge beretug'ın jerine kirip, onı menshik etip iyelew ushın, u'sh ku'nnen son', İordan da'ryasın kesip o'tesizler».

¹² Al Eshua Ruben ha'm Gad urıwları menen Menashshe urıwının' yarımına bılay dedi:

¹³ – Jaratqan İyenin' qulı Muwsanın': «Qudayın'ız Jaratqan İye bul jerdi sizlerge berip, sizlerdi tınıshlıqqa eristiredi», – degen so'zlerin eske tu'sirin'ler.

¹⁴ Sizlerdin' hayalların'ız, balaların'ız ha'm malların'ız usı jerde, yag'nıy İordan da'ryasının' shıg'ısında, Muwsanın' sizlerge bergen jerinde qalsın. Biraq sizler, yag'nıy pu'tkil jawıngerler qurallanıp, tuwısqanların'ızdan aldın da'ryanı kesip o'tin'ler ha'm olarg'a ja'rdem berin'ler

¹⁵ Jaratqan İye sizlerdi tınıshlıqqa eristirgeni sıyaqlı, olardı da tınıshlıqqa eristiredi. Olar Qudayın'ız Jaratqan İyenin' beretug'ın jerin mu'lik etip alg'annan son', sizler de mu'lik etip alg'an jerlerin'izge, Jaratqan İyenin' qulı Muwsanın' İordan da'ryasının' shıg'ısındag'ı sizlerge bergen jerine qaytıp, usı jerge ornalasın'lar

¹⁶ Olar Eshuag'a bılay dep juwap berdi: – Bizlerge buyırg'anların'nın' ha'mmesin orınlaymız. Qay jerge jibersen' de, baramız.

¹⁷ Ha'r bir na'rsede Muwsanın' so'zine boysıng'anımız sıyaqlı, senin' so'zin'e de boysınamız. Muwsa menen birge bolg'an Qudayın' Jaratqan İye senin' menen de birge bolsın.

¹⁸ So'zin'e qarsı shıqqan ha'm qanday da bir buyrıg'ın'a boysınbag'an adamg'a o'lim jazası beriledi. Tek sen ku'shli ha'm ma'rt bol.