1 Salonikalılar 5 bob
1 Tuwısqanlar! Bul waqıyalardın' waqıt ha'm ma'wsimleri haqqında sizlerge jazıwdın' keregi joq.
2 Sebebi İyemizdin' ku'ni tu'nde urının' keliwi sıyaqlı keletug'ının sizler anıq bilesizler.
3 damlar: «Ha'mmesi tınısh ha'm qa'wipsiz», – degende, ju'kli hayaldı birden tolg'aq tutqanday, olar tosattan apatqa ushırap, qashıp qutıla almaydı.
4 Biraq tuwısqanlar, sizler qaran'g'ılıqta bolmag'anlıqtan, sol ku'n sizlerdi urı tu'skendey g'apılda qaldırmaydı.
5 Sizlerdin' ha'mmen'iz nurdın' ha'm ku'ndizdin' balalarısız. Bizler tu'nge yamasa qaran'g'ılıqqa tiyisli emespiz
6 Sonlıqtan basqalar sıyaqlı uyıqlamayıq, oyaw ha'm sergek bolayıq.
7 O'ytkeni uyıqlaytug'ınlar tu'nde uyıqlaydı, ma's bolatug'ınlar da tu'nde ma's boladı.
8 Al ku'ndizge tiyisli bolg'an bizler sergek bolayıq, isenim ha'm su'yispenshilikti sawıt qılıp, qutqarılıwg'a degen u'mitti basımızg'a duwlıg'a qılıp kiyeyik.
9 ebebi Quday bizlerdi O'zinin' g'a'zebine ushırawımız ushın emes, al İyemiz İysa Masix arqalı qutqarılıwımız ushın tayınladı.
10 Tiri bolsaq ta, o'li bolsaq ta, bizlerdi O'zi menen birge jasasın dep, İysa Masix bizler ushın o'ldi.
11 Sonlıqtan ha'zir islep atırg'anın'ızday, bir-birin'izdi jigerlendirip, bir-birin'izdin' isenimin'izdi bekkemley berin'ler.
12 Tuwısqanlar! Aran'ızda miynet etkenlerdin', yag'nıy İyemizdin' jolında sizlerge jolbasshılıq qılıp, aqıl-na'siyat bergenlerdin' qa'dirin biliwin'izdi sizlerden o'tinish etemiz.
13 İslegen isleri ushın olardı su'yip, sheksiz hu'rmet etin'ler. O'z ara tatıw jasan'lar.
14 Sizlerge jalbarınamız, tuwısqanlar, is jaqpaslarg'a eskertiw jasap, ju'reksizlerdi jigerlendirin'ler, ku'shsizlerge ja'rdem berip, ha'mmege sabırlı bolın'lar.
15 Abaylı bolın'lar, hesh kim jamanlıqqa jamanlıq penen juwap qaytarmasın. Kerisinshe, ha'mme waqıtta bir-birin'izge ha'm pu'tkil adamlarg'a jaqsılıq islewge umtılın'lar.
16 Ba'rqulla quwanın'lar.
17 Tınbay duwa etin'ler.
18 Qanday awhal bolsa da, Qudayg'a shu'kirlik bildirin'ler. O'ytkeni Masix İysag'a tiyisli bolg'an sizlerge degen Qudaydın' erki usılar.
19 Muxaddes Ruwxtın' isin toqtatpan'lar.
20 Payg'ambarshılıq so'zlerin kemsitpen'ler.
21 Biraq, ha'mme na'rseni sınap ko'rin'ler. Jaqsılıqqa jabısıp alın'lar.
22 Ha'r qanday jamanlıqtan qashın'lar.
23 Tınıshlıq beriwshi Qudaydın' O'zi sizlerdi tolıq muxaddes qılsın: pu'tkil ruwxın'ız, janın'ız ha'm denen'izdi İyemiz İysa Masixtın' keliwine kemshiliksiz qılıp saqlasın.
24 Sizlerdi shaqırg'an Quday sadıq, Ol usını a'melge asıradı.
25 Tuwısqanlar, bizler ushın duwa etin'ler.
26 Barlıq tuwısqanlardı muxaddes posa menen su'yip, sa'lem aytın'lar.
27 Bul xattın' ha'mme tuwısqanlarg'a oqıp beriliwin İyemizdin' atı menen sizlerge qatan' tu'rde tapsıraman.
28 İyemiz İysa Masixtın' miyrimi sizlerge yar bolsın!
