1 Salonikalılar 1 bob
1 A'kemiz Qudayg'a ha'm İyemiz İysa Masixqa tiyisli bolg'an Salonika iseniwshilerinin' ja'ma'a'tine, Pavel, Sila ha'm Timofeyden sa'lem! Sizlerge Qudaydın' miyrimi ha'm tınıshlıg'ı yar bolsın!
2 Duwa etkenimizde sizlerdi tilge alıp, ba'rqulla ha'mmen'iz ushın Qudayg'a shu'kirlik bildiremiz.
3 Quday A'kemizdin' aldında isenimin'izdin' jemisi bolg'an is-ha'reketin'izdi, su'yispenshiligin'izge tiykarlang'an miynetin'izdi ha'm İyemiz İysa Masixqa degen u'mitin'izden payda bolg'an shıdamlılıg'ın'ızdı u'zliksiz eske alamız.
4 Quday su'ygen tuwısqanlarım! Onın' sizlerdi tan'lap alg'anın bizler bilemiz.
5 Sebebi sizlerge ja'riyalang'an Xosh Xabar tek so'z benen g'ana emes, al qu'diret, Muxaddes Ruwx ha'm tolıq isenim menen jetkizildi. Sizlerdin' paydan'ız ushın aran'ızda qalay jasag'anımızdı bilesizler.
6 Ko'p azap-aqıretlerge qaramay, sizler Muxaddes Ruwxtın' bergen quwanıshı menen Qudaydın' so'zin qabıl etip, bizlerge ha'm İyemizge eliklewshiler boldın'lar.
7 Solay etip, Makedoniya ha'm Axayadag'ı pu'tkil iseniwshilerge sizler u'lgi boldın'lar.
8 O'ytkeni İyemizdin' so'zi sizlerden tarqap, Qudayg'a degen isenimin'iz haqqında xabar tek Makedoniya ha'm Axayag'a emes, al ha'mme jerge jetip bardı. Sonlıqtan bizlerdin' bul haqqında bir na'rse aytıwımızg'a ha'jet qalmadı.
9 Sebebi olardın' o'zleri bizlerdi qanshelli jaqsı qabıl alg'anın'ızdı ha'm haqıyqıy tiri Qudayg'a xızmet etiw ushın qalay butlardı taslap, Qudayg'a qaytqanın'ızdı aytıp berdi.
10 Ja'ne bizlerdi keleshektegi qa'ha'rli jazadan qutqaratug'ın Qudaydın' O'zi o'limnen tiriltken Ulı İysanın' aspannan keliwin ku'tip atırg'anın'ızdı da olar so'z etti.
