Kolosalılar 4 bob
1 Ha'y xojayınlar, aspanda sizlerdin' de İyen'iz bar ekenin bilip, qulların'ızg'a a'dillik ha'm ten'lik penen qatnas jasan'lar.
2 Ba'rqulla duwa etin'ler. Duwa etkenin'izde shu'kirlik bildirip, sergek bolın'lar.
3 Bizler ushın da duwa etin'ler: Masixtın' sırı haqqında O'z so'zin ja'riyalay alıwımız ushın, Quday bizlerge jol ashsın. Men usı sır ushın tutqındaman.
4 Bul sırdı tiyisli tu'rde, tu'sinikli etip ayta alıwım ushın da duwa etin'ler.
5 Waqıttan jaqsı paydalanıp, ja'ma'a'ttin' sırtındag'ı adamlarg'a aqıllılıq penen qatnas jasan'lar.
6 So'zin'iz ha'mme waqıtta jag'ımlı ha'm duzlı bolsın. Sonda sizler ha'r bir adamg'a qalay juwap beriw kerekligin bilip alasızlar.
7 İyemizge menin' menen birge xızmet etetug'ın isenimli xızmetshi bolg'an su'yikli tuwısqanımız Tixik men tuwralı ha'mme xabardı sizlerge bildiredi.
8 Mine, men usı maqset penen onı sizlerge jiberip atırman. Ol hal-jag'dayımızdı bildirip, sizlerdin' kewillerin'izge jubanısh beredi.
9 Tixik penen birge jerlesin'iz, isenimli ha'm su'yikli tuwısqanımız bolg'an Onisimdi de jiberip atırman. Olar sizlerge bul jerde bolıp atırg'an barlıq waqıyalar haqqında aytıp beredi.
10 Menin' menen birge qamaqta otırg'an joldasım Aristarx ha'm Barnabanın' atalas inisi Mark sizlerge sa'lem aytıp atır. Sizler Mark haqqında nusqaw alg'an edin'ler: eger ol sizlerge barsa, onı qabıl etin'ler.
11 Yustus dep atalatug'ın Eshu da sizlerge sa'lem aytıp atır. Yahudiyler ishinen tek usılar g'ana menin' menen birge Qudaydın' Patshalıg'ı ushın xızmet etpekte. Olar mag'an jubanısh boldı.
12 Masix İysanın' xızmetshisi bolg'an jerlesin'iz Epafras sizlerge sa'lem aytıp atır. Sizlerdi Qudaydın' ha'r bir erkine tolıq isensin ha'm minsiz adamlar bolsın dep, ol sizler ushın bar ku'shi menen u'zliksiz duwa etip atır.
13 Sizler ushın ha'm Laodikiya menen Erapolda bolg'anlar ushın, onın' ko'p miynet etkenine men gu'waman.
14 Su'yikli shıpaker Luka menen Dimas ta sizlerge sa'lem aytıp atır.
15 Laodikiyadag'ı tuwısqanlarg'a, Nimfag'a ha'm onın' u'yindegi ja'ma'a'tke sa'lem aytın'lar.
16 Bul xat aran'ızda oqılg'annan son', onı Laodikiya ja'ma'a'tinde de oqıtın'. Sizler de Laodikiyadan kelgen xattı oqın'lar.
17 Arxipke mınanı aytıp qoyın'lar: «İyemizden qabıl etken xızmetin'di orınlawg'a intalı bol!»
18 Men, Pavel, bul sa'lemnamanı o'z qolım menen jazıp atırman. Menin' tutqınlıg'ımdı umıtpan'lar. Qudaydın' miyrimi sizlerge yar bolsın!
