Kolosalılar 1 bob
1 Qudaydın' qa'lewi menen Masix İysanın' elshisi bolg'an men, Pavelden ha'm tuwısqanımız Timofeyden,
2 Kolosa qalasındag'ı iseniwshilerge*, yag'nıy Masixqa sadıq bolg'an tuwısqanlarımızg'a sa'lem! A'kemiz Quday sizlerge miyrim ha'm tınıshlıq bersin!
3 Sizler ushın duwa etkenimizde, İyemiz İysa Masixtın' A'kesi – Qudayg'a ba'rqulla shu'kirlik bildiremiz.
4 Sebebi sizlerdin' Masix İysag'a degen isenimin'iz ha'm pu'tkil iseniwshilerge degen su'yispenshiligin'iz haqqında esittik.
5 Sizlerdin' bul isenimin'iz ha'm su'yispenshiligin'iz aspanda sizler ushın saqlawlı turg'an u'mitke negizlengen. Sizler usı u'mit haqqında haqıyqat so'zleri, yag'nıy Xosh Xabar arqalı esitkensizler.
6 Bul Xosh Xabar sizlerge de jetip keldi. Ol pu'tkil du'nya boylap adamlardı jaqsılıqqa jetelep, tarqalmaqta. Sol sıyaqlı, sizler Qudaydın' miyrimi haqqında esitip, Onın' haqıyqatın bilip alg'an ku'nin'izden baslap, Xosh Xabar sizlerdi de jaqsılıqqa jetelep, tarqalmaqta.
7 Sizler Xosh Xabar haqqında bizler menen birge xızmet etetug'ın su'yikli Epafrastan ta'lim aldın'lar. Usı Epafras – sizler ushın miynet etip atırg'an Masixtın' sadıq xızmetshisi.
8 Sizlerdin' Muxaddes Ruwxtan* alg'an su'yispenshiligin'iz haqqında da bizlerge ol bildirdi.
9 Sol sebepten usılar haqqında esitken ku'nimizden baslap, bizler de sizler ushın u'zliksiz duwa etip, Qudaydın' qa'lewin pu'tkil ruwxıy danalıq ha'm tu'sinik penen tolıq biliwin'iz ushın sorap atırmız.
10 Bizler ja'ne sizlerdin' İyemizge ılayıqlı bolıp jasawın'ız, Onı ha'r ta'repleme ırza qılıp, ha'r bir jaqsı iste jemis beriwin'iz ha'm Qudaydı biliwde o'sip barıwın'ız ushın da duwa etip atırmız.
11 Onın' ullılıg'ının' qu'diretinen tolıq ku'sh-quwat alıp, ha'mme na'rsege sabırlılıq penen shıday alıwın'ız ushın ha'm Quday A'kemizge quwanısh penen shu'kirlik ete alıwın'ız ushın da bizler duwa etip atırmız.
12 Quday A'kemiz bizlerdi nurdag'ı muxaddeslerdin'* miyrasına sherik bolıwg'a miyasar qıldı.
13 Quday bizlerdi qaran'g'ılıqtın' hu'kimdarlıg'ınan qutqarıp, su'yikli Ulının' Patshalıg'ına ko'shirdi.
14 Bizler Qudaydın' Ulının' qanı arqalı qutqarıldıq, yag'nıy gu'nalarımızg'a keshirim aldıq.
15 Qudaydın' Ulı bolg'an Masix ko'zge ko'rinbeytug'ın Qudaydın' qanday ekenin ko'rsetedi ha'm Ol jaratılg'an ha'mme na'rseden burın bar bolg'an.
16 O'ytkeni aspandag'ı ha'm jerdegi ko'zge ko'rinetug'ın ha'm ko'zge ko'rinbeytug'ın na'rselerdin' ha'mmesi Masix ta'repinen jaratılg'an: taxtlar, hu'kimdarlıqlar, ha'kimshilik ha'm biylikler, ha'mme na'rse Ol arqalı ha'm Ol ushın jaratıldı.
17 Masix ha'mme na'rseden burın bar bolg'an ha'm ha'mme na'rse Ol sebepli bar bolıp turıptı.
18 Masix – iseniwshiler ja'ma'a'tinin', yag'nıy O'z denesinin' bası ha'm ja'ma'a'ttin' tiykarı. Ol ha'mme na'rseden joqarı bolıw ushın, o'liler ishinen birinshi bolıp tirildi.
19 Sebebi Quday O'zinin' pu'tkil tolılıg'ının' Onda bolıwın maqul ko'rdi.
20 Masixtın' atanaq ag'ashtag'ı qanı arqalı tınıshlıq ornatıp, Quday Ol arqalı jer ha'm aspandag'ılardın' barlıg'ın O'zi menen jarastırıwdı qa'ledi.
21 Sizler bir waqıtları jaman is-ha'reketlerin'iz sebepli, kewillerin'iz benen Qudayg'a jat ha'm dushpan edin'ler.
22 Endi bolsa, Quday sizlerdi O'zinin' aldında muxaddes, kemshiliksiz ha'm ayıpsız qılıp qoyıw ushın, Masixtın' denesinin' o'limi arqalı sizlerdi O'zi menen jarastırdı.
23 Tek g'ana isenimde ba'rqulla turaqlı ha'm bekkem bolıp, o'zlerin'iz esitken Xosh Xabardın' u'mitinen taymasan'ız bolg'anı. Men, Pavel, aspan astındag'ı pu'tkil adamzatqa ja'riyalang'an usı Xosh Xabardın' xızmetshisi boldım.
24 Ha'zir men sizler ushın azap shegip atırg'anıma quwanıshlıman. O'ytkeni Masixtın' ko'rgen qıyınshılıqlarının' jetpegen mo'lsherin Onın' denesi bolg'an iseniwshiler ja'ma'a'ti ushın men o'z denem menen azap shegip toltırıp atırman.
25 Qudaydın' mag'an bergen tapsırması boyınsha Onın' so'zin sizlerge tolıq jetkiziw ushın, men iseniwshiler ja'ma'a'tinin' xızmetshisi boldım.
26 Qudaydın' Xosh Xabarı o'tken a'sirler menen a'wladlarda jasırın tutıldı. Biraq endi usı sır Onın' muxaddeslerine ayan boldı.
27 Bul sırdın' basqa milletler ushın da qanshelli ullı ha'm bay ekenin Quday O'z muxaddeslerine bildiriwdi uyg'ardı. Usı sır – ullılıqqa erisiwge u'mit beretug'ın ishin'izde jasawshı Masix.
28 Bizler usı Masix haqqında ha'mmege ja'riyalap atırmız. Masix penen qatnasta bolg'an ha'r bir adamdı Qudayg'a jetilisken qılıp usınıw ushın, bizler ha'r bir adamdı eskertip, tolıq danalıq penen ta'lim bermektemiz.
29 Masixtın' qu'direti menen mende ha'reket etiwshi ku'sh boyınsha, men de bul maqset ushın bar ku'shimdi salıp miynet etpektemen.
