Filipliler 4 bob
1 Sonlıqtan ha'y ju'rekten sag'ınıp ju'rgen su'yikli tuwısqanlarım, quwanıshım ha'm basımnın' tajı, İyemiz benen qatnasın'ız bekkem bolsın, qa'dirdanlarım!
2 Evodiyag'a o'tinish etemen, Sintixiyag'a da o'tinish etemen, İyemiz benen qatnasta bolg'an sizler, awızbirshilikli bolın'lar!
3 Awa, sadıq Sizigus sag'an da jalbarınaman, bul hayallarg'a ja'rdem ber. Sebebi olar menin' menen, Kliment penen ha'm basqa xızmetshiler menen birge Xosh Xabardı ja'riyalaw ushın awır miynet etti. Olardın' ha'mmesinin' atları O'mir kitabında jazılg'an.
4 İyemiz benen qatnasta bolıp, ba'rqulla quwanın'lar. Ta'kirarlap aytaman: quwanın'lar.
5 Sizlerdin' adamgershiligin'iz ha'mme adamlarg'a ma'lim bolsın. İyemizdin' keletug'ın waqtı jaqın.
6 Hesh na'rseden ta'shiwish shekpen'ler. Al ha'mme na'rse ushın Qudayg'a duwa etip ha'm jalbarınıp, ha'r bir tilegin'izdi Og'an shu'kirlik penen bildirin'ler.
7 Sonda ha'r qanday aqıl-oydan zıyat bolg'an Qudaydın' tınıshlıg'ı Masix İysa arqalı kewillerin'izdi ha'm oy-pikirlerin'izdi qorg'aydı.
8 Tuwısqanlarım, juwmaqlap aytqanda, tek nelerdin' haqıyqıy, nelerdin' hu'rmetli, nelerdin' haq, nelerdin' pa'k, nelerdin' unamlı, nelerdin' maqtawg'a turarlı, ja'ne de, nenin' jaqsı ha'm nenin' alg'ısqa ılayıqlı ekenin teren' oylan'lar.
9 Mennen nelerdi u'yrenip, qabıl etip, esitip ha'm ko'rgen bolsan'ız, solardı islen'ler. Sonda tınıshlıq beriwshi Qudaydın' O'zi sizler menen birge boladı.
10 Mag'an endi ja'ne g'amxorlıq ko'rsetip atırg'anın'ız ushın, men İyemizge alg'ıs aytıp, qattı quwanaman. A'lbette, sizler burın da mag'an g'amxorlıq qılıwdı oylaytug'ın edin'iz, biraq bug'an mu'mkinshilik joq edi.
11 Men bul so'zlerdi menin' bir mu'ta'jligim bolg'anlıqtan aytıp atırg'an joqpan. O'ytkeni men ha'r qanday jag'dayda da barıma qanaat etiwge u'yrengenmen.
12 Joqshılıqta da, molshılıqta da jasawdın' ne ekenin bilemen. Ha'r qanday awhalda da: toqshılıqta ha'm ashlıqta, molshılıqta ha'm mu'ta'jlikte jasawdın' sırın u'yrendim.
13 Mag'an ku'sh-quwat beretug'ın İysa Masix penen birge ha'mme na'rseni isley alaman.
14 Degen menen, sizler menin' qıyınshılıqlarımdı bo'lisip, jaqsı isledin'ler.
15 Ha'y filipliler, sizlerge birinshi ret Xosh Xabardı ja'riyalap, Makedoniyadan shıqqan waqtımda basqa ja'ma'a'tler emes, al tek sizler g'ana menin' menen alıs-beris qılg'anın'ızdı o'zlerin'iz de bilesizler.
16 Men Salonikada bolg'an waqtımda da sizler bir neshe ma'rtebe mag'an mu'ta'j na'rselerimdi jetkizdin'ler.
17 Men bunı sizlerden bir zat almaqshı bolıp emes, al sizlerdin' esabın'ızda ruwxıy jemis ko'beysin dep aytıp atırman.
18 Mende ha'mme na'rse bar, ha'tte, artıp ta atır. Epafrodit arqalı jibergen na'rselerin'izdi alg'anlıg'ım sebepli, hesh mu'ta'jligim qalmadı. Bul na'rseler – xosh iyisli tu'tetki ha'm Quday unatıp qabıl etetug'ın qurbanlıq.
19 Menin' Qudayım sizlerdin' ha'r bir mu'ta'jligin'izdi Masix İysa arqalı O'zinin' saltanatlı baylıg'ı menen qandıradı.
20 A'kemiz Qudayg'a ma'n'gige dan'q bolsın! Awmiyin.
21 Masix İysag'a tiyisli bolg'an barlıq iseniwshilerge sa'lem aytın'lar. Janımdag'ı tuwısqanlar sizlerge sa'lem aytıp atır.
22 Barlıq iseniwshiler, a'sirese Rim patshası-Qaysardın' sarayındag'ılar sizlerge sa'lem aytıp atır.
23 İyemiz İysa Masixtın' miyrimi ruwxın'ızg'a yar bolsın!
