Filipliler 3 bob
1 Tuwısqanlarım, juwmaqlap aytqanda, İyemiz benen qatnasta bolıp quwanın'lar. Sizlerge birdey na'rselerdi qaytalap jazıw meni zeriktirmeydi, ja'ne de bul sizler ushın zıyansız.
2 İyttey bolg'an jalg'an mug'allimlerden, jamanlıq islewshilerden, qutqarılıw ushın su'nnet etiliw tiyis, dewshilerden saq bolın'lar!
3 O'ytkeni bizler – ruwxıy su'nnet etilgen Qudaydın' xalqımız. Bizler Qudayg'a Onın' Ruwxı arqalı sıyınamız, Masix İysa menen maqtanıp, o'z shıg'ısımızg'a ha'm erisken na'rselerimizge su'yenbeymiz.
4 Negizinde men olarg'a su'yene alar edim. Eger basqa birew o'z shıg'ısıma ha'm erisken na'rselerime su'yeniwge da'lilim bar dep oylasa, meniki onıkinen de ko'birek:
5 men segiz ku'nlik waqtımda su'nnet etildim. İzrail xalqınan, Benamin urıwınan bolg'an nag'ız yahudiymen. Diniy nızam boyınsha pariseymen.
6 Diniy inta boyınsha iseniwshiler ja'ma'a'tin quwdalag'an ha'm diniy nızam talap etken haqlıq boyınsha kemshiliksiz adam edim.
7 Biraq, bir waqıtları a'hmiyetli dep bilgen bul na'rselerimdi endi Masix ushın paydasız dep esaplayman.
8 Awa, men ha'mme na'rseni İyem Masix İysanı biliwdin' artıqmashılıg'ı aldında paydasız dep sanayman. Ja'ne de, men Masix ushın ha'mme na'rseden bas tarttım ha'm Og'an erisip, Onın' menen birge bolıw ushın, ha'mmesin sıpırındı dep esaplayman.
9 Endi Muxaddes Nızamdı orınlawım arqalı alatug'ın o'z haqlıg'ıma emes, al Masixqa degen isenim arqalı beriletug'ın, yag'nıy Qudaydın' isenimimizge qaray beretug'ın haqlıg'ına iyemen.
10 Qa'ne endi, Masixtın' O'zin ha'm Onın' qayta tiriliwinin' ku'shin bilip alsam. Onın' azaplarına qatnasıp, o'limine de sherik bolsam.
11 Solay etip, tu'binde o'limnen qayta tiriliwge erissem.
12 Men bularg'a a'lle qashan eriskenim yamasa jetiskenim ushın aytıp atırg'an joqpan. Al, Masix meni qanday maqset ushın tan'lap alg'an bolsa, men sol maqsetke jetiwge tırısıp atırman.
13 Tuwısqanlar, men o'zimdi usı maqsetke jettim dep esaplamayman. Tek g'ana izde qalg'anlardı esten shıg'arıp, aldındag'ılarg'a umtılıp atırman.
14 Qudaydın' sıyına, Onın' Masix İysa arqalı shaqırg'an aspandag'ı o'mirine erisiw ushın, men belgilengen maqsetke jetiwge tırısıp atırman.
15 5Solay etip, aramızdag'ı isenimi jetisken adamlardın' ha'mmesi usı oypikirge iye bolsın. Eger sizler basqasha oylaytug'ın bolsan'ız, Quday sizlerge bunı da ashıp beredi.
16 Tek erisken haqıyqatımız boyınsha o'mir su'reyik.
17 Tuwısqanlarım, ha'mmen'iz birlikte mennen o'rnek alın'lar. Bizlerdin' sizlerge ko'rsetken o'rnegimiz boyınsha jasap atırg'anlarg'a dıqqat awdarıp, olardan u'lgi alın'lar.
18 Sizlerge ko'p ma'rte aytqanımday, ha'zir de ko'z jaslarımdı to'gip ta'kirarlap atırman: ko'p adamlar Masixtın' atanaq ag'ashtag'ı qurbanlıg'ın qabıl etpey, Onın' dushpanı bolıp jasamaqta.
19 Bundaylardın' ta'g'dirine nabıt bolıw jazılg'an bolıp, olardın' qudayı – o'z qulqını. Olar uyatsız qılıqları menen maqtanıp, tek bul du'nyanın' qızıg'ın g'ana oylaydı.
20 Biraq, bizin' watanımız aspanda. Bizler sol jerden Qutqarıwshımız bolg'an İyemiz İysa Masixtın' keliwin ku'tpektemiz.
21 Ha'mme na'rseni boysındıra alatug'ın qu'direti menen, Ol bizlerdin' ha'lsiz ha'm o'tkinshi denemizdi o'zgertip, O'zinin' ullı denesine uqsatadı.
