Filipliler 2 bob
1 Eger sizlerde Masixtan kelgen jiger, su'yispenshilikten payda bolg'an jubanısh, Muxaddes Ruwx penen qarım-qatnas, miyrimlilik ha'm rehimlilik bar bolsa,
2 onda bir pikir ha'm su'yispenshilik penen, bir ruwx ha'm maqset penen birlesip, menin' quwanıshımdı tolı qılın'.
3 Hesh bir na'rseni o'z ataq-abırayın'ızdı asırıw ushın yamasa maqtanshaqlıq penen islemen'ler. Al ha'r birin'iz kishipeyillik penen, basqalardı o'zin'izden u'stin dep esaplan'lar.
4 Tek o'zin'izdin' g'ana emes, al basqalardın' da paydasın go'zlen'ler.
5 Masix İysada bolg'an mına kishipeyillikke sizler de iye bolın'lar:
6 Masix qudaylıq ta'biyatqa iye bola tura, Qudayg'a ten' ataqtı alıwg'a umtılıwdı O'zine mina'sip ko'rmedi.
7 Al O'z ullılıg'ınan waz keship, qul kelbetin qabılladı. Ol adam bolıp tuwılıp, adam ko'rinisinde keldi.
8 Ol O'zin pa's tuttı ha'm o'limge, ha'tte, atanaq ag'ashtag'ı o'limge barıp, Qudayg'a boysındı.
9 Sonlıqtan da, Quday Onı en' biyik ma'rtebege eristirdi ha'm Og'an barlıq atlardan joqarı turatug'ın attı berdi.
10 Solay etip, İysanın' atı atalg'anda aspandag'ılardın', jerdegilerdin' ha'm jerdin' astındag'ılardın' barlıg'ı dize bu'gip,
11 Quday A'kenin' ullılanıwı ushın, ha'mme* İysa Masixtı İyemiz dep ashıq moyınlaydı.
12 Solay etip, su'yikli tuwısqanlarım, men janın'ızda bolg'anımda, sizler ba'rqulla Qudayg'a boysınatug'ın edin'ler. Al ha'zir janın'ızda joq waqtımda da burıng'ıdan ko'birek boysınıp, qorqınısh ha'm saqlıq penen, qutqarılıwın'ızg'a say is-ha'reketlerdi a'melge asıra berin'ler.
13 Sebebi O'zine unag'an islerdi qa'lewin'iz ha'm islewin'iz ushın, Qudaydın' O'zi sizlerge tu'rtki saladı.
14 Ha'r bir na'rseni ton'qıldamay ha'm tartıspay islen'ler!
15 Sonda sizler adasqan ha'm buzılg'an a'wlad arasında Qudaydın' kemshiliksiz, taza ha'm minsiz balaları bolasızlar.
16 Qudaydın' o'mir beretug'ın so'zlerin basqalarg'a jetkizip, du'nyadag'ı juldızlar sıyaqlı jarqıraysızlar. Solay etip, menin' jan-ta'nim menen qılg'an miynetim bosqa ketpey, Masixtın' qayta keletug'ın ku'ninde maqtana alaman.
17 Sizlerdin' isenim boyınsha bergen qurbanlıg'ın'ızdı ha'm etken xızmetin'izdi tolıqtırıw ushın, qanım qurbanlıq sharabı sıyaqlı to'giletug'ın bolsa da, men quwanaman ha'm ha'mmen'izdin' quwanıshın'ızdı bo'lisemen.
18 Sol sıyaqlı, sizler de quwanın'lar ha'm menin' quwanıshımdı bo'lisin'ler.
19 Hal-jag'dayın'ızdı bilip, menin' de kewlim jay tabıw ushın, İyemiz İysa qa'lese, Timofeydi jaqın arada sizlerge jiberiwden u'mit etemen
20 O'ytkeni ol sıyaqlı, shın ju'rekten sizlerdin' g'amın'ızdı oylaytug'ın menin' basqa adamım joq.
21 Ha'mme Masix İysanın' emes, al o'z ma'pin oylaydı.
22 Biraq Timofeydin' isenimli adam ekeni sizlerge ma'lim. Sebebi ol a'kesinin' janında xızmet etken ul sıyaqlı, Xosh Xabardın' ja'riyalanıwı ushın menin' qasımda xızmet etti.
23 Jag'dayımnın' qanday bolatug'ını belgili bolıwdan, onı da'rriw jiberiwden u'mit etemen.
24 İyemizge isenimim ka'mil, menin' o'zim de jaqın arada barıp qalaman.
25 Biraq, mu'ta'j bolg'anımda mag'an ja'rdem etiw ushın sizlerdin' jibergen elshin'iz, tuwısqanım, sherigim ha'm Xosh Xabar ushın sawashtag'ı joldasım Epafroditti sizlerge qaytarıp jiberiwdi maqul ko'rdim.
26 O'ytkeni ol ha'mmen'izdi sag'ınıp atır ha'm onın' awırıp qalg'anı haqqında xabar tapqanın'ız sebepli, qattı uwayımladı.
27 Ol haqıyqattan da, o'lim to'seginde jattı. Degen menen, Quday og'an, tek og'an emes, al qayg'ı u'stine qayg'ı shekpewim ushın mag'an da rehimlilik etti.
28 Sonlıqtan onı ja'ne ko'rip quwanıwın'ız ushın ha'm menin' qayg'ılarım da jen'illesiwi ushın, onı qattı asıg'ıslıq penen janın'ızg'a jiberip atırman.
29 Onı İyemizdin' atınan u'lken quwanısh penen qarsı alın'lar ha'm usınday adamlardı hu'rmet etin'ler.
30 Sebebi sizlerdin' mag'an ete almag'an xızmetin'izdi etiw ushın, ol o'z janın qa'wip astına qoyıp, Masixtın' isi ushın bir o'limnen qaldı.
