Filipliler 1 bob
1 Masix İysanın' qulları bolg'an bizler, Pavel ha'm Timofeyden, Filip qalasındag'ı İysa Masixqa tiyisli bolg'an barlıq muxaddeslerge,
2 A'kemiz Quday ha'm İyemiz İysa Masix sizlerge miyrim ha'm tınıshlıq bersin!
3 Sizlerdi ha'r sapar eske alg'anımda, Qudayg'a shu'kirlik bildirip atırman.
4 Men Qudayg'a duwa etkenimde, sizler ushın ha'r qashan quwanısh penen sorayman.
5 Sebebi sizler bastan baslap ha'zirgi waqıtqa deyin Xosh Xabardı ja'riyalawg'a u'les qosıp kelmektesizler.
6 Sizlerdin' aran'ızda jaqsı isti baslag'an Qudaydın' bunı Masix İysanın' ku'nine shekem tolıq tamamlaytug'ınına anıq isenemen.
7 Ha'mmen'iz tuwralı usınday pikirde bolıwım orınlı, o'ytkeni sizler ha'mme waqıt menin' ju'regimdesiz. Men tutqın bolsam da, Xosh Xabardı jaqlasam da ha'm onın' haqıyqatın turaqlılıq penen da'lillesem de, ha'mmen'iz menin' menen birlikte Qudaydın' miyrimin bo'lisip kelmektesiz.
8 Sizlerdin' ha'mmen'izdi Masix İysanın' su'yispenshiligi menen qalay sag'ıng'anıma Qudaydın' O'zi gu'wa.
9 Su'yispenshiligin'iz tolıq bilim ha'm teren' tu'simpazlıq penen o'sip arta beriwi ushın duwa etip atırman.
10 Solay etip, sizler Masixtın' keletug'ın ku'ninde pa'k ha'm minsiz bolıwın'ız ushın, en' joqarı iygiliktin' ne ekenin ayıra alasızlar.
11 Ja'ne de, Qudaydı ullılap, alg'ıs-maqtawlar aytıwın'ız ushın, İysa Masix arqalı haqıyqatlıq jemisine bay bolasızlar.
12 Tuwısqanlarım, mınanı biliwin'izdi qa'leymen: menin' basımnan keshirgenlerim Xosh Xabardın' ja'ne de ko'birek jayılıwına haqıyqattan da ja'rdem etti.
13 Menin' Masix ushın tutqın bolg'anım pu'tkil saray saqshılarına ha'm qalg'an ha'mme adamlarg'a ma'lim boldı.
14 Sondayaq, menin' tutqınlıg'ım sebepli, ko'pshilik tuwısqanlarımızdın' İyemizge degen isenimi bekkemlenip, olar Qudaydın' so'zin qorqpastan aytıwg'a burıng'ıdan da ko'birek batırlıq ko'rsetpekte.
15 Durıs, geybirewler Masix haqqında ku'nshillik penen, jarıspaqqa ja'riyalasa, al bazılar jaqsı niyet penen ja'riyalamaqta.
16 Usı keyingiler menin' bul jerge Xosh Xabardın' qorg'awshısı etip qoyılg'anımdı bilip, bunı su'yispenshilik penen islep atır.
17 Al aldın'g'ıları menin' tutqınlıq awhalımdı ele de awırlastırmaqshı bolıp, Masix haqqında o'zlerinin' ataq-abırayları ushın napa'k niyet penen ja'riyalamaqta.
18 Biraq, solay bolsa ne bolıptı? Meyli, jaman niyet penen bolsın, meyli, haq niyet penen bolsın, Masix haqqında qanday jol menen ja'riyalansa da, men bug'an quwanaman.
19 Sebebi sizlerdin' etken duwaların'ızdın' ha'm İysa Masixtın' Ruwxının' ja'rdemi menen, bul awhalımnan azat bolatug'ınımdı bilemen.
20 Qanday jag'day bolsa da, men Masixtan arlanbawdı qa'leymen. Tiri bolsam da, o'lsem de, ha'r qashan bolıp kelgenindey, ha'zir de Masixtı pu'tkil barlıg'ım menen ullılaw ushın tolıq batırlıq ko'rsetiwden bekkem u'mit etemen.
21 O'ytkeni menin' ushın o'mirimnin' ma'nisi – bul Masix, al o'lim utıs demek.
22 Biraq, eger bul du'nyada o'mir su'riwim arqalı o'nimli miynet etsem, onda neni tan'lawdı bilmeymen.
23 Meni eki ta'rep te o'zine tartadı. Bul du'nyadan ketip, Masix penen birge bolıwdı qa'leymen. Sebebi bul anag'urlım jaqsıraq.
24 Biraq, bul du'nyada qalıwım sizler ushın kereklirek.
25 Bug'an ko'zim jetkenlikten, qalatug'ınımdı bilemen. İsenimde o'sip quwanıwın'ız ushın, ha'mmen'iz benen birge bolaman.
26 Solay etip, ja'ne janın'ızg'a kelgenimde, Masix İysa aldında menin' menen ele de ko'birek maqtana alasızlar.
27 Tek jasap atırg'an o'mirin'iz Masixtın' Xosh Xabarına ılayıqlı bolsın. Sonda kelip sizlerdi ko'rsem de, alısta bolıp hal-jag'dayın'ızdı esitsem de, sizlerdin' bir ruwxta bekkem turg'anın'ızdı, Xosh Xabarg'a degen isenim ushın bir jan, bir ta'n bolıp gu'resip atırg'anın'ızdı bileyin.
28 Ja'ne de, o'zlerin'izge qarsı shıqqanlardan hesh qorqpaytug'ının'ızdı da esiteyin. Sizlerdin' bunday batırlıg'ın'ız olardın' nabıt bolatug'ınının', al sizlerdin' qutqarılatug'ının'ızdın' belgisi ha'm Qudaydın' isi.
29 O'ytkeni Quday Masix ushın, sizlerge Og'an tek iseniwdi emes, al Ol ushın azap shegiwdi de ayrıqsha huqıq etip bergen.
30 Usı azaptı basımnan keshirgenimdi sizler ko'rdin'ler ha'm ha'zir de azap shegip atırg'anımdı esitip atırsızlar. Menin' bul gu'resime sizler de sheriksizler.
