Galatiyalılar 6 bob
1 Tuwısqanlar! Eger birewdin' gu'na islegeni ma'lim bolıp qalsa, Muxaddes Ruwxqa boysınıp jasap atırg'an sizler bunday adamdı mu'la'yimlik penen tuwrı jolg'a salın'lar. Sizler de azg'ırılmawın'ız ushın o'zlerin'izge saq bolın'lar.
2 Bir-birin'izdin' awırmanlıg'ın'ızdı ko'terin'ler. Sonda Masixtın' Nızamın orınlaysızlar.
3 Eger kim de kim hesh na'rse bolmasa da, o'zin a'hmiyetli adam dep esaplasa, o'z-o'zin aldag'an boladı.
4 Ha'r bir adam o'z is-ha'reketin tekserip ko'rsin. Sonda o'zin basqalar menen salıstırmay, o'z tabısları menen maqtana aladı.
5 Sebebi ha'r bir adam o'z awırmanlıg'ın o'zi ko'teriwi tiyis.
6 Qudaydın' so'zin u'yreniwshi ustazı menen barlıq iygilikli na'rselerdi bo'lissin.
7 O'z-o'zin'izdi aldaman'lar, Qudaydı aldaw mu'mkin emes. Adam ne ekse, sonı oradı.
8 O'zinin' gu'nakar ta'biyatına boysınıwshı sol ta'biyatqa ta'n o'lim aladı. Muxaddes Ruwxqa boysınıwshı Muxaddes Ruwxqa ta'n ma'n'gilik o'mirdi aladı.
9 Solay eken, jaqsılıq islewden jalıqpan'lar. Eger ha'lsizlenip qalmasaq, waqtı kelgende jemisin orıp alamız.
10 Sonlıqtan mu'mkinshiligimiz bar eken, ha'mme adamg'a, a'sirese iseniwshi tuwısqanlarımızg'a jaqsılıq isleyik.
11 Qaran'lar, o'z qolım menen sizlerge qanday u'lken ha'ripler menen jazıp atırman!
12 Sırtqı ko'rinisi menen adamlarg'a unag'ısı kelgenler Masixtın' atanaq ag'ashı sebepli quwdalanbaw ushın, sizlerdi su'nnet etiliwge ma'jbu'rlemekte.
13 Biraq, su'nnet etilgenlerdin' o'zleri de Muxaddes Nızamdı orınlamaydı. Olar tek sizlerdin' denelerin'iz benen maqtanıw ushın g'ana su'nnet etiliwin'izdi qa'lep atır.
14 Al men İyemiz İysa Masixtın' atanaq ag'ashınan basqa bir na'rse menen hesh qashan maqtanbayman. Usı atanaq ag'ash arqalı du'nya men ushın o'lgen, men de du'nya ushın o'lgenmen.
15 Su'nnetli bolıw yamasa bolmaw a'hmiyetli emes, a'hmiyetlisi – jan'a jaratılıs bolıw.
16 Usınday qag'ıyda boyınsha jasap atırg'anlardın' ha'mmesine, yag'nıy Qudaydın' xalqına tınıshlıq ha'm miyrim-sha'pa'a't bolsın!
17 Endigiden bılay, hesh kim mag'an ja'bir bermesin. O'ytkeni menin' denemde İysanın' jaraqatlarının' izleri bar.
18 Ha'y, tuwısqanlar! İyemiz İysa Masixtın' miyrimi ruwxın'ızg'a yar bolsın! Awmiyin.
