Galatiyalılar 5 bob
1 Masix bizlerdi erkin o'mir su'riwimiz ushın azat qıldı. Sonlıqtan bekkem turın'lar, o'zlerin'izge qaytadan qullıq moyıntırıg'ın salıwg'a jol qoyman'lar.
2 Qaran'lar! Men, Pavel, sizlerge mınalardı aytıp atırman: eger su'nnet etilsen'iz, Masixtın' sizlerge hesh paydası joq.
3 Su'nnet etilgen ha'r bir adamdı ja'ne eskertip atırman: ol pu'tkil Muxaddes Nızamdı orınlawg'a parızlı.
4 Muxaddes Nızamdı orınlaw arqalı aqlanıwg'a tırısıp atırg'an sizler Masixtan ayırıldın'lar. Qudaydın' miyriminen alısladın'lar.
5 Biraq bizler Muxaddes Ruwx sebepli isenim arqalı aqlanıwdan u'mit etip, intizarlıq penen ku'tpektemiz.
6 İysa Masixqa isenetug'ınlar ushın su'nnetleniwdin' de, su'nnetlenbewdin' de hesh qanday a'hmiyeti joq. Tek su'yispenshilik penen ha'reket etken isenim g'ana a'hmiyetli.
7 Sizler jaqsı baratır edin'ler. Haqıyqatqa boysınıwdı dawam etiwden sizlerdi kim aynıttı?
8 Bunday aynıtıw sizlerdi shaqırg'an Quday ta'repinen bolmadı.
9 Az g'ana ashıtqı pu'tkil qamırdı ashıtadı.
10 Sizlerdin' basqasha pikir ju'rgizbeytug'ının'ızg'a İyem İysa aldında isenimim ka'mil. Biraq, sizlerdin' aqılın'ızdı shatastırg'an kim bolıwına qaramay, jazasın tartadı.
11 Mag'an keletug'ın bolsaq, tuwısqanlarım, eger elege deyin su'nnettin' kerek ekenligin ja'riyalap kelgenimde, quwdalanar ma edim? Eger olay bolg'anda, atanaq ag'ash haqqında aytqan wazlarım sebepli mashqala tuwılmas edi.
12 Qa'ne endi, sizlerdi u'gitlep atırg'anlardın' ha'mmesi o'zlerin aqta etse!
13 Tuwısqanlar! Quday sizlerdi azat bolıwg'a shaqırg'an. Tek azatlıg'ın'ızdı o'z ta'biyatın'ızdın' qa'lewlerinin' qurbanı qılman'. Onın' ornına bir-birin'izge su'yispenshilik penen xızmet etin'ler.
14 Pu'tkil Muxaddes Nızam bir so'zde ja'mlengen: «O'zin'di qalay su'ysen', janın'dag'ı adamdı da solay su'y».
15 Biraq bir-birin'iz benen tislesip, bir-birin'izdi jesen'ler, onda bir-birin'izdi joq etiwden abaylı bolın'lar!
16 Ja'ne aytajag'ım mınaw: Muxaddes Ruwxqa boysınıp jasan'lar! Sonda o'z ta'biyatın'ızdın' jaman qa'lewlerine hesh qashan boysınbaysızlar.
17 O'ytkeni adam ta'biyatının' jaman qa'lewleri Muxaddes Ruwxqa, Muxaddes Ruwx adam ta'biyatının' jaman qa'lewlerine qarsı. Olar birbirine qarsı bolg'anlıqtan, sizler islewdi qa'legen na'rselerin'izdi isley almaysızlar.
18 Al eger sizler Muxaddes Ruwxtın' jetelewi menen ju'rsen'ler, onda Muxaddes Nızam astında emessizler.
19 Adamnın' gu'nakar ta'biyatının' isleri ayan, olar: neke hadallıg'ın buzıw, haramılıq, buzıqshılıq,
20 butparazlıq, sıyqırshılıq, dushpanlıq, ja'njelkeshlik, ku'nshillik, g'a'zep, menmenlik, alawızlıq tuwdırıw, bo'liniw,
21 qızg'anshaqlıq, ma'sku'nemshilik, ayshı-a'shiret ha'm usılarg'a uqsag'an na'rseler. Sizlerdi aldın eskertkenimdey, ja'ne eskertip atırman: usınday is-ha'reketti islewshiler Qudaydın' Patshalıg'ın miyras etip almaydı.
22 Biraq, adam o'mirinde jetistiretug'ın Muxaddes Ruwxtın' jemisi – su'yispenshilik, quwanısh, tınıshlıq, sabırlılıq, miyrimlilik, qayırqomlıq, sadıqlıq,
23 mu'la'yimlilik ha'm o'zin tutıp biliw. Bunday islerge qarsı hesh qanday nızam joq.
24 İysa Masixqa tiyisli bolg'anlar o'z ta'biyatın qa'lewleri ha'm na'psileri menen birlikte atanaq ag'ashqa shegelep qoyg'an.
25 Muxaddes Ruwx o'mirimizdin' tiykarı bolg'anlıqtan, Onın' jetelewi menen ju'reyik.
26 Dan'qparaz bolmayıq, bir-birimizdin' ashıwımızg'a tiyip, ku'nshillik etpeyik.
