Galatiyalılar 4 bob
1 Ja'ne aytajag'ım mınaw: miyrasxor ha'mme na'rsenin' iyesi bolsa da, bala waqtında onın' quldan ayırmashılıg'ı joq.
2 Ol a'kesinin' belgilegen waqtına deyin ta'rbiyashılar menen u'y basqarıwshısının' baqlawı astında boladı.
3 Usı sıyaqlı, bizler de balalıq waqtımızda, yag'nıy haqıyqatlıqtı tolıq tu'sinbegen waqtımızda du'nyanın' ma'nissiz qag'ıydalarının' qulı edik.
4 Biraq waqtı kelgende, Quday O'z Ulın jiberdi.
5 Ol Muxaddes Nızamnın' qulı bolg'anlardın' qutqarılıwı ushın ha'm bizlerdin' Qudaydın' balaları bolıwımız ushın hayaldan tuwılıp, Muxaddes Nızamg'a boysınıp jasadı.
6 Sizler endi Qudaydın' balaları boldın'lar. Sonlıqtan Ol O'z Ulının' Ruwxın ju'reklerin'izge jiberdi. Usı Ruwx arqalı sizler Qudaydı: «A'ke, A'kejanım!» dep shaqırıwın'ızg'a boladı.
7 Sol sebepten sen endi qul emessen', al Qudaydın' perzentisen'. Qudaydın' perzenti bolg'anın' ushın, Quday seni miyrasxor etti.
8 Burın sizler Qudaydı bilmey, negizi Quday bolmag'an na'rselerge qul boldın'lar.
9 Endi bolsa, Qudaydı bilip aldın'lar, tuwrırag'ı, sizlerdi Quday tanıydı. Solay eken, nege endi ja'ne du'nyanın' ha'lsiz ha'm qa'dirsiz qag'ıydalarına qaytıp baratırsızlar. Qaytadan ja'ne olardın' qulları bolmaqshımısızlar?
10 Ku'nler, aylar, ma'wsimler ha'm jıllardı belgileysizler.
11 Sizler ushın biykarg'a miynet ettim be, dep ta'shiwishtemen.
12 Tuwısqanlarım! Sizlerden o'tinish etemen, men sıyaqlı bolın'lar. Sebebi men de sizler sıyaqlı boldım. Sizler mag'an hesh qanday jamanlıq islemedin'ler.
13 Xosh Xabardı sizlerge birinshi ma'rte den-sawlıg'ımnın' ha'lsizligi sebepli ja'riyalag'anımnan xabarın'ız bar.
14 Menin' densawlıg'ımnın' jag'dayı sizler ushın bir sınaq bolsa da, menmensip, mag'an ta'kabbirlik etpedin'ler. Kerisinshe, meni Qudaydın' bir perishtesindey, ha'tte, İysa Masixtay qabıl ettin'ler.
15 Endi sol quwanıshın'ız qayaqta?! Sizlerge o'zim gu'waman: qolların'ızdan kelse, ko'zlerin'izdi oyıp, mag'an berer edin'ler.
16 Endi sizlerge haqıyqattı aytaman dep, dushpanın'ız boldım ba?
17 Muxaddes Nızamdı orınlawdı talap etkenler sizlerdi o'z ta'repine awdarıwg'a tırısıp atır, biraq bul jaqsı niyet emes. O'zlerine bag'ınıwg'a tırısıwın'ız ushın, olar sizlerdi bizlerden ayırmaqshı.
18 Jaqsı niyet penen tırısıw – bul jaqsı na'rse. Bul tek men sizlerdin' aran'ızda bolg'anımda emes, al ba'rqulla usılay bolsa jaqsı.
19 Balalarım! Masix sıyaqlı bolmag'anın'ızsha, men sizlerdi qaytadan tuwıp atırg'anday, tolg'aq azabın shekpektemen.
20 Ha'zir janın'ızda bolıp, dawısımdı mu'la'yim qılıp o'zgertsem edi. O'ytkeni sizlerdi ne qılarımdı bilmey, an'-tan' bolıp turman.
21 Muxaddes Nızam astında jasawdı qa'legen sizler mag'an aytın'larshı, Muxaddes Nızamnın' ne deytug'ının bilmeysizler me?
22 Sebebi İbrayımnın' eki ulı boldı: birewi shorı hayaldan, ekinshisi azat hayalınan edi, dep jazılg'an.
23 Shorı hayaldan bolg'an ulı a'piwayı jol boyınsha, al azat hayaldan bolg'an ulı wa'de boyınsha tuwıldı.
24 Bunda tımsal ma'nisi bar. Bul eki hayal eki kelisimdi an'latadı. Birewi qullıqta bolatug'ın balalardı tuwatug'ın Ajar – Sinay tawında du'zilgen kelisimnin' tımsalı.
25 Arabstandag'ı Sinay tawının' tımsalı bolg'an Ajar ha'zirgi Erusalimdi an'latadı. O'ytkeni bul qala o'z xalqı menen ele de Muxaddes Nızamnın' qullıg'ında.
26 Biraq, aspandag'ı Erusalimnin' tımsalı bolg'an Sara azat, ol bizlerdin' anamız.
27 Sebebi bılay dep jazılg'an: «Ha'y, bala tuwmaytug'ın na'silsiz hayal shad bol! Tolg'aq azabın bilmeytug'ın hayal, Dawısın'dı ko'terip, baqır! O'ytkeni jalg'ız baslı hayaldın' balaları, Ku'yewi bar hayaldın' balalarınan ko'p».
28 Tuwısqanlar! Sizler de Isaq sıyaqlı wa'de boyınsha tuwılg'an balalarsız.
29 A'piwayı jol menen tuwılg'an Muxaddes Ruwxtın' wa'desi boyınsha tuwılg'andı qalay quwdalag'an bolsa, ha'zir de solay bolıp atır.
30 Biraq, Muxaddes Jazıw ne deydi? «Shorını ha'm onın' balasın quwıp jiber, Sebebi shorının' ulı, Azat hayaldın' ulı menen birlikte, Miyrasqa sherik bola almaydı» .
31 Solay etip, tuwısqanlar, bizler shorı hayaldın' emes, al azat hayaldın' balalarımız.
