Galatiyalılar 3 bob
1 Ha'y, aqılsız galatiyalılar! Sizlerdi kim sıyqırlap tasladı? İysa Masixtın' atanaq ag'ashqa shegelenip qoyılg'anı ko'z aldın'ızdan ketpestey etip su'wretlenip berilgen joq pa edi?
2 Sizlerden bir na'rseni g'ana bilmekshimen: sizler Muxaddes Ruwxtı qalay aldın'lar? Muxaddes Nızamdı orınlap pa yamasa o'zlerin'iz esitken Xosh Xabarg'a isenip pe?
3 Sizler sonshelli aqılsız bolg'anın'ız ba? Muxaddes Ruwx penen baslap, endi nege adamnın' is-ha'reketi menen minsizlikke erisiwge tırısıp atırsızlar?
4 Biykarg'a sonsha azap shektin'iz be?! Haqıyqattan da, biykarg'a ma?!
5 Sizlerge Muxaddes Ruwxın bergen ha'm aran'ızda ka'ramatlar ko'rsetken Quday bunı Muxaddes Nızamdı orınlag'anın'ız ushın islep atır ma yamasa o'zlerin'iz esitken Xosh Xabarg'a isengenin'iz ushın ba?
6 İbrayımnın' mısalın alıp qarayıq: «Ol Qudayg'a isendi ha'm sol sebepten Quday onı aqlang'an dep sanadı».
7 Solay etip, mınanı bilip qoyın'lar: isengenlerdin' ha'mmesi İbrayımnın' haqıyqıy urpaqları boladı.
8 Muxaddes Jazıw Qudaydın' basqa milletlerdi isenimi arqalı aqlaytug'ının boljap, İbrayımg'a: «Barlıq xalıqlar sen arqalı jarılqanadı» , – dep quwanıshlı xabardı aldın ala jibergen edi.
9 Solay etip, isengenler iseniwshi İbrayım menen birge jarılqanadı.
10 Muxaddes Nızamdı orınlawı arqalı aqlanatug'ınına isenetug'ınlardın' ha'mmesine na'let jawadı. O'ytkeni Muxaddes Nızamda bılay dep jazılg'an: «Muxaddes Nızam kitabında jazılg'an ha'mme na'rseni ba'rqulla orınlap jasamaytug'ın ha'r bir adam na'letiy boladı».
11 Muxaddes Nızamdı orınlawı arqalı hesh bir adam Quday aldında aqlana almaytug'ını anıq. Sebebi: «İsenimi menen aqlang'an jasaydı» , – dep jazılg'an
12 Muxaddes Nızamnın' tiykarı isenim emes. Kerisinshe: «Muxaddes Nızamda buyırılg'anlardı orınlag'an olar arqalı jasaydı» , – dep jazılg'an.
13 Masix bizler ushın na'letlengenlikten, Qudaydın' İbrayımg'a bergen jarılqawı Masix İysa arqalı basqa milletlerge nesip etedi ha'm bizler wa'de etilgen Muxaddes Ruwxtı isenimimiz arqalı alamız.
14 Masix bizlerdi Muxaddes Nızamnın' na'letinen qutqardı. O'ytkeni: «Ag'ashqa asılg'an ha'r bir adam na'letiy» , – dep jazılg'an.
15 Tuwısqanlarım! Adamlar o'mirinen mısal keltireyin: adamlar arasında du'zilgen kelisimdi biykarlawg'a yamasa og'an bir na'rse qosıwg'a bolmaydı.
16 Quday İbrayımg'a ha'm onın' urpag'ına wa'de bergende: «senin' urpag'ın'nan bolg'anlarg'a» dep ko'p adamlardı na'zerde tutıp aytqan joq, al «senin' urpag'ın'nan bolg'ang'a» dep, tek bir adamdı, yag'nıy İysa Masixtı na'zerde tutıp aytqan edi
17 Menin' aytajag'ım mınaw: to'rt ju'z otız jıldan son' payda bolg'an Muxaddes Nızam Qudaydın' aldın ala du'zgen kelisimin biykarlap, wa'desinin' ku'shin joq qılmaydı.
18 Sebebi eger Qudaydın' bergen miyrası Muxaddes Nızamdı orınlaw arqalı berilgende, onda ol wa'de boyınsha bolmaydı. Biraq Quday miyrastı İbrayımg'a wa'de boyınsha berdi.
19 Onday bolsa, Muxaddes Nızam ne ushın berilgen? Ol gu'nalarımızdı ashıp ko'rsetiw ushın, kelisimge qosımsha etip berilgen. O'zi Qudaydın' wa'desi ha'm İbrayımnın' urpag'ı bolg'an Masix kelgenge deyin g'ana Muxaddes Nızam ha'reket etedi. Ol perishteler arqalı ta'welleshinin' qolı menen berilgen edi.
20 Al ta'welleshi tek bir ta'repke tiyisli emes. Biraq Quday – jalg'ız.
21 Olay bolsa, Muxaddes Nızam Qudaydın' wa'delerine qarsı ma? Hesh qashan! O'ytkeni eger de o'mir bere alatug'ın nızam berilgen bolsa, onda adamlar, a'lbette, nızam arqalı aqlanar edi.
22 Biraq, İysa Masixqa degen isenimge tiykarlang'an wa'de isengenlerge beriliw ushın, Muxaddes Jazıw pu'tkil barlıqtı gu'nanın' tutqını dep ja'riyaladı.
23 Bul isenim payda bolıwdan aldın bizler Muxaddes Nızamnın' baqlawı astında bolıp, keleshek isenimnin' ayqınlasıwına shekem Muxaddes Nızamnın' tutqını edik.
24 Basqasha aytqanda, isenim arqalı aqlanıwımız ushın, Masix keliwge deyin Muxaddes Nızam ta'rbiyashımız boldı.
25 Biraq isenim payda bolg'annan son', bizler endi ta'rbiyashımız bolg'an Muxaddes Nızamnın' qol astında emespiz.
26 Sebebi Masix İysag'a isengenin'iz ushın, ha'mmen'iz Qudaydın' balalarısız.
27 Suwg'a shomıldırılg'anda Masix penen birlesip, ha'r birin'iz Masix sıyaqlı boldın'lar.
28 Endigiden bılay, yahudiy menen grektin', qul menen azat adamnın', erkek penen hayaldın' arasında hesh qanday ayırmashılıq joq. O'ytkeni ha'mmen'iz Masix İysada birsiz.
29 Eger Masixqa tiyisli bolsan'ız, onda İbrayımnın' urpag'ısız, Qudaydın' wa'desi boyınsha miyrasxorlarsız.
