Galatiyalılar 1 bob
1 Adamlar ta'repinen yamasa adamlar arqalı emes, al İysa Masix ha'm Onı o'limnen tiriltken A'kemiz Quday ta'repinen elshi bolıp tayınlang'an men,
2 Pavelden ha'm menin' menen birge bolg'an barlıq tuwısqanlardan, Galatiyadag'ı iseniwshi ja'ma'a'tlerge sa'lem!
3 A'kemiz Quday ha'm İyemiz İysa Masix sizlerge miyrim ha'm tınıshlıq bersin!
4 A'kemiz Qudaydın' erki boyınsha, İysa Masix bizlerdi ha'zirgi jawız zamannan qutqarmaqshı bolıp, gu'nalarımız ushın O'zin qurban etti.
5 Qudayımızg'a ma'n'gige dan'q bolsın! Awmiyin.
6 Sizlerdi Masixtın' miyrimi arqalı shaqırg'an Qudaydan sonshelli tez ju'z burıp, basqa bir «xosh xabar» g'a awıp ketkenin'izge hayranman.
7 Negizinde basqa bir «xosh xabar» joq. Al, sizlerdin' aqılın'ızdı shatastırıp, Masixtın' Xosh Xabarın burmalamaqshı bolıp atırg'anlar g'ana bar.
8 Biraq eger de bizler yamasa aspannan bir perishte kelip, o'zlerimiz sizlerge aytqan Xosh Xabarg'a qarsı «xosh xabar» ja'riyalap atırg'an bolsa, ol Qudaydın' g'arg'ısına ushırasın!
9 Burın aytqanımızdı ja'ne qaytalap aytaman: eger kim de kim sizler qabıl etken Xosh Xabarg'a qarsı bir «xosh xabar» dı ja'riyalap atırg'an bolsa, ol Qudaydın' g'arg'ısına ushırasın!
10 Endi men adamlardın' maqtawın qa'lep atırman ba yamasa Qudaydın' ba? Ya bolmasa, adamlarg'a jag'ınıwg'a tırısıp atırman ba? Eger elege deyin adamlarg'a jag'ınbaqshı bolg'anımda, onda men Masixtın' xızmetshisi bola almas edim.
11 Tuwısqanlarım, men ja'riyalag'an Xosh Xabardı adam oylap shıg'armag'anın biliwin'izdi qa'leymen.
12 Men bul Xosh Xabardı adamnan qabıl etpedim ha'm hesh kimnen u'yrenbedim. Onı mag'an İysa Masixtın' O'zi ayan arqalı bildirdi.
13 Men yahudiy dininde bolg'anımda, qalay o'mir su'rgenim haqqında esitkensizler. Qudaydın' ja'ma'a'tin ayawsız quwdalap, onı qurtıwg'a tırısatug'ın edim.
14 Yahudiy dininde o'z milletimdegi ko'p qatarqurbılarımnan ozıp, ata-babalarımızdın' u'rp-a'detlerin orınlawg'a janta'nim menen g'ayrat salatug'ın edim.
15 Biraq meni anamnın' qarnında bolg'anımda-aq tan'lap, O'z miyrimi menen shaqırg'an Quday basqa milletler arasında Xosh Xabardı ja'riyalawım ushın, mag'an Ulın ashıp bildiriwge ırazı boldı.
16 Sonda men adamlar menen ma'sla'ha'tlesip otırmadım.
17 Erusalimge, yag'nıy mennen burın elshi bolg'anlarg'a da barmadım. Al da'rhal Arabstang'a ketip, keyin ja'ne Damaskqa qaytıp keldim.
18 Son'ınan u'sh jıl keyin Petr menen tanısıw ushın Erusalimge bardım. Onın' janında on bes ku'n boldım.
19 Biraq, basqa elshilerdin' hesh birin ko'rmedim, tek İyemiz İysanın' inisi Yaqıptı g'ana ko'rdim.
20 Sizlerge jazıp atırg'anlarımnın' o'tirik emes ekenligin Qudaydın' aldında bildirip atırman.
21 Bunnan son', men Siriya ha'm Kilikiya u'lkelerine kettim.
22 Al Yahudiyadag'ı Masixqa tiyisli ja'ma'a'tler meni ju'zbe-ju'z tanımaytug'ın edi.
23 Olar tek: «Bir waqıtları bizlerdi quwdalag'an adam burın o'zi joq qılmaqshı bolg'an isenim haqqında endi o'zi ja'riyalap ju'r», – degendi esitip,
24 men ushın Qudaydı alg'ıslag'an edi.
