2 Korinfliler 4 bob
1 Sonlıqtan biz xızmetshiler bul xızmetti Qudaydın' miyrimsha'pa'a'ti menen islep atırg'anımız sebepli, ruwxımızdı tu'sirmeymiz.
2 Bizler jasırın ha'm uyat islerimizdi tasladıq, hiylekerlik penen ha'reket qılmaymız. Qudaydın' so'zin burmalamay, haqıyqattı ashıq aytıwımız arqalı o'zimizdi Quday aldında ha'r bir adamnın' hu'jdanına tapsıramız.
3 Eger bizler ja'riyalap atırg'an Xosh Xabar jabıq bolsa, ol nabıt bolatug'ınlar ushın jabıq boladı.
4 senbeytug'ın bunday adamlar Xosh Xabardın' jaqtısın ko'rmesin dep, bul du'nyanın' ha'kimi – shaytan olardın' ju'rek ko'zlerin soqır etken. Xosh Xabar Qudaydın' qanday ekenin ko'rsetken Masixtın' dan'qın bildiredi.
5 Bizler o'zlerimiz haqqında ja'riyalap atırg'an joqpız. Al Masix İysanı ha'mmemizdin' İyemiz dep, İysa ushın sizlerdin' xızmetshilerin'iz ekenligimiz haqqında ja'riyalap atırmız.
6 Sebebi «Qaran'g'ılıqtan nur jarqırasın», – dep buyırg'an Quday Masixtın' ju'zinde jarqırag'an O'zinin' dan'qın biliwimiz ushın ju'reklerimizdi jaqtı qıldı.
7 Biz elshiler usı g'a'ziyneni ılay ıdıs sıyaqlı bolg'an denemizde alıp ju'rmiz. Bul ullı qu'direttin' bizlerden emes, al Qudaydan ekenligi ko'rinip tur.
8 Bizler ha'r ta'repleme qısqıdamız, biraq ezilmeymiz. Albıraymız, biraq u'mitsizlikke berilmeymiz.
9 Quwdalanamız, biraq Quday bizlerdi taslap ketpeydi. Bizlerdi jıg'ıltadı, biraq joq bolıp ketpeymiz.
10 İysanın' o'miri denemizde ashıq ko'rinsin dep, bizler ba'rqulla azap shegip, İysanın' o'limine sherik bolamız.
11 O'ytkeni İysanın' o'miri bizin' o'letug'ın denemizde ashıq ko'rinsin dep, jasap atırg'an bizler İysa ushın o'lim qa'wpine u'zliksiz duwshar bolıp atırmız.
12 Solay etip, bizlerdin' o'lim qa'wpine duwshar bolıp atırg'anımız arqalı sizler ma'n'gilik o'mirge erisip atırsızlar.
13 Zaburda: «Men isendim ha'm sonın' ushın so'yledim», – dep jazılg'an. Usınday isenimdi payda etken Muxaddes Ruwxqa iye bolg'anımız sebepli, bizler de isenemiz ha'm sonlıqtan so'yleymiz.
14 Sebebi İyemiz İysanı o'limnen tiriltken Qudaydın' bizlerdi de İysa menen birge tiriltetug'ının ha'm sizler menen birlikte O'zinin' aldında turg'ızıp qoyatug'ının bilemiz.
15 Bulardın' ha'mmesi sizlerdin' paydan'ız ushın bolıp atır. Solay etip, bizlerdin' basımızdan keshirgen qıyınshılıqlarımız sebepli, Qudaydın' sizlerge degen miyrimi artadı. Sol miyrim ele de ko'p adamlarg'a jetip barıwı arqalı Qudayg'a ko'p shu'kirlikler aytıladı ha'm Ol dan'qqa bo'lenedi.
16 Sonlıqtan ruwxımızdı tu'sirmeymiz. Bizlerdin' ko'rinetug'ın denemiz tozıp baratırg'an bolsa da, ishki du'nyamız ku'nnen-ku'nge jan'alanıp atır.
17 O'ytkeni ha'zirgi o'tkinshi ha'm arzımas qıyınshılıqlarımız bizlerge ha'dden tıs ullı ha'm ma'n'gilik dan'q alıp keledi.
18 Bizler ko'zge ko'rinetug'ın qıyınshılıqlarg'a emes, al ko'zge ko'rinbeytug'ın ullılıqqa qaraymız. Sebebi ko'zge ko'rinetug'ın na'rseler o'tkinshi, al ko'zge ko'rinbeytug'ın na'rseler ma'n'gi boladı.
