2 Korinfliler 12 bob
1 Maqtanıwdın' hesh qanday paydası joq bolsa da, endi men İyemiz ko'rsetken ko'rinisler ha'm ayanlar haqqında aytpaqshıman.
2 Men Masixqa isenetug'ın bir adamdı tanıyman. Ol bunnan on to'rt jıl burın u'shinshi aspang'a ko'terilip a'ketilgen edi. Ol sol waqıtta denede boldı ma yamasa deneden shıg'ıp ruwxta boldı ma, men bunı bilmeymen, Quday biledi.
3 Bul adam haqqında mınanı bilemen: ol ja'nnetke ko'terilip aparıldı. Ol sol jerde aytıp jetkiziw mu'mkin bolmag'an ha'm adam balasına aytıwg'a ruxsat etilmegen so'zlerdi esitti.
4 Biraq, ol denede boldı ma yamasa deneden shıg'ıp, ruwxta boldı ma bilmeymen, bunı Quday biledi.
5 Men usınday adam menen maqtanaman. Biraq, o'zime kelsem, tek o'zimdegi ha'lsizlikten basqa hesh na'rsem menen maqtanbayman.
6 Maqtanıwdı qa'legen jag'dayımda da men aqılsız bolmayman. O'ytkeni men haqıyqattı aytıp atırman. Biraq, hesh kim men tuwralı ha'dden tıs joqarı pikirge iye bolmay, meni tek mennen esitkenleri yamasa ko'rgenleri boyınsha bahalawı ushın, men o'zimdi maqtanıwdan tıyıp atırman.
7 Qudaydın' mag'an bergen a'jayıp ayanları sebepli o'zimdi joqarı tutpawım ushın, Ol deneme bir tiken, yag'nıy meni qıynaytug'ın shaytannın' bir perishtesin berip, meni menmenlikten saqlap kiyatır.
8 Bunı mennen alıp taslawdı sorap, İyemizge u'sh ma'rtebe jalbarıng'an edim.
9 Biraq, İyemiz mag'an: «Sag'an bergen miyrimim jetedi. Sebebi Menin' qu'diretim ha'lsizlik arqalı tolıq ko'rsetiledi», – dedi. Sonlıqtan Masixtın' qu'direti mende bolsın dep, men ha'lsizliklerime ele de ko'birek quwanıp, olar menen maqtana beremen.
10 Sol sebepten Masix ushın ha'lsizliklerge, masqaralanıwg'a, mu'ta'jliklerge, quwdalanıwg'a ha'm qıyınshılıqlarg'a ushırag'anımda, men quwanıshlıman. O'ytkeni men qashan ha'lsiz bolsam, sonda ku'shlimen.
11 Men maqtanıp, aqılsız adam bolıp ko'rindim. Biraq meni bug'an sizler ma'jbu'r ettin'iz-g'o. Negizinde meni sizler maqtawın'ız kerek edi. Sebebi men hesh kim bolmasam da, sizler «ma'rtebeli elshiler» dep ataytug'ın sol adamlardan hesh qanday kemshiligim joq.
12 Menin' Qudaydın' haqıyqıy elshisi ekenimdi da'lilleytug'ın ko'p belgiler, tan' qalarlıq isler ha'm ka'ramatlar sizlerdin' aran'ızda ku'shli sabırlılıq penen ko'rsetildi.
13 Sizlerden aqshalay ja'rdem sorap, o'z awırmanlıg'ımdı salmag'anım sebepli, basqa iseniwshi ja'ma'a'tlerden sizlerdi kem ko'rgendey boldım ba? Eger meni qa'te isledi dep oylasan'ız, meni keshirin'!
14 Minekey, men sizlerge u'shinshi ma'rtebe keliwge tayarman. Biraq, men sizlerge awırmanlıq salmayman. Mag'an sizlerdin' mal-mu'lkin'iz emes, al sizlerdin' o'zlerin'iz kereksiz. O'ytkeni balalar ata-anası ushın emes, al ata-ana balaları ushın mal-mu'lik jıynawı tiyis.
15 Sol sıyaqlı men de sizler ushın o'zimde bar ha'mme na'rseni, ha'tte, o'z janımdı da beriwge quwanıshlı tu'rde tayarman. Men sizlerdi sonshelli su'ysem de, sizlerdin' meni azıraq su'yiwin'iz durıs bolmaydı.
16 Menin' sizlerge awırmanlıq salmag'anımdı sizler de tastıyıqlaysızlar. Biraq, geybir adamlardın' aytıwı boyınsha, men hiyleker adam bolg'anım sebepli, sizlerdi aldaw jolı menen qolg'a kirgizgen qusayman.
17 Degen menen, o'zim sizlerge jibergen adamlardın' biri arqalı bolsa da, sizlerdin' esabın'ızdan paydalandım ba?
18 Men Titustan sizlerge barıwdı o'tinip, onın' menen birge basqa bir tuwısqanımızdı da jibergen edim. Titus sizlerdin' esabın'ızdan paydalang'an ba edi? A'lbette, yaq. Sebebi bizler bir ruwx penen is-ha'reket etip, bir jol menen ju'remiz-g'o.
19 Bizlerdi usı waqıtqa deyin aldın'ızda aqlanıp kiyatır dep oylap atırsız ba? Yaq, olay emes. Bizler Masixqa tiyisli adamlar sıpatında Quday aldında so'ylep turmız. Su'yikli tuwısqanlarım, bizler ne isleytug'ın bolsaq ta, ha'r bir na'rseni sizlerdin' ruwxıy bekkemleniwin'iz ushın isleymiz.
20 O'ytkeni men sizlerge barg'an waqtımda, sizlerdi o'zim qa'legendey emes awhalda ko'remen be dep ha'm sizler de meni o'zlerin'iz ku'tpegen awhalda ko'resiz be dep qa'weterdemen. Sizlerge barg'anımda, aran'ızda ja'njel, ku'nshillik, g'a'zep, daw, jala, o'sek, menmenlik ha'm ta'rtipsizlik bar ekenin ko'riwden qorqaman.
21 Tag'ı da, sizlerge ja'ne barg'anımda, Qudaydın' meni sizler sebepli uyaltıwınan, burın gu'na islep, o'zlerinin' haramılıg'ı, buzıqshılıg'ı ha'm ju'wensizligi ushın ta'wbe etpegen ko'p adamlar ushın ko'z jasımdı to'giwden qorqaman.
