2 Korinfliler 1 bob
1 Qudaydın' qa'lewi menen Masix İysanın' elshisi bolg'an men, Pavelden ha'm tuwısqanımız Timofeyden, Korinf qalasındag'ı Qudaydın' ja'ma'a'tine ha'm pu'tkil Axaya u'lkesindegi barlıq muxaddeslerge sa'lem!
2 A'kemiz Quday ha'm İyemiz İysa Masix sizlerge miyrim ha'm tınıshlıq bersin!
3 Qudayg'a, yag'nıy İyemiz İysa Masixtın' A'kesine alg'ıslar bolsın! Ol bizlerdin' rehimli A'kemiz ha'm tolıq jubanısh beriwshi Quday.
4 Quday bizlerge barlıq qıyınshılıqlarımızda jubanısh beredi. Solay etip, bizler de Qudaydan alg'an jubanısh penen ha'r qıylı qıyınshılıqlarda bolg'an adamlarg'a jubanısh bere alamız.
5 Sebebi Masix shekken azap-aqıretlerdi bizler qanshelli ko'p sheksek, Quday bizlerge Masix arqalı sonshelli u'lken jubanısh beredi.
6 Bizler ko'rip atırg'an qıyınshılıq sizlerdin' jubanısh alıwın'ız ha'm qutqarılıwın'ız ushın bolıp atır. Bizlerdin' jubanısh alıwımız da sizlerdin' jubanısh alıwın'ız ushın bolıp atır. Sizler o'zlerin'iz alg'an usı jubanısh arqalı bizler shekken azap-aqıretler menen birdey bolg'an azapaqıretlerge shıday alasızlar.
7 Bizlerdin' sizlerge baylanıslı bolg'an u'mitimiz bekkem. O'ytkeni sizlerdin' tek azap-aqıretlerimizge emes, al alg'an jubanıshımızg'a da sherik ekenin'izdi bilemiz.
8 Tuwısqanlarım, Aziya u'lkesinde ko'rgen qıyınshılıqlarımızdan sizlerdin' xabarsız qalıwın'ızdı qa'lemeymiz. Bizler shekten tıs awır qıyınshılıq astında bolıp, tiri qalıwdan da u'mitimizdi u'zgen edik.
9 İshimizden o'zimizdi o'limge hu'kim etilgendey sezdik. Biraq bul o'zlerimizge emes, al o'lilerdi tiriltetug'ın Qudayg'a su'yeniwimiz ushın boldı.
10 Quday bizlerdi usınday u'lken o'lim qa'wpinen qutqardı ha'm ele de qutqara beredi.
11 Sizlerdin' duwaların'ızdın' ja'rdeminde Quday bizlerdi ele de qutqara beredi dep, bizler Onnan u'mit etemiz. Ko'p adamlardın' etken duwalarına Quday juwap berip, bizlerdi qutqarg'anlıqtan, ko'pler bizler ushın Qudayg'a shu'kirlik bildiredi.
12 Bizler maqtanısh tutatug'ın ha'm pa'k hu'jdanımız benen gu'walıq beretug'ın na'rsemiz mınaw: bizler du'nyag'a, a'sirese sizlerge adamnın' danalıg'ı menen emes, al Qudaydın' miyrimi menen, Qudaydan kelgen hadallıq* ha'm haq niyet penen qatnas jasadıq.
13 Bizler sizlerge oqıp tu'sine alatug'ın na'rselerdi g'ana jazıp atırmız. Ha'zir bizlerdi tolıq tu'sinbesen'iz de, waqtı kelgende tolıq tu'sinetug'ının'ızdan u'mit etemen.
14 Solay etip, İyemiz İysa qaytıp keletug'ın ku'ni bizlerdin' maqtanıshımız sizler bolatug'ının'ız sıyaqlı, sizlerdin' maqtanıshın'ız da bizler bolamız.
15 Usınday isenim menen sizlerdi eki ese quwanıshqa bo'lensin dep, sizlerge barıwdı burın niyet etken edim.
16 Makedoniyag'a baratırg'anımda da, Makedoniyadan qaytıp kiyatırg'anımda da, sizlerge barıwdı niyet etken edim. Son'ınan sizler meni Yahudiyag'a shıg'arıp salarsız dep oylag'an edim.
17 Usılay niyet etip, men jen'ilteklik qılıppan ba? Meni denesinin' qa'lewi boyınsha kewlinde «yaq» dep oylap, awzı menen «awa» deytug'ın adam dep esaplaysızlar ma?
18 Men Qudaydın' sadıqlıg'ı haqı ant ishemen: bizler eki ju'zli adamlar emespiz. Bizler sizlerge so'ylegenimizde, «yaq» dep oylap, «awa» dep aytpadıq.
19 Bizler ta'repimizden, yag'nıy men ta'repimnen, Sila ha'm Timofey ta'repinen sizlerge ja'riyalang'an Qudaydın' Ulı İysa Masix ha'm «awa», ha'm «yaq» emes. Onda tek «awa» g'ana bar.
20 Qudaydın' barlıq wa'deleri Masix arqalı «awa» bolıp, tolıq orınlanadı. Sonlıqtan Qudaydın' dan'qqa bo'leniwi ushın, Masix arqalı Qudayg'a «awmiyin» deymiz.
21 Bizler menen sizlerdin' Masix penen bolg'an baylanısımızdı bekkem qılg'an ha'm bizlerdi xızmetke tayınlag'an Qudaydın' O'zi boladı.
22 Ol bizlerdi mo'rlep tamg'a bastı ha'm bunın' da'lili sıpatında Muxaddes Ruwxtı ju'regimizge jaylastırdı.
23 Menin' ju'regimde ne bar ekenin biletug'ın Qudaydın' O'zi gu'wa: sizlerdi ayag'anım sebepli, usı waqıtqa deyin Korinfke barmag'an edim.
24 Bizler sizlerdin' isenimin'izdin' u'stinen biylik ornatqımız kelmeydi. Kerisinshe, sizlerdin' quwanıwın'ız ushın, bizler sizler menen birlikte miynet etip atırmız. Sebebi sizler isenimde bekkem tursızlar.
