1 Korinfliler 9 bob
1 Men azat adam emespen be? Men elshi emespen be? Men İyemiz İysanı ko'rmedim be? Menin' İyemiz ushın islegen miynetimnin' jemisi sizler emessiz be?
2 Meni basqalar elshi dep sanamasa da, sizler meni elshi dep sanawın'ız tiyis! O'ytkeni sizler – menin' İyemizdin' elshisi ekenligimnin' da'lilisizler.
3 Meni sıng'a alıp atırg'anlardan o'zimdi bılay qorg'ayman:
4 sizlerge qılg'an xızmetimiz ushın, sizlerdin' esabın'ızdan iship-jewimizge haqımız bar-g'o.
5 Basqa elshiler sıyaqlı, İyemizdin' tuwısqanları ha'm Kifa sıyaqlı, bizler de qasımızg'a iseniwshi hayalımızdı ertip ju'riwge haqımız barg'o.
6 Basqa elshiler sıyaqlı, men ha'm Barnaba da ku'n ko'riw ushın miynet etpew huqıqına iyemiz-g'o.
7 Kim o'z esabınan a'skerlik qıladı? Kim bag' otırg'ızıp, miywesin jemeydi? Kim su'riwdi bag'ıp, su'riwdegi maldın' su'tinen ishpeydi?
8 Men bulardı tek adamlardın' pikiri boyınsha aytıp atırg'an joqpan. Muwsanın' Nızamında da anıq usılar haqqında aytılg'an joq pa?
9 Onda: «Tu'yek aydag'an o'gizdin' awzın buwma» , – dep jazılg'an-g'o. Quday tek o'gizlerdi qayg'ıradı ma?
10 Qudaydın' xızmetkerleri bolg'an bizler ushın aytıp atırg'an joq pa? Awa, a'lbette, bul bizler ushın jazılg'an-g'o. Mısalı: jerdi su'rgen adam da, tu'yek aydag'an adam da o'z u'lesin alıwdan u'mit etip, miynet isleydi.
11 Aran'ızda ruwxıy tuqım egip, sizlerden du'nyag'a tiyisli zatlardı orıp alg'anımız orınsız ba?
12 Basqalar sizlerden usı zatlardı alıw huqıqına iye bolsa, bizler olardan da ko'birek huqıqqa iyemizg'o. Biraq, bizler usı huqıqımızdan paydalang'an joqpız. Masixtın' Xosh Xabarına tosqınlıq jasamayıq dep, bizler ha'mme na'rsege shıdap atırmız.
13 Xabarın'ız bar, İbadatxanada xızmet etetug'ınlar İbadatxanadan awqat alıp jeydi. Sizlerge ma'lim, qurbanlıq shalınatug'ın orın a'tirapında xızmet etetug'ınlar da qurban etilgen na'rselerden o'z u'lesin aladı.
14 Sol sıyaqlı, İyemiz de Xosh Xabardı ja'riyalawshılar usı xızmeti arqalı ku'n ko'rsin dep buyırg'an.
15 Biraq, men bul huqıqlarımdı hesh qashan qollang'an emespen. Mag'an usınday qılınsın, dep te jazıp atırg'an joqpan. Bunday islegenimnen go're, o'lgenim abzalıraq. Meni usı maqtanıshımnan ayırıwg'a hesh kimge jol qoymayman!
16 Degen menen, Xosh Xabardı ja'riyalap atırg'anım sebepli maqtanıwg'a haqım joq. Sebebi bul – menin' minnetli wazıypam. Xosh Xabardı ja'riyalamasam, men ha'siret shegemen!
17 Eger men Xosh Xabardı o'z ıqtıyarım menen ja'riyalap atırg'an bolsam, onda miynetimnin' haqısın alaman. Biraq eger men onı o'z ıqtıyarım menen emes, al isenip tapsırılg'an minnetli wazıypam sıpatında orınlap atırg'an bolsam,
18 onda menin' miynet haqım qanday boladı? Xosh Xabardı ja'riyalag'anımda huqıqlarımnan paydalanbay, onı esheyin ja'riyalawım – menin' miynet haqım boladı.
19 Men azat adamman, hesh kimnin' qulı emespen. Biraq, ko'p adamlardı Masixqa alıp keliw ushın, ha'mmenin' qulı boldım.
20 Yahudiylerdi Masixqa alıp keliw ushın, men yahudiylerge yahudiy sıyaqlı boldım. Muwsanın' Nızamının' qol astında bolg'anlardı Masixqa alıp keliw ushın, o'zim Muwsanın' Nızamının' qol astında bolmasam da, men olarg'a Muwsanın' Nızamının' qol astındag'ı adam sıyaqlı boldım.
21 Muwsanın' Nızamına jat bolg'an basqa milletlerdi Masixqa alıp keliw ushın, men olarg'a Muwsanın' Nızamına jat adamday boldım. Biraq, men Qudaydın' Nızamına jat adam emespen, o'ytkeni men Masixtın' Nızamının' qol astındaman.
22 İsenimi ku'shsizlerdin' Masix penen baylanısın bekkem qılıw ushın, men olardın' biri sıyaqlı boldım. Hesh bolmasa ayırım adamlardı bolsa da qutqarıw ushın, men ha'mmege ha'mme na'rse boldım.
23 Xosh Xabar arqalı keletug'ın bereketten u'les alayın dep, men bulardın' ha'mmesin Xosh Xabar ushın islep atırman.
24 Jarısqa qatnasatug'ınlardın' ha'mmesi juwırg'anı menen, tek bir adam g'ana sıylıq alatug'ının bilmeysizler me? Sizler de sıylıq alıwın'ız ushın solay juwırın'lar.
25 Jarısqa qatnasatug'ınlardın' ha'mmesi o'zlerin barlıq na'rseden tıyadı. Olar bunı o'tkinshi tajdı alıw ushın isleydi. Al bizler ma'n'gilik tajdı alıw ushın ha'reket etemiz.
26 Sonlıqtan men maqsetsiz juwırg'an adam sıyaqlı juwırmayman. Judırıg'ımdı biykarg'a siltep, hawanı urg'an adam sıyaqlı bolmayman.
27 Al, basqalarg'a Xosh Xabardı ja'riyalap, o'zim ılayıqsız adam bolıp qalmawım ushın, o'zimdi tıyıp, denemdi bag'ındırıp atırman.
