1 Korinfliler 2 bob
1 Tuwısqanlarım, men sizlerge barıp, Qudaydın' sırın* ja'riyalag'anımda, sheshen so'zler yamasa artıqmash danalıq qollanbadım.
2 Sebebi aran'ızda bolg'an waqtımda, tek İysa Masixqa ha'm Onın' atanaq ag'ashqa shegeleniwine g'ana ayrıqsha dıqqat awdarıwg'a qarar ettim.
3 Men sizlerge ha'lsizlik, qorqınısh ha'm qattı dirildi menen bardım.
4 So'ylegen so'zim ha'm aytqan wazım adam aqılının' isendiriwshi so'zlerine emes, al Muxaddes Ruwxtın' O'z qu'direti menen ko'rsetken da'liline tiykarlang'an edi.
5 Menin' bundag'ı maqsetim – isenimin'izdin' adamnın' aqılına emes, al Qudaydın' qu'diretine tiykarlanıwı edi.
6 Degen menen, bizler ruwxıy jetisken adamlar arasında dana so'zler so'yleymiz. Biraq bul danalıq usı du'nyanın' ha'm onın' o'tkinshi hu'kimdarlarının' danalıg'ı emes.
7 Bizler Qudaydın' jasırın ha'm sırlı bolg'an danalıg'ı haqqında so'z etip atırmız. Quday du'nyanı jaratpastan burın onı bizlerdin' dan'qqa erisiwimiz ushın arnap qoyg'an edi.
8 8Bul danalıqtı usı du'nyadag'ı hu'kimdarlardın' hesh biri tu'sinbedi. Eger tu'singende, ullı İyemizdi atanaq ag'ashqa shegelemegen bolar edi.
9 Muxaddes Jazıwda aytılg'anday: «Ko'z ko'rip, qulaq esitpegen, Adamnın' oyına kirip te shıqpag'an na'rselerdi, Quday O'zin su'yetug'ınlar ushın tayarlap qoyıptı»
10 Biraq, Quday bunı bizlerge O'zinin' Muxaddes Ruwxı arqalı ashıp berdi. O'ytkeni Muxaddes Ruwx ha'mme na'rseni, ha'tte, Qudaydın' teren' oy-pikirlerin de biledi.Muxaddes Jazıwda aytılg'anday: «Ko'z ko'rip, qulaq esitpegen, Adamnın' oyına kirip te shıqpag'an na'rselerdi, Quday O'zin su'yetug'ınlar ushın tayarlap qoyıptı» .
11 Adamnın' oyların onın' ishindegi ruwxtan basqa kim bile aladı? Sol sıyaqlı, Qudaydın' oy-pikirlerin de Onın' Muxaddes Ruwxınan basqa hesh kim bile almaydı.
12 Qudaydın' bizlerge bergen miyrimli sıyların biliwimiz ushın, bizler bul du'nyanın' ruwxın emes, al Qudaydın' Ruwxın qabıl ettik.
13 Bizler bul sıylar haqqında adamnın' aqılı u'yretken so'zler menen emes, al Muxaddes Ruwx u'yretken so'zler menen so'yleymiz. Yag'nıy, ruwxıy na'rselerdi ruwxıy so'zler menen tu'sindiremiz.
14 O'z ta'biyatı boyınsha jasaytug'ın adam Qudaydın' Ruwxı beretug'ın na'rselerdi qabıl etpeydi. Sebebi ol bulardı aqmaqlıq dep sanaydı. Olardı tek Muxaddes Ruwxtın' ja'rdeminde tu'siniw kerek bolg'anlıqtan, ol tu'sine almaydı
15 Muxaddes Ruwxqa boysınatug'ın adam Muxaddes Ruwx ta'repinen berilgen ha'mme na'rseni tu'sine aladı, biraq onı Muxaddes Ruwxqa boysınbaytug'ın adamlar tu'sine almaydı.
16 «Jaratqan İyemizdin' oyındag'ısın kim bile aladı? Og'an kim aqıl bere aladı?» Biraq, bizler Masixtın' aqıl-oyına iyemiz.
