1 Korinfliler 14 bob
1 Su'yispenshilik penen jasawg'a umtılın'lar ha'm ruwxıy sıylardı, a'sirese payg'ambarshılıq aytıw sıyın alıwg'a tırısın'lar.
2 Sebebi basqa tilde so'ylegen adam adamlarg'a emes, al Qudayg'a so'yleydi. Onı hesh kim tu'sinbeydi. Ol Muxaddes Ruwxtın' basqarıwında sırlardı aytadı.
3 Al payg'ambarshılıq aytqan adam adamlardı bekkemlew, jubatıw ha'm ruwxlandırıw ushın so'yleydi.
4 Basqa tilde so'ylegen adam o'zin o'zi bekkemleydi. Al, payg'ambarshılıq aytqan adam iseniwshiler ja'ma'a'tin bekkemleydi.
5 Men sizlerdin' ha'mmen'izdin' basqa tillerde so'ylewin'izdi qa'leymen. Biraq onnan go're, payg'ambarshılıq aytıwın'ızdı ko'birek qa'leymen. Basqa tiller iseniwshiler ja'ma'a'tinin' bekkemleniwi ushın tu'sindirilmese, onda payg'ambarshılıq aytıwshı basqa tillerde so'ylegen adamnan artıg'ıraq.
6 Solay etip, tuwısqanlarım, men sizlerge barıp basqa tillerde so'ylesem, biraq sizlerge ya Qudaydın' ayanın, ya bilim, ya payg'ambarshılıq so'zin, ya ta'lim bermesem, onda menin' sizlerge qanday paydam tiyedi?
7 Sırnay yamasa duwtar sıyaqlı, ses shıg'aratug'ın jansız na'rseler de anıq ses shıg'armasa, sırnay yamasa duwtardın' ne shertkenin kim tu'sinedi?
8 Eger ka'rnay urıstın' baslang'anın ja'riyalap, anıq ses shıg'armasa, kim urısqa tayarlanadı?
9 Sol sıyaqlı, sizler de basqa tilde so'ylep, tu'siniksiz so'zlerdi aytsan'ız, so'ylegen so'zin'izdi kim tu'sinedi? Sizler qurı dalag'a so'ylegendey bolasızlar-g'o!
10 Du'nyada tu'rli-tu'rli tiller bar ha'm olardın' ha'r bir so'zi o'z ma'nisine iye.
11 Degen menen, eger men o'zime aytılg'an so'zdi tu'sinbesem, so'ylep turg'an adam ushın men jat jerli adam bolaman, so'ylep turg'an adam da men ushın jat jerli adam boladı.
12 Sol sebepten sizler ruwxıy sıylardı alıwg'a umtılg'anın'ızda, iseniwshiler ja'ma'a'tin bekkemleytug'ın sıylardı ko'birek alıwg'a tırısın'lar.
13 Sonlıqtan kim de kim basqa tilde so'yleytug'ın bolsa, ol o'zinin' aytqanların tu'sindire alıwı ushın duwa etsin.
14 O'ytkeni men basqa tilde duwa etsem, ruwxım duwa etedi, biraq men bunı sana-sezimim menen tu'sinbeymen.
15 Olay bolsa, men ne islewim kerek? Men ruwxım menen de, sana-sezimim menen de duwa etiwim kerek. Ruwxım menen alg'ısmaqtaw qosıg'ın aytsam, sana-sezimim menen de alg'ıs-maqtaw qosıg'ın aytıwım kerek.
16 Eger sen tek ruwxın' menen shu'kirlik bildirsen', sol jerde turg'an tu'sinbeytug'ın adam senin' bildirgen shu'kirligin'e qalay «awmiyin» deydi?
17 Durıs, senin' shu'kirlik bildirgenin' jaqsı, biraq bul arqalı basqa adam ruwxıy azıq almaydı.
18 Qudayg'a shu'kir, men ha'mmen'izden go're, basqa tillerde ko'birek so'yleymen.
19 Degen menen, iseniwshiler ja'ma'a'tinde basqa tilde on mın' so'z aytqanımnan go're, basqalarg'a ta'lim beriwim ushın tu'sinikli bes so'z aytqanım abzalıraq.
20 Tuwısqanlarım, aqıl-oyın'ız benen baladay bolman'lar. Jamanlıq islewde go'dek sıyaqlı, al aqıl-oyın'ız benen eresek adam sıyaqlı bolın'lar.
21 Muxaddes Jazıwda bılay delingen: «İyemiz bılay deydi: „Jat tillerde so'ylegenler arqalı, Jat adamlardın' awızları arqalı bul xalıqqa so'yleymen. Olar sonda da Meni tın'lamaydı“» .
22 Solay etip, basqa tillerde so'ylew iseniwshiler ushın emes, al isenbeytug'ın adamlar ushın berilgen belgi boladı. Al payg'ambarshılıq isenbeytug'ın adamlar ushın emes, iseniwshiler ushın berilgen belgi boladı.
23 Eger pu'tkil iseniwshiler ja'ma'a'ti bir jerge jıynalıp, ha'mmesi birlikte basqa tillerde so'ylese, bul ruwxıy sıydı tu'sinbeytug'ın yamasa iseniwshi emes adamlar ishke kirip: «Sizler aqıldan azıpsız!» – demey me?
24 Biraq, ha'mme payg'ambarshılıq qılg'anda, iseniwshi emes yamasa bul ruwxıy sıydı tu'sinbeytug'ın bir adam ishke kirse, ha'mme ta'repinen onın' gu'nası a'shkara etilip, ol ha'mme ta'repinen hu'kim qılınadı.
25 Solay etip, onın' ju'regindegi jasırın na'rseler ashılıp qaladı ha'm ol jerge jıg'ılıp: «Quday haqıyqattan da, sizlerdin' aran'ızda eken!» – dep Qudayg'a sıyınadı.
26 Tuwısqanlarım, endi bunnan qanday juwmaq shıg'aramız? Sizler jıynalg'anın'ızda, birin'iz alg'ıslaw qosıg'ın aytasız, birin'iz ta'lim beresiz, birin'iz Quday bergen ayandı bildiresiz, birin'iz basqa tilde so'yleysiz ha'm ja'ne birin'iz basqa tildi tu'sindiresiz. Bulardın' ha'mmesi iseniwshiler ja'ma'a'tinin' bekkemleniwi ushın islensin.
27 Basqa tilde so'ylegenin'izde, eki yamasa en' ko'p degende u'sh adam so'ylesin, biraq olar gezek penen so'ylesin. Basqa bir adam aytılg'anlardı tu'sindirsin.
28 Eger tu'sindiretug'ın adam joq bolsa, basqa tilde so'yleytug'ın adam ja'ma'a'tte u'ndemesin, al o'zi jalg'ız qalg'anda o'zi ushın Qudayg'a so'ylesin.
29 Payg'ambarshılıq aytıwshılardın' da ekewi yamasa u'shewi so'ylesin, al basqalar olardın' aytqan so'zlerin tekserip ko'rsin.
30 Otırg'an basqa bir adamg'a sol waqıtta Qudaydan ayan berilse, so'ylep turg'an payg'ambarshılıq aytıwshı adam u'ndemey qalsın.
31 Ja'ma'a'ttegi ha'r bir adamdı u'yretip, ha'r bir adamg'a jubanısh beriwin'iz ushın, ha'mmen'iz gezek penen payg'ambarshılıq aytıwın'ızg'a boladı.
32 Payg'ambarshılıq aytıw sıyı payg'ambarshılıq aytıwshı adamlar ta'repinen basqarıladı.
33 Sebebi Quday ta'rtipsizlik Qudayı emes, al tınıshlıq Qudayı. Barlıq iseniwshilerdin' ja'ma'a'tlerinde bolg'anı sıyaqlı,
34 sizlerdin' ja'ma'a'tin'izde de hayallar jıynalıslarda u'ndemesin. Olardın' so'ylewine ruxsat etilmegen. Muwsanın' Nızamında aytılg'anday, olar boysınıwı kerek.
35 Eger olar bir na'rseni u'yrenbekshi bolsa, u'yde ku'yewlerinen sorasın. O'ytkeni hayaldın' ja'ma'a't jıynalısında so'ylegeni ayıp boladı.
36 Qudaydın' so'zi sizlerden shıg'ıp, tek jalg'ız sizlerge jetip bardı ma?
37 Eger kim de kim o'zin payg'ambar yamasa ruwxıy jetik adam dep sanasa, sizlerge jazıp atırg'an bul so'zlerimnin' İyemizdin' buyrıg'ı ekenin bilsin.
38 Al kim de kim bulardı qabıl almasa, onın' o'zi de qabıl alınbaydı.
39 Solay etip, tuwısqanlarım, payg'ambarshılıq aytıwg'a umtılın'lar. Basqa tillerde so'ylewge tosqınlıq jasaman'lar.
40 Biraq, ha'mmesi de a'dep ha'm ta'rtip penen islensin.
