1 Korinfliler 1 bob
1 Qudaydın' qa'lewi menen Masix İysanın' elshisi bolıwg'a shaqırılg'an men, Pavelden ha'm tuwısqanımız Sostenisten,
2 Korinf qalasındag'ı Qudaydın' ja'ma'a'tine sa'lem! Bizler bul xattı İyemiz İysa Masixtın' atın ha'mme jerde aytıp shaqırıwshılardın' ha'mmesi menen birge Masix İysa arqalı muxaddes qılıng'an ha'm muxaddesler dep atalg'an sizlerge jazıp atırmız. İysa Masix – olardın' da, bizlerdin' de İyemiz.
3 A'kemiz Quday ha'm İyemiz İysa Masix sizlerge miyrim ha'm tınıshlıq bersin!
4 Qudaydın' Masix İysa arqalı sizlerge bergen miyrimi sebepli, sizler ushın Qudayıma ba'rqulla shu'kirlik bildiremen.
5 O'ytkeni sizler Masix penen qatnas jasag'anlıqtan, ha'r ta'repleme bay boldın'lar. A'sirese Qudaydın' so'zin aytıwda sheshen ha'm ha'r qıylı bilimge iye boldın'lar.
6 Bizlerdin' Masix İysa haqqında gu'walıg'ımız sizlerdin' o'mirin'izde usılay tastıyıqlandı.
7 Solay etip, sizler hesh qanday ruwxıy sıydan kemshilik ko'rmey, Masixtın' qayta keliwin intizarlıq penen ku'tesizler
8 İyemiz İysa Masix keletug'ın ku'ni ayıpsız bolıwın'ız ushın, Quday sizlerdi aqırına deyin bekkem qıladı.
9 Sizlerdi O'z Ulı İyemiz İysa Masix penen qatnasta bolıwg'a shaqırg'an Quday – sadıq.
10 Tuwısqanlarım! İyemiz İysa Masixtın' atının' biyligi menen eskertemen: ha'mmen'iz awızbirishilikli bolın'lar. Aran'ızda bo'liniw bolmay, bir oy ha'm bir maqset penen birlesin'ler
11 Sebebi tuwısqanlarım, Xloystın' u'y-ishindegi adamlardan aran'ızda tartıslar bar ekenin bildim.
12 Menin' aytajag'ım mınaw: sizler: «Men Pavelge tiyislimen», «Men Apolosqa tiyislimen», «Men Kifag'a tiyislimen» yamasa «Men Masixqa tiyislimen» dep aytıp ju'rgen qusaysız.
13 Masix bo'lindi me? Sizler ushın atanaq ag'ashqa Pavel shegelenip pe edi? Sizler Paveldin' atı menen suwg'a shomıldırılg'an ba edin'iz.
14 Men sizlerdin' aran'ızdan Krispus penen Gayustan basqa hesh kimdi suwg'a shomıldırmag'anım ushın Qudayg'a shu'kirlik etemen.
15 Sonlıqtan hesh kim menin' atım menen suwg'a shomıldırıldım, dep ayta almaydı.
16 Ras, men tag'ı Stepannın' u'yi ishindegilerdi de suwg'a shomıldırdım. Bulardan basqa ja'ne kimlerdi suwg'a shomıldırg'anımdı esime tu'sire almayman.
17 Masix meni suwg'a shomıldırıw ushın emes, al Xosh Xabardı ja'riyalaw ushın jiberdi. Masixtın' atanaq ag'ashtag'ı o'limi a'hmiyetin joytpawı ushın, men Xosh Xabardı dana so'zlerge tiykarlanbay ja'riyaladım.
18 Masixtın' atanaq ag'ashı haqqında so'zler nabıt bolatug'ınlar ushın aqmaqlıq, biraq qutqarılatug'ın bizler ushın Qudaydın' qu'direti.
19 O'ytkeni Muxaddes Jazıwda Quday bılay degen: «Danalardın' danalıg'ın joq etemen, Aqıllı adamlardın' aqılın bosqa shıg'araman».
20 Olay bolsa, dana adam qa'ne? Alım qa'ne? Ha'zirgi zamannın' oyshılı qa'ne? Quday du'nyanın' danalıg'ın aqılsızlıqqa aylandırmadı ma?
21 Sebebi du'nyanın' o'z aqıl-danalıg'ı menen Qudaydı bilmewi Qudaydın' danalıg'ı boyınsha boldı. Sonlıqtan Quday isengen adamlardı bizlerdin' aqılsız dep sanalg'an wazımız benen qutqarıwdı maqul ko'rdi.
22 Yahudiyler ka'ramatlı belgiler ko'rsetiwimizdi talap etedi, grekler wazımızdan danalıq izleydi.
23 Biraq bizler atanaq ag'ashqa shegelengen Masix haqqında ja'riyalap atırmız. Yahudiyler ushın bul tosqınlıq boladı, al basqa milletler ushın aqılsızlıq bolıp ko'rinedi.
24 Quday ta'repinen tan'lang'anlar ushın bolsa, ol ya yahudiy bolsın, ya grek bolsın, atanaq ag'ashqa shegelengen usı Masix – Qudaydın' qu'direti ha'm Onın' danalıg'ı.
25 O'ytkeni Qudaydın' «aqılsızlıg'ı» adamnın' danalıg'ınan anag'urlım u'stinirek, Qudaydın' «ha'lsizligi» adamnın' ku'shinen anag'urlım qu'diretlirek.
26 Tuwısqanlarım, Quday ta'repinen shaqırılg'an waqtın'ızda kim bolg'anın'ızdı eske tu'sirip ko'rin'ler. Adamnın' ko'z qarası boyınsha aran'ızda danalar da, biylikke iye adamlar da, aqsu'yek adamlar da ko'p emes edi.
27 Biraq, Quday danalardı uyatqa qaldırıw ushın, du'nya aqılsız dep sanag'an adamlardı, ku'shlilerdi uyatqa qaldırıw ushın, du'nya ha'lsiz dep sanag'an adamlardı tan'ladı.
28 Ol ja'ne de, du'nya a'hmiyetli dep sanag'anlardı arzımas qılıw ushın, du'nya shıg'ısı to'men, pa's ha'm a'hmiyetsiz dep sanag'anlardı tan'ladı.
29 Quday bunı O'zinin' aldında hesh bir adam maqtanbawı ushın isledi.
30 Biraq, sizler o'mirin'izdin' tiykarı bolg'an Quday sebepli, Masix İysa menen qarım-qatnasqa iyesiz. Masix bizler ushın Qudaydın' danalıg'ı bolıp, bizlerdi aqlap, muxaddes qıldı ha'm gu'nalarımız ushın to'lem to'lep qutqardı.
31 Solay etip, Muxaddes Jazıwda aytılg'anday: «Maqtanatug'ın adam İyemiz benen maqtansın».
