Rimliler 1 bob
1 İysa Masixtın' qulı bolg'an, elshilikke shaqırılıp, Qudaydın' Xosh Xabarın ja'riyalaw ushın tan'lang'an men, Pavelden sa'lem!
2 Usı Xosh Xabardı Quday O'z payg'ambarları arqalı Muxaddes Jazıwlarda a'welden wa'de etken edi.
3 Bul Xosh Xabar Qudaydın' Ulı haqqında bolıp, Ol adam sıpatında Dawıttın' urpag'ınan tuwıldı ha'm.
4 Onın' Muxaddes Ruwx* ta'repinen o'limnen qayta tiriliwi arqalı Qudaydın' Ulı ekeni qu'diret penen da'lillendi. Qudaydın' Ulı – bul İyemiz İysa Masix.
5 Masixtın' atı ushın, ha'mme milletlerden bolg'an adamlar isensin ha'm so'zge boysınsın dep, Ol arqalı bizler Qudaydın' miyrimine ha'm elshilik xızmetine iye boldıq.
6 İysa Masixqa tiyisli bolıw ushın tan'lang'an sizler de usı ha'r tu'rli milletlerdensiz.
7 Quday su'yip, O'z muxaddesleri bolıwg'a shaqırg'an, Rimdegi sizlerdin' ha'mmen'izge A'kemiz Quday ha'm İyemiz İysa Masix miyrim ha'm tınıshlıq bersin!
8 Aldı menen isenimin'izdin' dan'qı pu'tkil du'nyag'a jayılg'anı sebepli, sizlerdin' ha'mmen'iz ushın İysa Masix arqalı Qudayıma shu'kirlik bildiremen.
9 Ja'ne de, endi sizlerge barıwım ushın Qudaydın' qa'lewi menen jol ashılıwın da tınbastan sorap atırman.
10 Ja'ne de, endi sizlerge barıwım ushın Qudaydın' qa'lewi menen jol ashılıwın da tınbastan sorap atırman.
11 O'ytkeni isenimin'izdin' bekkem bolıwı ushın sizlerge bir ruwxıy sıydı jetkereyin dep, men sizlerdi qattı ko'rgim kelip atır.
12 Yag'nıy, aran'ızda bolg'anımda bir-birimizdin' isenimimizden jigerlensek eken deymen.
13 Tuwısqanlarım, basqa milletler arasında bolg'anı sıyaqlı, sizlerdin' aran'ızda da menin' islerimnin' jemisi bolıwı ushın, janın'ızg'a keliwdi ko'p ma'rtebe maqset etsem de, biraq ha'zirge deyin tosqınlıqlarg'a dus kelgenimnen biyxabar qalıwın'ızdı qa'lemeymen.
14 Menin' parızım* ha'mmege: greklerge ha'm grek emeslerge*, bilimli ha'm bilimsiz adamlarg'a Xosh Xabardı ja'riyalawdan ibarat.
15 Sonlıqtan qolımnan kelgenshe, Rimde bolg'an sizlerge de Xosh Xabardı ja'riyalawg'a tayarman.
16 Sebebi men Xosh Xabardan arlanbayman. Xosh Xabar – isengen ha'r bir adamdı, birinshiden yahudiylerdi, son'ınan yahudiy emeslerdi* qutqara alatug'ın Qudaydın' ku'shi.
17 Qudaydın' adamdı aqlaytug'ını Xosh Xabarda ashıq ko'rsetilgen. Aqlanıw isenim arqalı baslanıp, isenimdi bekkemlep baradı. Muxaddes Jazıwda aytılg'anday: «Aqlang'an adam isenimi menen jasaydı» .
18 Haqıyqatqa o'z nahaqlıg'ı menen bo'get bolatug'ın adamlardın' barlıq qudaysız ha'm nahaq islerine aspannan Qudaydın' g'a'zebi to'giledi.
19 O'ytkeni Quday haqqında biliwge mu'mkin bolg'an na'rseler olarg'a belgili. Qudaydın' O'zi olarg'a usılardı ma'lim etken.
20 Du'nya jaratılg'annan beri Qudaydın' ko'zge ko'rinbeytug'ın qa'siyetleri, yag'nıy sheksiz qu'direti ha'm qudaylıg'ı Ol jaratqan barlıqtan seziledi ha'm ashıq ko'rinedi. Solay etip, olar o'zlerin aqlay almaydı.
21 Olar Qudaydı bilse de, Onı Quday dep ullılamadı ha'm Og'an shu'kirlik bildirmedi. Kerisinshe, olardın' oy-qıyalları bos bolıp, aqılsız kewillerin qaran'g'ılıq qapladı.
22 O'zlerin aqıllımız dep sanap, aqmaq bolıp shıqtı:
23 ma'n'gi tiri Qudaydın' ullılıg'ın basında o'lim bar adamnın', quslardın', to'rt ayaqlı haywanlardın' ha'm jer bawırlawshılardın' ko'rinisindegi butlarg'a almastırdı.
24 Sol sebepten Quday olardı ju'reklerindegi haram qa'lewlerine ha'm buzıqshılıqqa tapsırıp, bir-birinin' denesin iplaslawına tosqınlıq jasamadı.
25 Olar Qudaydın' haqıyqatın jalg'ang'a almastırdı. Jaratqang'a emes, al jaratılg'an na'rsege sıyınıp, og'an xızmet etti. Al Quday sheksiz alg'ıs-maqtawlarg'a ılayıqlı. Awmiyin.
26 Sonlıqtan Quday olardı uyatsız qa'lewlerine tapsırdı. Ha'tte, hayallar da er adam menen ta'biyg'ıy jınısıy qatnastı qoyıp, o'z ara ta'biyg'ıy emes qatnas jasadı.
27 Sol sıyaqlı, er adamlar da hayal menen ta'biyg'ıy jınısıy qatnastı qoyıp, bir-birine buzıq ha'wes penen ıntıqtı. Erkekler erkekler menen uyatsız is-ha'reketler islep, o'z buzıqshılıg'ına ılayıq jazasın aldı.
28 Qudaydı biliwdi qa'lemegenlikten, Quday da olardı buzıq oy-sezimlerine ha'm islewge bolmaytug'ın is-ha'reketlerdi islewge tapsırdı.
29 Olardın' kewilleri ha'r tu'rli nahaqlıqqa, jawızlıqqa, na'psiqawlıqqa, jamanlıqqa, ku'nshillikke, qanxorlıqqa, ja'njelkeshlikke, hiylekerlikke ha'm jaman niyetke tolı. Olar ja'ne o'sekshi,
30 jalaxor, Qudaydı jek ko'riwshi, xorlawshı, menmen, maqtanshaq, jamanlıq islewge sheber, ata-anasının' so'zin tın'lamaytug'ın,
31 aqılsız, opasız, jawız ha'm rehimsiz adamlar.
32 Bunday islerdi islewshiler o'limge ılayıq, degen Qudaydın' a'dil hu'kimin olar bilse de, bul islerdi tek o'zleri g'ana islep qoymay, al usı islerdi islewshilerdi de qollap quwatlaydı.
