Yahud 1 bob
1 Men, İysa Masixtın' qulı ha'm Yaqıptın' tuwısqanı Yahudadan, A'kemiz Quday ta'repinen shaqırılg'anlarg'a sa'lem! A'kemiz Quday sizlerdi su'yedi ha'm İysa Masixtın' O'zi sizlerdi saqlap kelmekte.
2 Sizlerge miyrim-sha'pa'a't, tınıshlıq ha'm su'yispenshilik mol-mol etip berilsin!
3 Su'yikli tuwısqanlarım! Bizlerge ortaq bolg'an qutqarılıwımız haqqında jazıwdı ju'da' qa'legen edim. Endi iseniwshilerge birotalag'a berilgen İysag'a degen isenim ushın gu'resin' dep, sizlerge na'siyat etip jazıwg'a ma'jbu'r boldım.
4 4Sebebi aran'ızg'a ayırım qudaysız adamlar jasırın kirip alg'an. Olar Qudaydı miyrimli dep, Onın' miyriminen buzıqshılıq qılıw ushın paydalanadı, jalg'ız Hu'kimdarımız ha'm İyemiz bolg'an İysa Masixtı ta'n almaydı. Ondaylardın' jazası a'zelden-aq jazılıp qoyılg'an.
5 Bulardın' ha'mmesinen xabarın'ız bolsa da, men sizlerge esletip qoymaqshıman: Quday O'z xalqın Mısır elindegi qulshılıqtan qutqardı, biraq son'ınan isenbeytug'ınlardı nabıt etti.
6 Sonday-aq, o'z ma'rtebebiyligine qanaat etpey, ma'kanın taslap ketken perishtelerdi de Quday ullı jaza ku'ninde hu'kim etiw ushın ma'n'gige baylap, qaran'g'ılıqqa qamap qoyıptı.
7 Bularg'a uqsap, Sodom menen Gomora qalaları ha'm olardın' a'tiraplarındag'ı qalalar da buzıqshılıq ha'm ta'biyg'ıy emes jınısıy haramılıq isledi. Ma'n'gilik otta janıw jazasın alg'an bul qalalar adamlarg'a eskertiw boldı.
8 Sol sıyaqlı, aran'ızg'a kirgen bul adamlar da qıyalparazlıqqa berilip, o'z denelerin iplaslaydı ha'm Qudaydın' biyligin mensinbey, perishtelerdi mazaq etedi.
9 Ha'tte, bas perishte Mixail de Muwsanın' denesi haqqında shaytan menen tartısqanda, onı g'arg'ap hu'kim etiwge batılı barmay, tek: «Qudaydın' O'zi sag'an sazayın'dı bersin», – degen edi.
10 0Biraq bul adamlar o'zleri tu'sinbeytug'ın na'rselerdi mazaq etip, sanasız haywanlar sıyaqlı tek ta'biyg'ıy sezim boyınsha jasag'anlıqtan nabıt boladı.
11 Olar ha'siret shegedi! O'ytkeni Kainnın' jawız jolı menen barmaqta. Bilam sıyaqlı da'mego'yshilikke berilgen olar Korey sıyaqlı qozg'alan' ko'terip, nabıt boladı.
12 Tek g'ana o'zin oylap, qarım-qatnas keshelerin'izde sizler menen birge iship-jegen bunday uyatsız adamlar ishekke tu'sken qurt sıyaqlı qa'wipli. Olar samal menen ko'ship ju'retug'ın jamg'ırsız bultlarg'a, gu'zde miywesiz qalıp o'lgen, tamırı menen julıp taslang'an tereklerge uqsaydı.
13 Olar ko'bigin shashıratqan ten'izdin' qa'ha'rli tolqınları sıyaqlı, pataslıqların a'tirapqa shashıratadı. Adasqan juldızlar sıyaqlı bolg'an olar ushın tas tu'nek qaran'g'ılıq ma'n'gige tayar tur.
14 Adam-atanın' jetinshi a'wladı bolg'an Enok usı adamlar haqqında mına payg'ambarshılıqtı aytqan edi:
15 «Mine, İyemiz ha'r bir adamdı hu'kim qılıw ushın, qudaysız gu'nakarlardın' barlıq jawız is-ha'reketlerin, O'zine qarsı aytılg'an barlıq jaman so'zlerin a'shkara etiw ushın, O'zinin' mın'-mın'lag'an muxaddesleri menen keledi».
16 Bul adamlar ha'mme waqıt nalıp, basqalarg'a kewli tolmaydı. Olar na'psiqawlıq penen is tutadı ha'm lapgo'ylik etip, o'z paydası ushın basqalarg'a jaramsaqlanadı.
17 Biraq sizler, su'yikli tuwısqanlarım, İyemiz İysa Masixtın' elshileri ta'repinen aldın aytılg'an so'zlerdi eske tu'sirin'ler.
18 Olar sizlerge: «Du'nyanın' son'g'ı ku'nlerinde o'z na'psine berilgen, Qudaydan qorqpaytug'ın mazaq etiwshiler payda boladı», – degen edi.
19 Bunday adamlar – alawızlıq salıwshı ha'm Muxaddes Ruwxtan bos qalıp, o'zinin' gu'nakar ta'biyatının' qulı bolg'an adamlar.
20 Biraq sizler, su'yikli tuwısqanlarım, en' muxaddes bolg'an isenimin'izdi o'mirin'izdin' tiykarı qılıp, jetilisip barın'lar. Muxaddes Ruwx penen duwa etin'ler.
21 O'zlerin'izdi ma'n'gilik o'mirge eristiretug'ın İyemiz İysa Masixtın' miyrim-sha'pa'a'tin ku'tip, Qudaydın' su'yispenshiligi menen jasawdı dawam etin'ler.
22 İsenimde ekileniwshi ayırım adamlarg'a miyrimlilik penen qatnas jasan'lar.
23 Bazılardı ottan shıg'arıp, qutqarın'lar. Ja'ne basqalarg'a saqlıq penen rehimlilik ko'rsetin'ler. Al olardın' gu'nalarınan bolsa, jerkenin'ler.
24 Qutqarıwshımız bolg'an jalg'ız Quday sizlerdi jıg'ılıwdan saqlawg'a,
25 O'zinin' saltanatında ullı quwanısh penen minsiz qılıp turg'ızıwg'a qu'diretli. İyemiz İysa Masix arqalı a'zelden, ha'zir ha'm ma'n'gige, ullılıq, saltanat, ku'sh-qu'diret ha'm hu'kimdarlıq Qudaydiki bolsın! Awmiyin.
- 1
