Nızamnın' qaytalanıwı 9 bob
1 «Qulaq salın', ha'y, İzrail xalqı! Sizler bu'gin o'zlerin'izden ko'p ha'm ku'shli bolg'an xalıqlardın' jerlerin mu'lik etiw ushın, İordan da'ryasınan o'tesiz. Olardın' u'lken qalaları aspang'a tiyer diywallar menen qorshalg'an.
2 Sol ku'shli, uzın boylı xalıq Anaq a'wladınan. Olardı o'zlerin'iz bilesiz. Olar haqqında: „Anaq a'wladlarına kim qarsı shıg'a alar eken?“ – degen so'zlerdi esitkensizler.
3 Biraq bu'gin mınanı bilip qoyın'lar: Qudayın'ız Jaratqan İye jalmamay jutatug'ın jalın sıyaqlı sizlerdin' aldın'ızdan baradı. Ol Anaq a'wladların jen'iliske ushıratıp, sizlerge bas iydiredi. Sonda Jaratqan İye sizlerge wa'de bergenindey, olardı quwıp, bir maydanda joq qılasız.
4 Qudayın'ız Jaratqan İye sol xalıqlardı sizlerdin' aldın'ızdan quwıp shıg'arg'annan keyin, sizler o'zlerin'izshe: „Jaratqan İye haqlıg'ımız sebepli bul eldi iyelewimiz ushın, bizlerdi usı jerge alıp keldi“, – dep oylap ju'rmen'ler. O'ytkeni Jaratqan İye bul xalıqlardı islegen jawızlıqları ushın, sizlerdin' aldın'ızdan quwıp atır.
5 Sizler o'z a'dilligin'iz ha'm kewlin'izdin' haqlıg'ı sebepli olardın' jerlerin mu'lik etip alıp atırg'an joqsız. Qudayın'ız Jaratqan İye bul xalıqlardı islegen jawızlıqları sebepli sizlerdin' aldın'ızdan quwıp atır. Usılayınsha, Ol ata-babaların'ız İbrayım, Isaq ha'm Yaqıpqa ant iship, bergen wa'desin orınlaydı.
6 Mınanı bilip qoyın'lar: Qudayın'ız Jaratqan İye sizlerge bul jaqsı jerdi haq bolg'anın'ız ushın berip atırg'an joq. Kerisinshe, sizler qaysar bir xalıqsız».
7 «Qudayın'ız Jaratqan İyeni sho'lde qanshelli g'a'zeplendirgenin'izdi esin'izde saqlan', hasla umıtpan'lar. Mısırdan shıqqan ku'nnen baslap, usı jerge jetip kelgenge deyin ha'mme waqıtta Jaratqan İyege qarsı bas ko'terip keldin'iz.
8 Xoreb tawında Jaratqan İyenin' g'a'zebine tiygenin'iz sonshelli, Ol sizlerdi joq qılıp jibereyin dep qaldı.
9 Sonda men eki tastı, yag'nıy Jaratqan İyenin' sizler menen du'zgen kelisim tasların alıw ushın, tawg'a shıqqan edim. Men ol jerde qırıq ku'n, qırıq tu'n bolıp, hesh na'rse iship-jemedim.
10 aratqan İye O'z qolı menen jazg'an eki tastı mag'an berdi. Bul taslarda sizler tawda jıynalg'an ku'ni Jaratqan İyenin' ot ishinen sizlerge aytqan buyrıqlarının' ha'mmesi jazılg'an edi.
11 Sol qırıq ku'n, qırıq tu'nnen keyin Jaratqan İye mag'an eki tastı, kelisim tasların berdi.
12 Sonnan keyin, Jaratqan İye mag'an: „Qa'ne, bul jerden da'rhal to'men tu's. Sebebi Mısırdan alıp shıqqan xalqın' joldan azg'ırıldı. Olar Men buyırg'an joldan shıg'ıp, o'zlerine bir but mu'sinin islep aldı“, – dedi.
13 Jaratqan İye mag'an ja'ne: „Bul xalıqtın' haqıyqattan qaysar xalıq ekenin ko'rdim!
14 Endi Meni toqtatıp qalma. Men olardın' ha'mmesin joq qılıp, atların jer ju'zinen o'shirip taslayman. Al sennen olardan go're ku'shlirek ha'm ko'birek xalıq do'retemen“, – dedi.
15 Solay etip, men tawdan to'menge tu'stim. Taw ot bolıp janıp turg'an edi. Menin' qolımda eki kelisim tası bar edi.
16 Sonda men sizlerdin' Qudayın'ız Jaratqan İyege qarsı gu'na islep, o'zlerin'izge tananın' su'lderindegi buttı islep alg'anın'ızdı ko'rdim. Sizler Jaratqan İyenin' bergen jolınan da'rhal shıg'ıp ketken edin'iz.
17 Sol sebepli qolımdag'ı eki kelisim tasın ılaqtırıp jiberip, sizlerdin' ko'z aldın'ızda sındırıp tasladım.
18 Sonnan keyin, men ko'p gu'nan'ız sebepli, ja'ne Jaratqan İyenin' aldında uzaq waqıt, qırıq ku'n, qırıq tu'n hesh na'rse iship-jemey, et betimnen jerge jatıp, sizler ushın jalbarındım. Sebebi Jaratqan İyenin' na'zerinde jawız bolg'an isti islep, Onın' g'a'zebin keltirgen edin'iz.
19 Men Jaratqan İyenin' janıp turg'an g'a'zebinin' aldında qattı qorqqan edim. Onın' g'a'zebi sonshelli lawlap ketkenlikten, Ol sizlerdi joq qılmaqshı edi. Degen menen, Jaratqan İye bul ret te menin' jalbarınıwıma qulaq saldı.
20 Jaratqan İye Xarong'a da qattı g'a'zeplenip, onı o'ltirmekshi edi. Biraq sol waqıtta Xaron ushın da jalbarıng'an edim.
21 Al men sizlerdin' gu'nalı isin'izdi, yag'nıy tanag'a megzetip islegen butın'ızdı alıp, jag'ıp jiberdim. Onı bo'leklep, untaqlap ezdim de, keyin onı tawda ag'ıp turg'an bulaqqa shashıp jiberdim.
22 Sizler ja'ne, Taberada da, Massada da, Kibrot-Hattaawada da Jaratqan İyenin' g'a'zebin keltirdin'iz
23 Jaratqan İye Qadesh-Barniyadan sizlerdi jiberip: „Barın'lar, sizlerge berip atırg'an eldi mu'lik etip, iyelep alın'lar“, – dep buyırg'anda da, sizler Onın' buyrıg'ına qarsı shıqtın'ız. Sizler Og'an isenbedin'iz, so'zlerine de qulaq salmadın'ız
24 Men sizlerdi tanıg'anımnan baslap, ha'zirge deyin Jaratqan İyege qarsı shıg'ıp, bas ko'terip kiyatırsız.
25 Jaratqan İye sizlerdi joq etetug'ının aytqanlıqtan, men Onın' aldında sol qırıq ku'n, qırıq tu'n boyı et betimnen jerge jatıp alg'an edim.
26 Sonda men Jaratqan İyege bılay dep jalbarıng'an edim: „Quday İye, Sen O'z ullılıg'ın' menen azat etip, qu'diretli qolın' menen Mısırdan alıp shıqqan xalqın'dı, O'z mu'lkin'di joq etpe.
27 Qulların' İbrayımdı, Isaqtı ha'm Yaqıptı esle. Bul xalıqtın' qaysarlıg'ına, jawızlıqları menen gu'nalarına itibar berme.
28 Bolmasa, Sen bizlerdi alıp shıqqan eldin' xalqı: Jaratqan İye olardı wa'de qılg'an jerine alıp bara almadı. Ol sol xalıqtı jek ko'rgeni ushın, sho'lde joq qılıw maqsetinde olardı Mısırdan alıp shıqqan eken, – dep aytadı.
29 Biraq olar ullı ku'shin' ha'm qu'diretli qolın' menen Mısırdan alıp shıqqan O'zin'nin' xalqın' ha'm mu'lkin'dur“».
