Nızamnın' qaytalanıwı 8 bob

Jaratqan İyeni umıtpan'lar(1-20).

¹ «Bu'gin men sizlerge berip atırg'an buyrıqlardın' ha'mmesin muqıyatlı tu'rde orınlan'lar, sonda jasaysız ha'm ko'beyesiz. Jaratqan İyenin' ata-babaların'ızg'a beremen dep ant ishken jerin mu'lik etip alasızlar.

² Qudayın'ız Jaratqan İye sizlerdi qırıq jıl dawamında sho'lde alıp ju'rdi, sol ju'rgen uzaq jolın'ızdı este saqlan'lar! Sizlerdin' ju'regin'izde ne bar ekenin ha'm Onın' buyrıqlarına boysınatug'ının'ız, ya boysınbaytug'ının'ızdı biliw ushın, sizlerge qıyınshılıq jiberip, sınadı.

³ Ol sizlerdi ash qaldırıp, boysındırdı. Keyin o'zlerin'iz de, ata-babaların'ız da ko'rmegen manna menen toydırdı. Bunı adamnın' tek g'ana nan menen emes, al Jaratqan İyenin' awzınan shıqqan ha'r bir so'zi menen jasaytug'ının sizlerge u'yretiw ushın isledi.

⁴ Sol qırıq jıl dawamında ya kiyimlerin'iz tozbadı, ya ayaqların'ız isip ketpedi.

⁵ Mınanı este tutın'lar: a'ke balasın qalay ta'rbiyalasa, Qudayın'ız Jaratqan İye de sizlerdi solay etip ta'rbiyalaydı.

⁶ 6Sonlıqtan Qudayın'ız Jaratqan İyenin' buyrıqlarına boysınıp, ko'rsetken jolı menen ju'rin' ha'm Onnan qorqın'.

⁷ Ol sizlerdi jaqsı bir jerge alıp baradı. Ol jerdin' da'ryaları, bulaqları ha'm tawlar menen oypatlıqlarda jer astınan shıg'atug'ın suwları,

⁸ biydayı, arpası, ju'zimi, a'njiri, anarı, za'ytu'n ag'ashları ha'm palı bar.

⁹ Sol elde toyıp nan jeysizler, hesh qanday mu'ta'jlik ko'rmeysizler. Ol sonday el, taslarınan temir, tawlarınan mıs alasızlar.

¹⁰ Sol jerde iship-jep toyg'anın'ızda, sizlerge bergen o'nimdar el ushın, Qudayın'ız Jaratqan İyege shu'kirlik bildirin'ler.

¹¹ Qudayın'ız Jaratqan İyeni umıtpan'lar, bu'gin men sizlerge jetkerip atırg'an Onın' buyrıqların, nızamların ha'm qag'ıydaların orınlamay qalıwdan saq bolın'lar.

¹² Ja'ne, qarnın'ız toyıp, sulıw u'yler salıp, jaylasıp alg'anda,

¹³ iri ha'm mayda malların'ız ko'beyip, gu'mis-altınların'ız ha'm mal-du'nyan'ız artqanda,

¹⁴ menmen bolıp ketpen'ler! Sizlerdi Mısır elindegi qullıqtan alıp shıqqan Qudayın'ız Jaratqan İyeni umıtpan'lar!

¹⁵ Jaratqan İye sizlerdi za'ha'rli jılanlar ha'm shayanlarg'a tolı sol u'lken ha'm qorqınıshlı sho'lden, qurg'aq ha'm suwsız jerlerden alıp o'tti. Ol jerde sizler ushın jartastan suw shıg'ardı.

¹⁶ Ata-babaların'ız ko'rmegen manna menen sho'lde sizlerdi toydırdı. Aqıbetinde sizlerge jaqsılıq alıp keliw ushın, sizlerdi qıyınshılıqqa duwshar etip, sınadı.

¹⁷ Sizler: „Usı mal-du'nyanı o'z ku'sh-quwatım menen taptım“, – dep oylaman'lar.

¹⁸ Al sol mal-du'nyanı jıynawg'a sizlerge ku'sh-quwat bergen Qudayın'ız Jaratqan İye ekenin esin'izde tutın'lar. Ol ata-babaların'ız benen du'zgen kelisimine sadıq bolg'anı ushın, onı bu'gin orınlap atır.

¹⁹ Bu'gin men sizlerdi qatal eskertemen: eger Qudayın'ız Jaratqan İyeni umıtıp, basqa qudaylardın' izine erip ketsen'iz, olarg'a xızmet etip, aldında tabınsan'ız, onda so'zsiz joq bolıp ketesiz!

²⁰ Qudayın'ız Jaratqan İye sizlerdin' aldın'ızdan basqa xalıqlardı joq qılıp atırg'anınday, Og'an boysınbag'anın'ız ushın, sizlerdi de joq qıladı».