Nızamnın' qaytalanıwı 7 bob
1 «Qudayın'ız Jaratqan İye sizlerdi mu'lik etip alatug'ın jerin'izge alıp barg'anda, ko'p xalıqlardı – xet, girgash, amor, qanan, periz, xiw ha'm ebus xalıqların sizlerdin' aldın'ızdan quwıp shıg'aradı. Bul jeti xalıq sizlerden go're ko'p ha'm ku'shli.
2 Qudayın'ız Jaratqan İye bul xalıqlardı sizlerge ta'slim etkende, olardın' u'stinen jen'iske erisesiz. Sonda olardın' ha'mmesin tolıg'ı menen joq qılın'lar! Sol xalıqlar menen kelisim du'zben'ler, olardı ayaman'lar.
3 Olar menen quda-tamır bolıp, o'z qızların'ızdı olardın' ullarına turmısqa bermen'ler ha'm olardın' qızların ulların'ızg'a alıp bermen'ler.
4 Sebebi olar ul-qızların'ızdı Jaratqan İyeden ju'z burdıradı ha'm ul-qızların'ız basqa qudaylarg'a xızmet etetug'ın boladı. Sonda Jaratqan İye sizlerge g'a'zeplenip, sizlerdi sol waqıttın' o'zinde joq qılıp jiberedi.
5 5Kerisinshe, ol xalıqlarg'a mınaday qılın'lar: olardın' qurbanlıq orınların buzın'lar, kiyeli tasların sındırıp taslan'lar, kiyeli ag'ashların shawıp taslan'lar ha'm butların jag'ıp jiberin'ler.
6 O'ytkeni sizler Qudayın'ız Jaratqan İyenin' muxaddes xalqısız. Jer ju'zindegi barlıq xalıqlardın' arasınan Ol sizlerdi O'z g'a'ziynesi sıpatında tan'lap aldı.
7 Jaratqan İye sizlerdi basqa xalıqlardan ko'p bolg'anın'ız ushın su'yip, tan'lamadı. Sizler basqa barlıq xalıqlardan az edin'iz.
8 Al Jaratqan İye sizlerdi su'ygeni ushın ha'm ata-babaların'ızg'a ishken antın orınlaw ushın sizlerdi ku'shli qolı menen Mısırdag'ı qullıqtan, Mısır patshası faraonnın' qol astınan azat etti.
9 Solay etip, Qudayın'ız Jaratqan İye – haqıyqıy Quday ekenin bilip alın'lar. Ol sadıq Quday, O'zin su'yip, buyrıqlarına a'mel qılg'anlardın' mın'ınshı a'wladına deyin O'z kelisiminde sadıq qalıp, jaqsılıq qıladı.
10 Biraq O'zin jek ko'rgenlerdi bolsa, ekilenbesten joq etedi. Awa, olardı jazalawg'a keshikpeydi.
11 Sonın' ushın, bu'gin men sizlerge jetkerip atırg'an buyrıqlardı, qag'ıydalardı ha'm nızamlardı muqıyatlı tu'rde orınlan'lar».
12 «Eger de usı buyrıqlarg'a boysınıp, olardı tolıq orınlasan'ız, onda Qudayın'ız Jaratqan İye ata-babaların'ızg'a ant ishkenindey, sizler menen du'zgen kelisimine sadıq qaladı.
13 Ol sizlerge beremen dep, ata- babaların'ızg'a ant ishken elde sizlerdi su'yip, jarılqap, ko'beytedi. Sizlerdin' urpaqların'ızdı o'nip-o'stirip, jerin'izdin' zu'ra'a'tin, da'n o'nimlerin, jan'a sharaptı, za'ytu'n mayın, pada ha'm su'riwlerin'izdi mol qıladı.
14 Basqa xalıqlardan go're, sizler ko'p bereketli bolasız. Sizlerdin' aran'ızda na'silsiz erkek te, bala ko'termeytug'ın hayal da, qısır mal da bolmaydı.
15 Jaratqan İye sizlerdi ha'r tu'rli awırıw-sırqawlardan saqlaydı. Mısırda o'zlerin'iz ko'rgen qorqınıshlı keselliklerdin' hesh birin sizlerdin' basın'ızg'a salmaydı, al olardı dushpanların'ızg'a jiberedi.
16 Qudayın'ız Jaratqan İye sizlerge ta'slim qılatug'ın xalıqlardın' barlıg'ın qırıp taslan'lar, olardı ayap otırman'lar. Olardın' qudaylarına tabınban'lar. O'ytkeni olardın' qudayları sizler ushın duzaq boladı.
17 Sizler: „Bul xalıqlar bizlerden go're ju'da' ku'shli-g'o, olardı qalayınsha quwıp shıg'aramız?“ – dep oylap atırg'an shıg'arsız.
18 Biraq olardan qorqpan'lar. Qudayın'ız Jaratqan İyenin' faraong'a ha'm pu'tkil Mısır xalqına neler islegenin esin'izde saqlan'lar.
19 Qudayın'ız Jaratqan İyenin' sizlerdi Mısırdan shıg'arıw ushın, olarg'a jibergen ullı apatların, ko'rsetken ka'ramatların, tan' qalarlıq islerin, ku'shli ha'm qu'diretli qolın sozg'anın o'z ko'zin'iz benen ko'rdin'iz. Qudayın'ız Jaratqan İye ha'zir sizler qorqıp atırg'an usı xalıqlardın' ha'mmesine de solay isleydi.
20 Ha'tteki, sizlerden jasırınıp, aman qalg'anlarg'a da eshek ha'rre jiberip, olardı o'ltiredi.
21 Olardan qorqıp, qa'weterge tu'spen'ler. Sizlerdin' aran'ızdag'ı Qudayın'ız Jaratqan İye ullı ha'm aybatlı Qudaydur.
22 Ol usı xalıqlardı aldın'ızdan az-azdan quwadı. Sizler olardı birden joq qıla almaysız. Bolmasa, a'tirapın'ızdı jabayı haywanlar basıp ketedi.
23 Qudayın'ız Jaratqan İye sol xalıqlardı sizlerge ta'slim qıladı ha'm olardın' ha'mmesin albırawshılıq ishinde qaldırıp, joq qıladı.
24 Olardın' patshaların da sizlerge ta'slim qıladı. Sizler olardın' atların jer ju'zinen o'shirip taslaysız. Hesh kim sizlerge qarsı tura almaydı, sizler ha'mmesin qırıp taslaysız.
25 Olardın' qudaylarının' mu'sinlerin jag'ıp jiberin'ler. Sol mu'sinler qaplang'an gu'mis ha'm altıng'a qızıg'ıp, olardı o'zlerin'izge alman'lar. Eger alsan'ız, onda olar sizlerge duzaq boladı. Bul mu'sinler Qudayın'ız Jaratqan İyege jerkenishlidur.
26 Usı jerkenishli zatlardı u'yin'izge alıp barman'lar, bolmasa, olar sıyaqlı sizler de joq qılınasız. Sizler sol butlardı jek ko'rip, olardan jerkeniwin'iz kerek, sebebi olar g'arg'ıstın' astında bolıp, joq qılınıwı kerek».
