Nızamnın' qaytalanıwı 6 bob
1 «Bular Qudayın'ız Jaratqan İyenin' sizlerge u'yretiw ushın mag'an bergen buyrıqları, qag'ıydaları ha'm nızamları. İordan da'ryasınan o'tip, mu'lik etiw ushın baratırg'an elde olarg'a a'mel qılın'.
2 Men sizlerge berip atırg'an barlıq qag'ıyda ha'm buyrıqlarg'a o'zlerin'iz, balaların'ız ha'm balaların'ızdın' balaları da a'mel qılıp, o'mirin'izdin' aqırına deyin Jaratqan İyeden qorqıp jasan'. Sonda o'mirin'iz uzaq boladı.
3 3Ha'y, İzrail xalqı qulaq salın'! Bulardı muqıyatlı tu'rde orınlan'. Sonda atababaların'ızdın' Qudayı Jaratqan İyenin' sizlerge aytqanınday su't ha'm pal ag'ıp turg'an elde o'sip-o'nip ko'beyesiz ha'm abadan turmıs keshiresiz.
4 Ha'y, İzrail xalqı, qulaq salın'! Qudayımız Jaratqan İye – jalg'ız Jaratqan İyedur.
5 Qudayın'ız Jaratqan İyeni shın ju'regin'iz, jan-ta'nin'iz ha'm bar ku'shin'iz benen su'yin'.
6 Bu'gin men sizlerge berip atırg'an bul buyrıqlardı ju'rek to'rin'izde saqlan'.
7 Bulardı balaların'ızg'a da muqıyatlı tu'rde u'yretin'. U'yde otırg'anda da, jolda ju'rgende de, jatqanda da, turg'anda da usılar haqqında aytıp berin'.
8 Bulardı belgi qılıp, qolların'ızg'a baylap qoyın', man'layın'ızg'a nıshan sıpatında tag'ıp qoyın'.
9 U'yin'izdegi esigin'izdin' jaqlawlarına, qalaların'ızdın' da'rwazalarına jazıp qoyın'».
10 «Qudayın'ız Jaratqan İye ata-babaların'ız bolg'an İbrayımg'a, Isaqqa ha'm Yaqıpqa beremen dep ant ishken jerge sizlerdi alıp kiredi. Ol sizlerge o'zlerin'iz qurmag'an u'lken ha'm jaqsı qalalardı,
11 o'zlerin'iz jıynamag'an jaqsı mal-mu'liklerge tolı u'ylerdi, o'zlerin'iz miynet etip qazbag'an suw saqlag'ıshlardı, o'zlerin'iz ekpegen ju'zimzarlardı ha'm za'ytu'n bag'ların beredi. Ol jerde iship-jep toyasızlar.
12 Sol waqıtta abaylı bolın'lar! Sizlerdi Mısırdag'ı qullıqtan alıp shıqqan Jaratqan İyeni umıtpan'lar.
13 Qudayın'ız Jaratqan İyeden qorqın'lar. Tek g'ana Og'an xızmet etip, Onın' atı menen ant ishin'ler.
14 Basqa qudaylarg'a, do'geregin'izdegi xalıqlardın' qudaylarına ermen'ler.
15 Sebebi aran'ızda bolatug'ın Qudayın'ız Jaratqan İye qızg'anshaq Qudaydur. Eger Ol g'a'zeplense, sizlerdi jer ju'zinen joq qılıp jiberedi.
16 Massada islegenin'izdey, Qudayın'ız Jaratqan İyeni sınaman'lar.
17 Qudayın'ız Jaratqan İyenin' buyrıqların, sizlerge bergen ta'rtip ha'm qag'ıydaların birewin de qaldırmay orınlan'lar.
18 Jaratqan İyenin' na'zerinde durıs ha'm jaqsı bolg'an islerdi islen'ler. Sonda sizler abadan turmıs keshiresiz, Ol atababaların'ızg'a beremen dep ant ishken jaqsı jerdi mu'lik etip alasız.
19 Jaratqan İyenin' O'zi aytqanınday, Ol sizlerdin' barlıq dushpanların'ızdı ol jerden quwıp shıg'aradı.
20 Eger de keleshekte balaların'ız sizlerden: „Qudayımız Jaratqan İye usı ta'rtiplerdi, qag'ıydalardı ha'm nızamlardı sizlerge ne sebepten berdi?“ – dep sorasa,.
21 olarg'a bılay dep aytın'lar: „Bizler Mısırda faraonnın' qulı edik. Jaratqan İye bizlerdi ku'shli qolı menen ol jerden alıp shıqtı.
22 Ol bizlerdin' ko'z aldımızda Mısırg'a, faraong'a ha'm olardın' shan'araqlarına qarsı ullı, qorqınıshlı ka'ramatlar ha'm belgiler ko'rsetti.
23 Ol atababalarımızg'a ant iship, wa'de qılg'an jerge bizlerdi alıp keliw ushın ha'm ol jerdi bizlerge beriw ushın bizlerdi Mısırdan alıp shıqtı.
24 Bizlerdin' ba'rha baxıtlı o'mir su'riwimiz ha'm bu'gingidey tiri ju'riwimiz ushın, Qudayımız Jaratqan İye usı qag'ıydalardın' ha'mmesine a'mel qılıp, Onnan qorqıwımızdı buyırdı.
25 Qudayımız Jaratqan İyenin' aldında usı buyrıqlardı muqıyatlı tu'rde orınlasaq, bizler haq bolamız“»
