Nızamnın' qaytalanıwı 34 bob
1 Sonnan keyin, Muwsa oypatlıqtın' Moabqa tiyisli bo'leginen Erixo qalasına qarsı jaylasqan Nebo tawına, Pisga tawının' to'besine shıqtı. Jaratqan İye og'an pu'tkil eldi ko'rsetti: arqadag'ı Dan qalasına deyin sozılg'an Gilad jerin,
2 pu'tkil Naftaliy jerlerin, Efrayım ha'm Menashshe jerlerin, batıstag'ı ten'izge deyin sozılg'an pu'tkil Yahuda jerlerin,
3 qubladag'ı Negebti ha'm tegislikti. Bul Soar qalasına deyin sozılg'an Palma qalası dep atalg'an Erixo tegisligi.
4 Keyin Jaratqan İye Muwsag'a: «İbrayımg'a, Isaqqa ha'm Yaqıpqa: „Senin' urpag'ın'a beremen“ dep ant ishken el usı boladı. Mine, usı eldi ko'zlerin' menen ko'riwge mu'mkinshilik berdim, biraq sen ol jerge kirmeysen'», – dedi.
5 Solay etip, Jaratqan İyenin' aytqanınday, Onın' qulı Muwsa sol Moab elinde qaytıs boldı.
6 Jaratqan İye onı Beyt-Peorg'a qarama-qarsı jaylasqan Moabtag'ı oypatlıqqa ko'mdi. Muwsanın' qa'biri qay jerde ekenligin bu'ginge deyin hesh kim bilmeydi.
7 Muwsa qaytıs bolg'anda, bir ju'z jigirma jasta edi. Degen menen, onın' ko'zi de ha'lsizlenbegen, ku'shg'ayratı da qaytpag'an edi.
8 İzraillılar oypatlıqtın' Moabqa tiyisli bo'leginde Muwsanı joqlap otız ku'n aza tuttı. Keyin Muwsa ushın azalaw ku'nleri tamam boldı.
9 Nun ulı Eshua danalıq ruwxı menen tolg'an edi. O'ytkeni Muwsa o'liminen aldın og'an qolların qoyıp, onı jolbasshı etip tayınlag'an edi. İzraillılar og'an qulaq salıp, Jaratqan İyenin' Muwsa arqalı bergen buyrıqlarına a'mel qıldı.
10 İzrailda sol ku'nnen bu'ginge deyin, Muwsag'a uqsag'an payg'ambar bolmadı. Sebebi Jaratqan İye Muwsa menen ju'zbe-ju'z ko'risip, so'ylesetug'ın edi.
11 Jaratqan İye onı Mısırda faraong'a, onın' xızmetkerlerine ha'm pu'tkil Mısır xalqına O'z ka'ramat ha'm belgilerin ko'rsetiw ushın jibergen edi.
12 Muwsa pu'tkil İzrail xalqının' ko'z aldında qu'diretli, ullı ha'm qorqınıshlı isler islegen edi.
