Nızamnın' qaytalanıwı 32 bob
1 «Ha'y, aspan, qulaq sal, men aytayın, Ha'y, jer ju'zi awzımnan shıqqan so'zlerdi tın'la!
2 Ta'limim jawınday jawsın, So'zlerim shıq yan'lı tu'ssin, Maysa sho'plerge tu'sken jawın tamshısınday, Ot-sho'plerge quyatug'ın mol jawınday bolsın.
3 Jaratqan İyenin' atın ja'riyalayman, Maqtan'lar Qudayımızdın' ullılıg'ın!
4 Ol menin' qorg'awshı jartasımdur, Onın' isleri minsizdur, Barlıq jolları a'dildur. Nahaqlıq qılmaytug'ın sadıq Qudaydur. Ol a'dil ha'm haqıyqatdur.
5 Biraq bul buzıq ha'm turaqsız a'wlad, Og'an sadıq qalmadı. Sonın' ushın, Onın' balaları emesdur. Bul olardın' shermendeligidur.
6 Jaratqan İyenin' jaqsılıg'ın usılay qaytarasız ba, Ha'y, aqmaq ha'm aqılsız xalıq? Ol sizlerdi jaratıp, pishim bergen, A'ken'iz bolg'an Jaratıwshın'ız emes pe?!
7 A'yyemgi zamandı eslen', O'tken urpaqlardı oylan', A'ken'izden soran', ol sizlerge aytıp berer, G'arrılar sizlerge bayanlap berer.
8 Quday Taala xalıqlarg'a u'les jerlerin berip, Adamzattı milletlerge bo'lip tarqatqanda, Xalıqlardın' shegaraları, İla'hiy barlıqlardın' sanına qaray belgilendi.
9 Al Jaratqan İyenin' u'lesi O'z xalqıdur, Yaqıp urpag'ı Onın' payına tu'sken mu'lkidur.
10 Jaratqan İye İzraildı sho'lden, Izg'ırg'an qula du'zden tawıp aldı, Onı orap alıp, g'amxorlıq qıldı, Ko'zinin' qarashıg'ınday etip qorg'adı.
11 İnindegilerin oyatıp atırg'an, O'z palapanların do'gereklep aylang'an, 2 Qanatların jayıp, palapanların ko'tergen, Qanatları u'stinde olardı alıp ju'rgen bu'rkittey,
12 Jaratqan İye jalg'ız O'zi İzraildı alıp ju'rdi, Jat qudaydın' hesh qanday ja'rdemisiz.
13 İzraildı jerdin' tawlı u'lkesine otırg'ızdı, Atızdın' o'nimi menen toydırdı. Onı jartastan aqqan pal menen, Taslı jerden shıqqan za'ytu'n mayı menen ta'miyinledi.
14 Sıyırlardın' qatıg'ı, eshkilerdin' su'ti menen, Semiz qozılar, Bashannın' en' jaqsı qoshqar ha'm tekeleri menen, En' sapalı biyday menen onı ta'miyinledi. Ju'zimnen islengen qızıl qanday sharabınan ishkizdi.
15 Eshurun semirdi de, o'jetlenip tepkilendi, Qarnı toydı ha'm may baylap, jıltırap ketti, O'zin jaratqan Qudaydı taslap ketip, Qutqarıwshı jartasın mensinbedi.
16 Basqa qudaylarg'a tabınıp, Qudaydın' qızg'anıshın oyattı, Jerkenishli butları menen Onı g'a'zepke mindirdi.
17 Olar quday bolmag'an jinlerge, O'zleri tanımag'an basqa qudaylarg'a, Ata-babaları qorqpag'an, keyin payda bolg'an, Taza qudaylarg'a qurbanlıq berdi.
18 Seni tuwg'an Jartastı eslemedin', Seni du'nyag'a keltirgen Qudaydı umıtıp kettin'.
19 Jaratqan İye bulardı ko'rip, olardan ju'z burdı, O'ytkeni O'z ul-qızları Onın' g'a'zebine tiydi.
20 Ol bılay dedi: „Bul xalıqtan ju'zimdi jasıraman, Olardın' aqıbeti ne bolatug'ının ko'remen. Sebebi olar turaqsız na'sil, opasız balalardur.
21 Olar quday bolmag'an butları menen, Menin' qızg'anıshımdı oyattı, Jaramsız butları menen Menin' g'a'zebime tiydi. Men de xalıq bolmag'an bir xalıq penen, Olardın' qızg'anıshın oyataman. Aqılsız bir xalıq penen, olardın' g'a'zebine tiyemen.
22 Sebebi sizlerge qarsı g'a'zebim ottay lawlap, O'liler ma'kanının' tu'pkirine deyin janıp ketti, Ol jer ju'zin ha'm onın' o'nimlerin ku'ydirip joq etedi, Tawlardın' negizgi tırnaqların jandırıp jiberedi.
23 Olardın' basına apat jawdıraman, Oqlarımdı olarg'a qarsı tolıq jumsayman.
24 Ashlıq olardın' din'kesin qurtadı, Isıtpa keselligi janıp ku'ydiredi, Oba olardın' janın aladı. Jırtqısh haywanlardı jiberemen olarg'a qarsı, Jer bawırlawshılar za'ha'rin shashadı.
25 Ko'shelerde jigit ha'm qızlardı qılısh o'ltiredi, U'ylerinde qorqınısh biylik qıladı, Emiziwli bala da, aq shashlı g'arrılar da aman qalmaydı.
26 Olardı tas-talqan eter edim, Adamlardın' arasınan olardın' atların o'shirip taslar edim.
27 Biraq dushpanlar maqtanıp ju'rmesin, Olar nadurıs tu'sinbesin, dedim. Bulardın' barlıg'ın islegen Jaratqan İye emes, Bizler o'zlerimiz jen'iske eristik, – dep oylamasın dedim“.
28 İzrail aqılın joytqan xalıqdur, Olarda hesh qanday sezim joqdur.
29 Qa'nekey, olarda aqıl bolg'anda, tu'siner edi, Aqıbeti ne bolatug'ının biler edi!
30 Qorg'awshı Jartası olardı satpag'anda, Jaratqan İye O'z xalqın jawg'a ta'slim etpegende, Dushpannın' bir adamı mın' izraillını quwa alar ma edi? Eki adamı on mın' adamdı quwg'ın qıla alar ma edi?
31 Ha'tteki, moyınlaydı dushpanlarımız, Jartasımızdın' uqsamaytug'ının olardın' jartasına.
32 Olardın' ju'zim shaqaları Sodom shaqasınan, Bag'ları Gomora bag'larınandur. Ju'zim miyweleri za'ha'rge tolı, Ashshıdur ju'zim solqımları.
33 Sharapları jılannın' za'ha'ri, Kobranın' o'ltiretug'ın uwıdur.
34 Jaratqan İye bılay deydi: „İzrail dushpanlarının' jawızlıqların dizip qoydım, Olardı jazalaw ushın, g'a'ziyneme mo'rlep qoydım.
35 O'sh alıw Menin' qolımda, sazayın O'zim beremen, Waqtı kelgende, olardın' ayaqları tayadı, Jaqındur olardın' qulaytug'ın ku'ni, Jaza ku'ni ju'da' jaqın qaldı“.
36 Jaratqan İye O'z xalqının' huqıqın qorg'aydı, Olardın' ku'shi ha'lsizlenip, Elde qul ha'm erkli adamlardın' aman qalmag'anın ko'rgende, Olarg'a janı ashıydı.
37 Sonda Jaratqan İye O'z xalqına bılay deydi: „İsengen qudayların'ız qay jerde? Sizlerdin' pana tapqan jartasın'ız qa'ne?
38 Qurbanlıqların'ızdın' mayın jegen, İshimlik sadaqaların'ızdı ishken, Qayaqta sol bir qudayların'ız? Endi olar kelip, sizlerge ja'rdem bersin! Sizlerdi solar qorg'asın!
39 Bilip qoyın'lar, jalg'ız Men Qudayman, Mennen basqa quday joqdur! O'ltiretug'ın da, tiriltetug'ın da Men, Jaraqatlaytug'ın da, shıpa beretug'ın da Men bolaman. Hesh kim Menin' qolımnan qutıla almas.
40 Qolımdı aspang'a ko'teremen, Ma'n'gi bar Bolıwshı atım menen ant ishemen:
41 Men jaltıldag'an qılıshımdı qayrayman, A'dillik ornatıw ushın, onı qolıma alaman, Solay etip, dushpanlarımnan o'sh alaman, Meni jek ko'rgenlerdi jazalayman.
42 Oqlarımdı qan menen ma's etemen, Qılıshımdı et penen toydıraman. O'likler ha'm tutqınlardın' qanı ag'adı, Dushpan basshılarının' basları kesiledi“.
43 Ha'y, xalıqlar, Onın' xalqın qutlıqlan'lar, O'ytkeni Ol qullarının' qanının' qunın talap qılar. Dushpanlarınan o'sh alıp, O'z xalqının' elin pa'kler».
44 Muwsa Nun ulı Eshua menen birge kelip, usı jırdı xalıqqa aytıp berdi.
45 Muwsa usı so'zlerdin' ha'mmesin pu'tkil İzrail xalqına aytıp bolg'annan keyin,
46 olarg'a bılay dedi: «Bu'gin men sizlerge jetkergen usı so'zlerdin' ha'mmesin ju'regin'izde saqlan'. Usı nızamnın' barlıq so'zlerin muqıyatlı tu'rde orınlan', dep balaların'ızg'a buyırın'.
47 Bular bos so'zler emes, al sizlerdin' o'mirin'izdur. İordan da'ryasınan o'tip, mu'lik etetug'ın elde usı so'zlerdin' sayasında sizlerdin' o'mirin'iz uzaq boladı».
48 Jaratqan İye sol ku'ni Muwsag'a bılay dedi:
49 «Moab elindegi Erixonın' qarsısındag'ı Abarim tawlarının' biri bolg'an Nebo tawına shıq. Sol jerden Men İzrail xalqına mu'lik etip berip atırg'an Qanan jerine qara.
50 A'jag'an' Xaron Hor tawında o'lip, ata-babalarına qosılg'anı sıyaqlı, sen de usı tawg'a shıg'ıp, o'lesen' ha'm ata-babaların'a qosılasan'.
51 Sebebi ekewin'iz de Zin sho'linde, Qadeshtegi Meriba suwlarında izraillılardın' aldında Mag'an opasızlıq qılıp, muxaddesligimdi ta'n almadın'ız.
52 Sonın' ushın, sen Men İzrail xalqına berip atırg'an jerdi tek uzaqtan ko'resen', biraq og'an kirmeysen'».
