Nızamnın' qaytalanıwı 31 bob

Eshuanın' Muwsanın' ornına tayınlanıwı(1-8),Ha'r jeti jılda nızamnın' oqılıwı(9-13),Jaratqan İyenin' Muwsag'a bergen en' son'g'ı buyrıg'ı(14-29),Muwsanın' jırı(30).

¹ Muwsa pu'tkil İzrail xalqına joqarıdag'ı so'zlerdi aytıp bolg'annan keyin,

² bılay dedi: «Ha'zir men bir ju'z jigirma jastaman. Bunnan bılay, men sizlerge basshılıq ete almayman. Onnan qala berse, Jaratqan İye mag'an: „İordan da'ryasının' arg'ı jag'ına o'tpeysen'“, – dep aytqan ed.

³ Sizler Qudayın'ız Jaratqan İyenin' basshılıg'ında İordannın' arg'ı jag'ına o'tesiz. Ol sol jerde jasaytug'ın xalıqlardı joq qıladı. Sizler olardın' ellerin mu'lik etip, iyelep alasız. Jaratqan İyenin' so'zi boyınsha Eshua sizlerge basshılıq qıladı.

⁴ Jaratqan İye amor xalqının' patshaları Sixon menen Ogtı o'ltirip, olardın' elin joq qılg'anınday, usı xalıqlardı da joq qıladı

⁵ Jaratqan İye olardı sizlerge ta'slim qıladı. Olarg'a men sizlerge buyırg'anımday islen'ler.

⁶ Ku'shli ha'm batır bolın'lar! Olardan qorqıp, seskenip ju'rmen'ler. O'ytkeni Qudayın'ız Jaratqan İye sizler menen birge baradı. Ol sizlerdi ta'rk etpeydi ha'm taslap ketpeydi».

⁷ Sonnan keyin, Muwsa Eshuanı shaqırıp alıp, pu'tkil izraillılardın' aldında og'an bılay dedi: «Ku'shli ha'm batır bol! Sebebi sen Jaratqan İye ata-babaların'ızg'a beremen dep ant ishken elge bul xalıq penen birge barasan' ha'm eldi mu'lik etip, olarg'a sen beresen'.

⁸ Jaratqan İyenin' O'zi senin' aldın'da ju'rip, sag'an yar boladı. Ol seni ta'rk etpeydi ha'm taslap ketpeydi. Qorqpa ha'm qa'weterlenbe».

⁹ Muwsa usı nızamdı jazıp, Jaratqan İyenin' Kelisim sandıg'ın alıp ju'rgen lebiyli ruwxaniylerge ha'm İzrail xalqının' barlıq aqsaqallarına berdi.

¹⁰ Keyin Muwsa olarg'a bılay dep buyırdı: «Ha'r jetinshi jıldın', qarızlar keship jiberiletug'ın jıldın' aqırında, Qos bayramında usı nızamdı oqın'lar.

¹¹ Qudayın'ız Jaratqan İyenin' tan'lag'an jerinde, Onın' aldında jıynalg'an pu'tkil İzrail xalqına usı nızamdı oqıp berin'ler.

¹² Barlıq erkeklerdi, hayallardı, balalardı ha'm qalaların'ızda jasap atırg'an kelgindilerdi jıynan'. Solay etip, olardın' ha'r biri onı esitip, u'yrenip alsın ha'm Qudayın'ız Jaratqan İyeden qorqsın. Usı nızamnın' barlıq so'zlerin muqıyatlı tu'rde orınlasın.

¹³ Nızamdı bilmeytug'ın urpaqların'ız da esitsin. Solay etip, sizler mu'lik etetug'ın İordan da'ryasının' arg'ı jag'ındag'ı elde, olar o'miri dawamında Qudayın'ız Jaratqan İyeden qorqıwdı u'yrensin».

¹⁴ Jaratqan İye Muwsag'a: «Senin' o'limin' jaqınlap qaldı, Eshuanı shaqır ha'm ekewin'iz de Ushırasıw shatırına kelin'. Men og'an orınlaytug'ın wazıypaların tapsıraman», – dedi. Muwsa menen Eshua Ushırasıw shatırına barıp turdı.

¹⁵ Keyin Jaratqan İye minara sıyaqlı bult ishinde ko'rindi. Bult shatırdın' kirer awzının' aldında turdı.

¹⁶ Jaratqan İye Muwsag'a bılay dedi: «Jaqında o'lip, ata-babaların'a qosılasan'. Al bul xalıq o'zleri kiretug'ın elde Mag'an opasızlıq qıladı, sol eldin' qudaylarına erip, xızmet etip ketedi. Olar Mennen bas tartıp, olar menen du'zgen kelisimimdi buzadı.

¹⁷ Sonda Men olarg'a g'a'zeplenip, taslap ketemen ha'm olardan ju'zimdi jasıraman. Olar basqalarg'a an'sat olja bolıp qaladı. Baslarına sansız qayg'ılar ha'm apatlar kelgen ku'ni, olar: „Usı qayg'ılardın' basımızg'a tu'siwi Qudayımız bizler menen birge bolmag'anı ushın emes pe?“ – deydi.

¹⁸ Basqa qudaylarg'a erip, qılg'an jawızlıqları ushın, sol ku'ni Men so'zsiz olardan ju'zimdi jasıraman.

¹⁹ Endi o'zlerin'iz ushın mına jırdı jazıp alın', onı izraillılarg'a u'yretin' ha'm olar yadlap alsın. Solay etip, bul jır izraillılarg'a qarsı Menin' gu'walıg'ım bolsın.

²⁰ Men ata-babalarına ant ishkenimdey, olardı su't ha'm pal ag'ıp turg'an elge alıp kiremen. Olar iship-jep toyınıp, semiredi de, basqa qudaylarg'a eredi ha'm olarg'a xızmet etip ketedi. Olar Meni ko'zge ilmey bas tartıp, kelisimimdi buzadı

²¹ Al baslarına sansız qayg'ı ha'm apatlar tu'skende, bul jır olarg'a qarsı gu'walıq boladı. Sebebi olardın' a'wladları bul jırdı umıtpaytug'ın boladı. Men beremen dep ant ishken elge olardı alıp kelmesimnen aldın, olardın' qanday niyetleri bar ekenin bilemen».

²² Sol ku'ni Muwsa usı jırdı jazıp alıp, izraillılarg'a u'yretti.

²³ Jaratqan İye Nun ulı Eshuag'a mınaday buyrıq berdi: «Ku'shli ha'm batır bol! Sen İzrail xalqın Men olarg'a beremen dep ant ishken elge alıp barasan'. Men senin' menen birge bolaman»

²⁴ Muwsa nızamnın' barlıq so'zlerin aqırına deyin orama kitapqa jazıp bolg'annan keyin,

²⁵ Jaratqan İyenin' Kelisim sandıg'ın alıp ju'rgen lebiylilerge mına buyrıqtı berdi:

²⁶ «Mına Nızam kitabın alıp, Qudayın'ız Jaratqan İyenin' Kelisim sandıg'ının' janına qoyın'. Bul ol jerde sizlerge qarsı gu'walıq bolıp tursın.

²⁷ Sebebi men sizlerdin' qozg'alan'shı ha'm qaysar ekenin'izdi jaqsı bilemen. Bu'gin men sizlerdin' aran'ızda tiri bolg'anımnın' o'zinde Jaratqan İyege qarsı shıg'ıp atırsız, al o'lgenimnen keyin, bunnan da beter bolasız.

²⁸ Endi urıwların'ızdın' barlıq aqsaqalların ha'm qadag'alawshıların mag'an shaqırıp kelin'ler. Olarg'a usı so'zlerdi aytayın. Aspan ha'm jer olarg'a qarsı gu'wa bolsın.

²⁹ Menin' o'limimnen son', sizlerdin' azg'ırılıwg'a tu'setug'ının'ızdı, sizlerge buyırg'an joldan shıg'ıp ketetug'ının'ızdı bilemen. Waqıttın' o'tiwi menen baxıtsızlıqqa duwshar bolasız. O'ytkeni sizler Jaratqan İyenin' na'zerinde jawız bolg'an islerdi islep, Onın' g'a'zebin keltiresiz».

³⁰ Sonnan keyin, Muwsa pu'tkil İzrail ja'miyetine mına jırdı aqırına deyin aytıp berdi: