Nızamnın' qaytalanıwı 30 bob
1 «Men sizlerge aytqan usı barlıq jarılqawlar yamasa na'letler basın'ızg'a tu'skende, Qudayın'ız Jaratqan İye sizlerdi tarqatıp jibergen xalıqlardın' arasında usılardı esin'izge tu'siresiz.
2 Sol waqıtta bu'gin sizlerge buyırg'anımday, sizler ha'm urpaqların'ız Qudayın'ız Jaratqan İyege qaytıp, shın ju'regin'iz ha'm jan-ta'nin'iz benen Og'an qulaq salsan'ız,
3 Qudayın'ız Jaratqan İye sizlerge rehim qılıp, burıng'ı abadanshılıg'ın'ızdı tikleydi. Sizlerdi arasına tarqatıp jibergen xalıqlardın' ishinen qaytadan jıynap aladı.
4 Du'nyanın' basqa shetine su'rgin bolsan'ız da, Qudayın'ız Jaratqan İye sizlerdi jıynap, qaytarıp alıp keledi.
5 Sizlerdi ata-babaların'ızdın' mu'lik etip alg'an eline alıp keledi. Sol jerdi mu'lik etip alg'anın'ızda, Qudayın'ız Jaratqan İye sizlerge jaqsılıq alıp keledi ha'm sizlerdi ata-babaların'ızdan da go're ko'beytedi.
6 Sizlerdin' ha'm urpaqların'ızdın' ju'reklerin o'zgertedi. Sonda Onı shın ju'regin'iz ha'm jan-ta'nin'iz benen su'yip, o'mirge iye bolasız.
7 Qudayın'ız Jaratqan İye barlıq na'letlerdi sizlerdi jek ko'rip, quwdalag'an dushpanların'ızdın' u'stine jawdıradı.
8 Sizler Jaratqan İyenin' so'zine ja'ne qulaq salıp, bu'gin men sizlerge berip atırg'an buyrıqlardın' ha'mmesine a'mel qılasız.
9 Qudayın'ız Jaratqan İye sizlerdi qol urg'an ha'r bir isin'izde tabıslı qıladı. Sizler u'birli-shu'birli bolasız, malların'ız ko'beyedi ha'm jerlerin'izdin' o'nimi mol boladı. Jaratqan İyenin' atababaların'ızdan qanshelli kewli tolg'an bolsa, sizlerden de sonshelli kewli toladı ha'm sizlerdi tabısqa eristiredi.
10 Biraq Qudayın'ız Jaratqan İyege qulaq salın', usı Nızam kitabında jazılg'an Onın' buyrıqlarına, qag'ıydalarına a'mel qılıp, shın ju'regin'iz ha'm jan-ta'nin'iz benen Jaratqan İyege qaytın'.
11 Bu'gin men sizlerge berip atırg'an buyrıq sizler ushın qıyın emes yamasa sizler jetip bara almaytug'ınday uzaqta emes.
12 Sizler: „Bizler buyrıqtı tın'lap, onı orınlawımız ushın, kim aspang'a shıg'ıp, onı alıp keledi?“ – dep aytatug'ınday, ol aspanda emes.
13 Sizler: „Bizler buyrıqtı tın'lap, onı orınlawımız ushın, kim ten'izdin' arg'ı jag'ına barıp, onı alıp keledi?“ – dep aytatug'ınday, ol ten'izdin' arg'ı jag'ında da emes.
14 Kerisinshe, Qudaydın' so'zi sizlerge ju'da' jaqın, orınlawın'ız ushın, ol sizlerdin' awzın'ızda ha'm ju'regin'izde.
15 Mine, bu'gin men sizlerdin' aldın'ızg'a o'mir menen iygilikti, o'lim menen jawızlıqtı qoyıp atırman.
16 Bu'gin men sizlerge Qudayın'ız Jaratqan İyeni su'yiwdi, Onın' jolı menen ju'riwdi, buyrıqlarına, qag'ıydalarına ha'm nızamlarına a'mel qılıwdı buyıraman. Sonda sizler aman jasaysız, ko'beyesiz ha'm mu'lik etiw ushın baratırg'an elde Qudayın'ız Jaratqan İye sizlerdi jarılqaydı.
17 Biraq, eger de sizler ju'regin'izdi basqa jaqqa burıp, bularg'a qulaq salmay, joldan azg'ırılsan'ız ha'm basqa qudaylarg'a tabınıp, xızmet etsen'iz,
18 onda sizlerge so'zsiz joq bolatug'ının'ızdı bildiremen. İordan da'ryasınan o'tip, mu'lik etip alatug'ın elde ko'p jasamaysız.
19 Bu'gin men sizlerge o'mir yamasa o'limdi, jarılqaw yamasa na'letti tan'law mu'mkinshiligin berdim. Bug'an aspan menen jerdi sizlerge qarsı gu'wa etip qoyaman. O'mirdi tan'lan', sonda sizler de, balaların'ız da jasaysız.
20 Qudayın'ız Jaratqan İyeni su'yin', Onın' so'zine qulaq salıp, Og'an sadıq bolın'. O'ytkeni Ol sizlerdin' o'mirin'izdur. Jaratqan İye atababaların'ız İbrayım, Isaq ha'm Yaqıpqa beremen, dep ant ishken elde sizlerdin' o'mirin'iz uzaq boladı».
