Nızamnın' qaytalanıwı 29 bob
1 Jaratqan İye izraillılar menen Xoreb tawında du'zgen kelisiminen tısqarı, Moabta izraillılar menen kelisim du'ziwdi Muwsag'a buyırdı. Bul kelisim to'mendegiden ibarat:
2 Muwsa pu'tkil İzrail xalqın bir jerge jıynap, olarg'a bılay dedi: «Jaratqan İyenin' Mısırda ko'z aldın'ızda faraong'a, onın' xızmetkeri menen xalqına ne islegenlerin ko'rdin'iz.
3 Onın' jibergen ullı apatların, belgilerin ha'm qu'diretli ka'ramatların o'z ko'zin'iz benen ko'rdin'iz.
4 Degen menen, Jaratqan İye usı ku'nge deyin sizlerge tu'sinetug'ın ju'rek, ko'retug'ın ko'z ha'm esitetug'ın qulaq bermedi.
5 Ol sizlerdi qırıq jıl sho'lde alıp ju'rdi. Sonda sizlerdin' u'st kiyimin'iz de, ayaq kiyimin'iz de tozbadı.
6 Jegenin'iz nan emes, ishkenin'iz sharap yamasa basqa da o'tkir ishimlik emes edi. Bulardın' barlıg'ın Onın' Qudayın'ız Jaratqan İye ekenin tu'siniwin'iz ushın qıldı.
7 Usı jerge kelgenimizde, Xeshbon patshası Sixon menen Bashan patshası Og bizlerge qarsı urıs ashtı. Biraq olardı jen'iliske ushırattıq.
8 Olardın' jerlerin iyelep, Ruben, Gad urıwlarına ha'm Menashshe urıwının' yarımına mu'lik etip berdik.
9 Endi ha'r bir isin'izde tabıslı bolıwın'ız ushın, usı kelisim sha'rtlerin muqıyatlı tu'rde orınlan'lar.
10 Bu'gin ha'mmen'iz – urıw basshıların'ız, aqsaqalların'ız, qadag'alawshıların'ız, pu'tkil İzrail erkekleri, balaların'ız,
11 hayalların'ız ha'm aran'ızda jasap atırg'an otının'ızdı shabatug'ın ha'm suwın'ızdı tasıytug'ın kelgindiler Qudayın'ız Jaratqan İyenin' aldında turıpsız.
12 Bu'gin Qudayın'ız Jaratqan İyenin' sizler menen du'zetug'ın kelisiminin' ku'shke miniwi ushın, onı ant iship tastıyıqlaw ushın usı jerde turıpsız.
13 Solay etip, Ol ata-babaların'ız İbrayımg'a, Isaqqa ha'm Yaqıpqa ant iship, sizlerge wa'de bergenindey, bu'ginnen baslap, Ol sizlerdi O'z xalqı etip belgilesin ha'm sizlerdin' Qudayın'ız bolsın.
14 Mine, Jaratqan İye ant penen du'zetug'ın kelisimin usı jerde bizler menen birge Onın' aldında turg'an tek g'ana sizler menen emes,
15 al ele du'nyag'a kelmegen a'wladların'ız benen de du'zip atır.
16 Mısırda qalay jasag'anımızdı, basqa xalıqlardın' jerlerinen qalay o'tip kelgenimizdi o'zlerin'iz de bilesiz.
17 Olardın' ag'ashtan, tastan, gu'misten ha'm altınnan islengen jerkenishli butların ko'rdin'iz.
18 Abaylı bolın'lar, sizlerdin' aran'ızda sol xalıqlardın' qudaylarına tabınıw ushın, Qudayımız Jaratqan İyeden ju'z buratug'ın erkek yamasa hayal, tiyre yamasa urıw bolmasın. Aran'ızda bunday za'ha'r ha'm ashshı miywe beretug'ın tamır bolmasın.
19 Aran'ızda hesh bir adam usı kelisimdegi na'letlerdi esitip turıp, kewlinde: „O'z qa'lewim boyınsha jasasam da, baxıtlı bolaman“, – dep oylamasın. Bunday pikir ha'mmen'izdin' basın'ızg'a apat alıp keledi.
20 Jaratqan İye bunday adamdı keshirmeydi. Jaratqan İyenin' g'a'zebi ha'm qızg'anıshı ol adamg'a qarsı lawlap janadı. Usı kitapta jazılg'an barlıq na'letler onın' basına jawıp, Jaratqan İye onın' atın jer ju'zinen o'shirip taslaydı.
21 Usı Nızam kitabında jazılg'an kelisimdegi barlıq na'letler boyınsha, Jaratqan İye onı İzrail urıwlarının' arasınan jazalaw ushın ayırıp aladı.
22 Keleshek a'wladlar, balaların'ız ha'm uzaq elden kelgen jat jerli adamlar Jaratqan İyenin' usı elge jibergen apatların ha'm keselliklerdi ko'redi
23 Pu'tkil eldi otlı ku'kirt ha'm duz ku'ydirip taslaydı. Jerge hesh na'rse egip te bolmaydı, hesh na'rse o'sip te shıqpaydı, hesh qanday sho'p te ko'germeydi. Elin'iz Jaratqan İyenin' lawlag'an g'a'zebinen jer menen jeksen bolg'an Sodom, Gomora, Adma ha'm Seboyım sıyaqlı bolıp qaladı.
24 Pu'tkil xalıqlar: „Jaratqan İye bul elge ne ushın bunday qıldı? Bunday g'a'zeptin' to'giliwinin' sebebi nede eken?“ – deydi.
25 Sonda olarg'a mınaday juwap boladı: „Bul xalıq ata-babalarının' Qudayı Jaratqan İyenin' kelisiminen bas tarttı. Jaratqan İye olardı Mısırdan alıp shıqqanda, olar menen usı kelisimdi du'zgen edi.
26 Olar o'zleri tanımag'an, Jaratqan İye o'zlerine u'les qılıp bermegen basqa qudaylarg'a xızmet etip, tabınıp ketti.
27 Sol sebepli Jaratqan İyenin' g'a'zebi qaynap, usı kitapta jazılg'an barlıq na'letlerdi usı elge jawdırdı.
28 Ol qattı ashıwlanıp, ku'shli g'a'zebi menen olardı o'z elinen suwırıp alıp, bu'gin ko'rip turg'anın'ızday, basqa elge ılaqtırıp jiberdi. Olar bu'ginge deyin sol ellerde jasap atır“.
29 Jasırın qılmıslar Qudayımız Jaratqan İyege tiyisli. Biraq ashılg'an qılmıslardı usı nızamnın' sha'rtleri boyınsha jazalaw ma'n'gige bizlerge ha'm urpaqlarımızg'a tapsırılg'an».
