Nızamnın' qaytalanıwı 28 bob
1 «Eger Qudayın'ız Jaratqan İyenin' so'zine qulaq salıp, bu'gin men sizlerge jetkerip atırg'an Onın' barlıq buyrıqların muqıyatlı tu'rde orınlasan'ız, Ol sizlerdi jer ju'zindegi pu'tkil xalıqlardan joqarı qıladı.
2 Qudayın'ız Jaratqan İyenin' so'zin tın'lasan'ız, u'stin'izge mına bereketler jawadı ha'm bereketli bolasız:
3 Qalada da, atızda da bereketli bolasız.
4 U'birli-shu'birli bolıp jarılqanasız. Jerin'izdin' zu'ra'a'ti mol boladı, malların'ızdın' to'lleri – pada ha'm su'riwlerin'izdin' buzawları menen qozıları ko'p boladı.
5 Da'n sebetlerin'iz ha'm qamır tabaqların'ız bereketli boladı.
6 U'yde de, du'zde de ha'r bir isin'iz bereketli boladı.
7 Jaratqan İye sizlerge hu'jim qılg'an dushpanların'ızdı jen'iliske ushıratadı. Olar sizlerge bir ta'repten hu'jim etse, sizlerden tumlı-tusqa qashıp ketedi.
8 Jaratqan İyenin' buyrıg'ı menen g'a'llexanan'ız tolı boladı. Qol urg'an ha'r bir isin'izdi Jaratqan İye bereketleydi. Qudayın'ız Jaratqan İye sizlerge berip atırg'an elde sizlerdi jarılqaydı.
9 Qudayın'ız Jaratqan İyenin' buyrıqlarına a'mel qılıp, Onın' jolları menen ju'rsen'iz, Jaratqan İye sizlerge ant ishkenindey, sizlerdi O'zinin' muxaddes xalqı qıladı.
10 Jer ju'zindegi barlıq xalıqlar sizlerdin' Jaratqan İyege tiyisli ekenin'izdi ko'rip, sizlerden qorqatug'ın boladı.
11 aratqan İye sizlerge beremen dep, ata-babaların'ızg'a ant ishken elde molshılıqta jasawın'ızdı ta'miyinleydi. U'birli-shu'birli bolasız, malların'ızdın' to'lleri ko'beyedi ha'm jerin'izdin' zu'ra'a'ti mol boladı.
12 Jaratqan İye elin'izge o'z waqtında jawın jawdırıw ushın aspandag'ı bay g'a'ziynesin ashadı ha'm qol urg'an ha'r bir isin'izge bereket beredi. Ko'p xalıqlarg'a qarız beresiz, o'zlerin'iz bolsa, qarız almaytug'ın bolasız.
13 Bu'gin men sizlerge jetkerip atırg'an Qudayın'ız Jaratqan İyenin' buyrıqların tın'lap, olardı muqıyatlı tu'rde orınlasan'ız, Ol sizlerdi quyrıq emes, al bas qıladı. Sizler to'mende emes, al joqarıda bolasız.
14 Bu'gin men sizlerge jetkerip atırg'an buyrıqlardan on'g'a da, solg'a da shıg'ıp ketpen'ler, basqa qudaylarg'a erip, olarg'a tabınban'lar».
15 «Biraq, eger de Qudayın'ız Jaratqan İyenin' so'zine qulaq salmay, bu'gin men sizlerge jetkerip atırg'an Onın' barlıq buyrıqların ha'm qag'ıydaların muqıyatlı tu'rde orınlamasan'ız, mına na'letler basın'ızg'a tu'sedi:.
16 Qalada da, atızda da na'letli bolasız.
17 Da'n sebetlerin'iz ha'm qamır tabaqların'ız na'letli boladı.
18 Ul-qızg'a zar bolıp, jerin'iz zu'ra'a'tsiz, sıyırların'ız ha'm su'riwlerin'iz ko'beymey, na'letiy bolasız.
19 U'yde de, du'zde de ha'r bir isin'iz na'letiy boladı.
20 Jaratqan İyeden ju'z burıp, jawızlıq islegenin'iz ushın, qol urg'an ha'r bir isin'izde Ol sizlerdi na'letke ha'm ba'le-qadag'a duwshar qıladı. İsin'iz on'ınan kelmeydi. Aqırında, tez arada u'stin'izge apat jawıp, pu'tkilley joq bolasız.
21 Sizler mu'lik etiw ushın baratırg'an elin'izge Jaratqan İye illet jiberip, sizlerdi joq qıladı.
22 Ol sizlerdi o'kpe keselligine, ısıtpa ha'm qaltıratpag'a duwshar qıladı. Sonın' menen birge, jazdın' saratan ıssısın ha'm qurg'aqshılıq jiberip, eginlerin'izdi quwratıp taslaydı ha'm kesellendiredi. Sizler o'lip ketkenin'izshe, usı apatlar izin'izden qalmaydı.
23 To'ben'izdegi aspan qola sıyaqlı, ayag'ın'ızdın' astındag'ı jer temir sıyaqlı bolıp qaladı.
24 Sizler joq bolıp ketpegenin'izshe, Jaratqan İye aspannan jawınnın' ornına elin'izge shan'-tozan' jawdıradı.
25 Jaratqan İye sizlerdi dushpanların'ızg'a ta'slim etedi. Sizler olarg'a bir ta'repten hu'jim etsen'iz, olardan tumlı-tusqa qashıp ketesiz. Jer ju'zindegi barlıq patshalıqlar sizlerdin' ayanıshlı awhalın'ızdı ko'rip, hu'reyleri ushıp ketedi.
26 O'liklerin'iz barlıq quslarg'a ha'm jabayı haywanlarg'a jem boladı, olardı quwıp jiberetug'ın hesh kim bolmaydı.
27 Jaratqan İye mısırlılarg'a jibergen dawası joq shıyqanlar, qotır jaralar ha'm qıshımalarg'a sizlerdi duwshar etedi.
28 Sonın' menen birge, Ol sizlerdi jinlilik, soqırlıq, esten ayırılıw ba'leleri menen jazalaydı.
29 Soqır adam tu'nde sıypalanıp ju'rgenindey, sizler ku'ndizgi waqıt sıypalanıp ju'resiz. İslegen ha'r bir isin'izde tabıssız bolasız, u'zliksiz ezilip, tonalasız ha'm sizlerdi qutqaratug'ın hesh kim bolmaydı.
30 Bir qız benen nekeden o'tesiz, biraq onı basqa birew zorlaydı. U'y salasız, biraq onın' ishine kirip, jasay almaysız. Ju'zim bag'ın otırg'ızasız, biraq ju'ziminen jey almaysız.
31 Malın'ız ko'z aldın'ızda soyıladı, biraq go'shinen jey almaysız. Eshegin'izdi sizlerden zorlap tartıp aladı ha'm qaytarıp bermeydi. Qoy-eshkilerin'iz dushpanların'ızg'a beriledi. Sizlerdi qutqaratug'ın hesh kim bolmaydı.
32 Ul-qızların'ız ko'z aldın'ızda basqa xalıqlarg'a qul etip beriledi. Qolın'ızdan hesh na'rse kelmegenlikten, ha'r ku'ni olardın' qaytıp keliwin ku'tip, jolına ko'z tigip, ko'zlerin'iz taladı.
33 Sizler tanımaytug'ın bir xalıq kelip, jerin'izdin' zu'ra'a'tin ha'm barlıq miynetin'izdin' miywesin jeydi. O'mirin'iz boyı ja'birlenip, ezilesiz.
34 Usılardı ko'zlerin'iz benen ko'rip, aqıl-esin'izden ayırılasız.
35 Jaratqan İye sizlerdi basın'ızdan ayag'ın'ızdın' ushına deyin dawası joq jara ha'm shıyqanlar menen qaplaydı.
36 Jaratqan İye sizlerdi ha'm o'zlerin'izge tayınlag'an patshan'ızdı o'zlerin'iz de, ata-babaların'ız da tanımaytug'ın bir xalıqqa su'rginge aydatıp jiberedi. Ol jerde ag'ashtan ha'm tastan islengen basqa qudaylarg'a tabınıp, xızmet etesiz.
37 Jaratqan İye sizlerdi sol basqa xalıqlarg'a alıp barg'anda, olar basın'ızg'a tu'sken apattı ko'rip, hu'reyleri ushıp ketedi. Olar sizlerdi a'psana qılıp, masqaralap ju'redi.
38 Atızların'ızg'a ko'p tuqım egesiz, biraq az zu'ra'a't alasız. Sebebi zu'ra'a'tin'izdi shegirtke jep ketedi.
39 Ju'zim bag'ın otırg'ızıp, ta'rbiyalaysız, biraq onın' sharabın ishpeysiz, ju'zimin termeysiz. O'ytkeni olardı qurt jep ketedi.
40 Elin'izdin' ha'mme jerinde za'ytu'n bag'ı bolsa da, onın' mayın u'stin'izge jag'a almaysız. Sebebi za'ytu'n ag'ashlarının' miyweleri to'gilip qaladı.
41 Sizler ul-qızlı bolasız, biraq o'zlerin'izge buyırmaydı, olardı su'rgin qılıp alıp ketedi.
42 Barlıq miywe ag'ashların'ızdın' miywelerin ha'm jerin'izdin' zu'ra'a'tin shegirtkeler jep ketedi.
43 Sizlerdin' aran'ızda jasap atırg'an kelgindilerdin' jag'dayı joqarılap ku'sheyedi, al sizler bolsa, to'menleysiz.
44 Olar sizlerge qarız beretug'ın boladı, al sizler bolsa, olarg'a qarız bere almaysız. Olar bas, al sizler quyrıq bolasız.
45 Sizler Qudayın'ız Jaratqan İyege qulaq salmay, Onın' bergen buyrıqlarına ha'm qag'ıydalarına a'mel qılmasan'ız, usı na'letler basın'ızg'a jawıp, sizlerdi joq qılmag'ansha, izin'izden qalmay, jetip aladı.
46 Bul na'letler sizler ha'm urpag'ın'ız ushın, Quday bergen jazanın' ma'n'gi belgisi bolıp qaladı.
47 Sebebi ha'mme na'rse molshılıq waqıtta, sizler Qudayın'ız Jaratqan İyege shadlı ha'm quwanıshlı tu'rde xızmet etpedin'iz
48 Sonın' ushın, Jaratqan İye sizlerge jibergen dushpanlarg'a qullıq etesiz, ash, suwsız ha'm jalan'ash qalıp, ha'mme na'rsege mu'ta'j bolasız. Jaratqan İye sizlerdi joq etpegenshe, moynın'ızg'a temir moyıntırıq salıp qoyadı.
49 Jaratqan İye sizlerge qarsı uzaqtan, du'nyanın' basqa shetinen bir xalıqtı to'menge taslanıp atırg'an bu'rkittey etip jiberedi. Sizler olardın' tilin tu'sinbeysiz.
50 Bul xalıq qorqınıshlı bolıp, jası u'lkenlerge rehim, jası kishilerge miyrim-sha'pa'a't ko'rsetpeydi.
51 Olar sizlerdi joq qılmag'ansha, malların'ızdın' to'llerin ha'm jerin'izdin' zu'ra'a'tin jeydi. Sizlerge da'n de, sharap ta, za'ytu'n mayın da, sıyırların'ızdın' buzawların da, qoyların'ızdın' qozıların da qaldırmaydı. Sonda sizler joq bolıp ketesiz.
52 Olar Qudayın'ız Jaratqan İye sizlerge berip atırg'an eldegi barlıq qalalardı qamal qıladı. Sizler isengen biyik ha'm bekkem diywallar jer menen jeksen boladı.
53 Dushpanın'ız qamal qılıp, qısqıg'a alg'anda, sizler o'z perzentlerin'izdi, Qudayın'ız Jaratqan İye o'zlerin'izge bergen ulqızların'ızdı jeysiz.
54 Aran'ızdag'ı en' mu'la'yim, en' na'zik adam da tuwısqanına, hayalına ha'm aman qalg'an balalarına janı ashımay,
55 o'zi jep otırg'an balasının' go'shin qızg'anıp, olardın' hesh biri menen bo'lispeydi. O'ytkeni sizlerdi dushpanın'ız qamal qılıp, qısqıg'a alg'anı sebepli qalaların'ızda hesh qanday awqat qalmaydı.
56 Aran'ızdag'ı en' mu'la'yim, en' na'zik hayal, mu'la'yimligi ha'm na'zikliginen ayag'ın jerge basıwdı qa'lemeytug'ın hayal su'yikli ku'yewine, o'z ul-qızına janı ashımay,
57 ash bolg'anlıqtan, tuwg'an balasın ha'm balasının' joldasın jasırınsha jep, olar menen bo'lispeydi. Sebebi dushpanın'ız sizlerdi qamal qılıp, qısqıg'a alg'anlıqtan, usınday qıyın awhalda qalıp qoyasız.
58 Usı kitapta jazılg'an nızamnın' barlıq so'zlerin muqıyatlı tu'rde orınlamay, Qudayın'ız Jaratqan İyenin' ullı ha'm aybatlı atınan qorqpasan'ız,
59 Ol sizlerdi ha'm urpag'ın'ızdı qorqınıshlı, ullı ha'm u'zliksiz apatlarg'a, ja'ne de, awır ha'm dawasız keselliklerge duwshar qıladı.
60 Sizlerdi qorqınıshqa salg'an Mısırdag'ı barlıq keselliklerdi sizlerge ja'ne jiberedi ha'm olardan hesh qashan shıpa taba almaysız.
61 Sizler joq bolıp ketpegenin'izshe, Jaratqan İye usı Nızam kitabında jazılmag'an ha'r tu'rli awırıwlar menen apatlardı basın'ızg'a do'ndiredi.
62 Sizler aspandag'ı juldızlar sıyaqlı ko'p edin'iz, biraq Qudayın'ız Jaratqan İyege qulaq salmag'anın'ız ushın, sanın'ız azayıp qaladı.
63 Jaratqan İye sizlerge jaqsılıq qılıp, ko'beytkeninen qanshelli su'ysingen bolsa, sizlerdi qulatıp, joq etkende de, sonshelli su'ysinedi. Mu'lik etip alıw ushın baratırg'an elden sizlerdi suwırıp, ılaqtırıp jiberedi.
64 Jaratqan İye sizlerdi du'nyanın' arg'ı shetinen bergi shetine deyin, barlıq xalıqlardın' arasına tarqatıp jiberedi. Ol jerde o'zlerin'iz de, atababaların'ız da tanımag'an ag'ashtan ha'm tastan islengen basqa qudaylarg'a tabınasız.
65 Biraq sol xalıqlardın' arasında tınıshlıg'ın'ız da, dem alatug'ın bir jerin'iz de bolmaydı. Ol jerde Jaratqan İye sizlerge titiregen ju'rekler, u'mitsizlik ha'm u'mitsiz ko'zler beredi.
66 O'mirin'iz qıl u'stinde turg'anday bolıp, ku'ni-tu'ni o'limnen qorqıp jasaysız.
67 Tu'nde ju'regin'izdi biylep alg'an qorqınısh sebepli „Qa'nekey, azan bolg'anda ma edi!“ deysiz, al azanda o'z ko'zin'iz benen ko'retug'ın waqıyalar sebepli „Qa'nekey, kesh bolg'anda ma edi!“ deysiz.
68 Jaratqan İye sizlerge Mısırg'a qaytıp barmaysız, dep aytqan bolsa da, Ol sizlerdi kemeler menen Mısırg'a qaytadan jiberedi. Ol jerde sizler o'zlerin'izdi dushpanların'ızg'a qul ha'm shorı qılıp satıwg'a ha'reket etesiz, biraq sizlerdi satıp alatug'ın qarıydar bolmaydı».
