Nızamnın' qaytalanıwı 26 bob
1 «Qudayın'ız Jaratqan İye sizlerge mu'lik etip berip atırg'an elge kirip, ol jerdi iyelep, jaylasıp alg'anın'ızda,
2 sol eldin' jerlerinen jıynap alatug'ın barlıq zu'ra'a'tlerin'izdin' birinshi o'nimlerinen alıp, sebetke salın'lar. Keyin olardı Qudayın'ız Jaratqan İyenin' O'z atın ornalastırıw ushın tan'laytug'ın jerine alıp barın'lar.
3 Sol waqıtta xızmet etip atırg'an ruwxaniydin' aldına barıp, og'an bılay dep aytın'lar: „Jaratqan İyenin' bizlerge beremen dep, ata-babalarımızg'a ant ishken eline keldim. Bu'gin men usını Qudayın' Jaratqan İyenin' aldında moyınlayman“.
4 Ruwxaniy qolın'ızdan sebetti alıp, Qudayın'ız Jaratqan İyenin' qurbanlıq ornının' aldına qoysın.
5 Sonnan keyin, sizler Qudayın'ız Jaratqan İyenin' aldında bılay dep aytın'lar: „Ata-babam ko'shpeli aramlı edi. Ol azg'antay adamı menen Mısırg'a barıp, sol jerde kelgindi bolıp jasay basladı. Biraq ol ullı, ku'shli ha'm sansız xalıqqa aylandı.
6 Mısırlılar bizlerge jaman qatnasta bolıp, zulımlıq etti ha'm awır jumıs islewge ma'jbu'rledi.
7 Sonda bizler ata-babalarımızdın' Qudayı Jaratqan İyege jalbarınıp, dad saldıq. Jaratqan İye dadımızdı esitti ha'm bizlerdin' azap shegip atırg'anımızdı, islep atırg'an awır miynetimizdi, mısırlılardın' bizlerge islep atırg'an eziwshiligin ko'rdi.
8 Sonnan keyin, Ol qu'direti ha'm sozılg'an ku'shli qolı, ullı ha'm qorqınıshlı isleri ha'm ka'ramatlı belgileri menen bizlerdi Mısırdan alıp shıqtı.
9 Ol bizlerdi usı jerge alıp keldi, su't ha'm pal ag'ıp turg'an usı eldi bizlerge berdi.
10 Endi, Jaratqan İye, bizlerge bergen jerin'nin' birinshi zu'ra'a'tin Sag'an alıp keldik“. Keyin sebetti Qudayın'ız Jaratqan İyenin' aldına qoyıp, Og'an sıyının'lar.
11 Qudayın'ız Jaratqan İyenin' sizlerge ha'm shan'araqların'ızg'a bergen barlıq iygilikli zatları ushın quwanıp, shadlanın'lar. Lebiyliler ha'm aran'ızda jasap atırg'an kelgindiler de sizler menen birge bayramlasın.
12 Sizler u'shinshi jılı, u'sir beretug'ın jılı, barlıq zu'ra'a'tin'izden onnan bir bo'legin ayırıp qoyın'lar. Sol onnan birin'izdi lebiylilerge, kelgindilerge, jetim-jesirlerge berin'ler. Solay etip, olar da qalaların'ızda iship-jep toysın.
13 Sonnan keyin, Qudayın'ız Jaratqan İyege bılay dep aytın'lar: „U'yimnen muxaddes u'sirlerdi tolıg'ı menen shıg'arıp, O'zin' buyırg'anın'day, bulardı lebiylilerge, kelgindilerge ha'm jetim-jesirlerge berdim. Senin' hesh bir buyrıqların'dı buzbadım, olardın' hesh birin de umıtpadım.
14 Aza tutqan waqtımda, muxaddes u'sirden jemedim, haram bolg'an waqtımda da, olarg'a tiymedim ha'm o'lilerdin' a'rwaqlarına usınbadım. Qudayım Jaratqan İye, Senin' so'zin'e qulaq saldım ha'm mag'an buyırg'anların'nın' ha'mmesin orınladım.
15 Endi aspandag'ı muxaddes ma'kanın'nan bizlerge na'zerin'di tu'sir! Ata-babalarımızg'a ishken antın' boyınsha bizlerge bergen su't ha'm pal ag'ıp turg'an elge ha'm İzrail xalqın'a bereket ber“».
16 «Bu'gin Qudayın'ız Jaratqan İye usı qag'ıydalarg'a ha'm nızamlarg'a a'mel qılıwın'ızdı buyırıp atır. Bulardı shın ju'regin'iz ha'm jan-ta'nin'iz benen muqıyatlı tu'rde orınlan'lar.
17 Bu'gin sizler: „Jaratqan İye bizlerdin' Qudayımız, Onın' jollarınan ju'remiz, Onın' qag'ıydalarına, buyrıqlarına ha'm nızamlarına a'mel qılamız, Og'an boysınamız“, – dep ashıq ta'n aldın'ız.
18 aratqan İye bergen wa'desi boyınsha, bu'gin sizlerdi O'z g'a'ziynesi sıpatında ja'riyalaydı. Onın' barlıq buyrıqlarına a'mel qılın'lar.
19 Ol sizlerdi O'zi jaratqan barlıq xalıqlardan joqarı qıladı. Sizler alg'ıs-maqtawg'a ha'm hu'rmetke erisesiz. Onın' bergen wa'desi boyınsha, sizler Qudayın'ız Jaratqan İyenin' muxaddes xalqı bolasız».
