Nızamnın' qaytalanıwı 25 bob
1 «Eki adamnın' arasında ja'njel shıqsa, olar qazılardın' aldına barsın. Qazılar sol eki adamnın' arasındag'ı dawdı qarap shıqsın ha'm ayıpsızdı aqlap, al ayıplı adamdı jazag'a tartsın.
2 Eger de ayıplı adam sabawg'a ılayıqlı bolsa, qazı onı jerge jatqarsın ha'm o'zinin' ko'z aldında ayıbına jarasa sabatsın.
3 yıplı adam qırıqtan artıq sabalmasın. Eger qırıqtan asıp ketse, onda tuwısqanın'ız sizlerdin' ko'z aldın'ızda xorlanıp qaladı.
4 Tu'yek aydap atırg'an o'gizdin' awzın buwıp taslaman'lar.
5 Eger birge jasap atırg'an ag'alı-inililerdin' biri perzentsiz qaytıs bolsa, marhumnın' hayalı jat adamg'a turmısqa shıqpasın. Marhumnın' tuwısqanı jesir qalg'an hayalg'a u'ylensin ha'm o'zinin' qa'yinlik yamasa qaynag'alıq wazıypasın orınlasın.
6 Sol hayal tuwg'an tun'g'ısh ul marhumnın' atın dawam etsin. Solay etip, marhumnın' atı İzrail xalqınan o'ship ketpeydi.
7 Biraq sol adam marhum ag'asının' yamasa inisinin' jesir qalg'an hayalına u'yleniwden bas tartsa, jesir hayal qala da'rwazasına barıp, aqsaqallarg'a bılay dep aytsın: „Marhum ku'yewimnin' tuwısqanı onın' atın İzrail xalqının' arasında dawam ettiriwdi qa'lemey, o'z wazıypasın orınlawdan bas tartıp atır“.
8 Sonda qalanın' aqsaqalları sol adamdı shaqırıp alıp, onın' menen so'ylessin. Eger ol adam: „Og'an u'yleniwdi qa'lemeymen“, – dep turıp alsa,
9 jesir hayal marhum ku'yewinin' tuwısqanının' qasına kelsin. Hayal qala aqsaqallarının' ko'z aldında onın' bir ayaq kiyimin sheship alıp, ju'zine tu'kirip: „Tuwısqanının' a'wladın tiklewdi qa'lemegen adamg'a usınday islenedi“, – dep aytsın.
10 Usıdan keyin, sol adamnın' a'wladı İzrailda „Ayaq kiyimi sheshilgen“, dep atalatug'ın boladı».
11 «Eki adam bir-biri menen to'belesip atırg'anda, birewinin' hayalı kelip, urıp atırg'an adamnan ku'yewin ayırıp alıw ushın, sol adamnın' jınısıy ag'zasınan uslasa,
12 onda hayaldın' qolın shawıp taslan'lar. Onı ayap otırman'lar.
13 Dorban'ızda birewi awır, ekinshisi jen'il eki tu'rli ta'rezi taslar bolmasın.
14 U'yin'izde birewi u'lken, ekinshisi kishkene sıyımlılıq o'lsheytug'ın ıdıslar bolmasın.
15 Ta'rezi tasların'ız da, sıyımlılıq o'lsheytug'ın ıdısların'ız da hadal ha'm durıs bolsın. Sonda Qudayın'ız Jaratqan İyenin' sizlerge berip atırg'an jerinde o'mirin'iz uzaq boladı.
16 Qudayın'ız Jaratqan İye sonday nahaqlıq qılatug'ınlardan jerkenedi.
17 Sizler Mısırdan shıqqannan keyin amalek xalqının' sizlerge ne islegenin umıtpan'lar.
18 Sizler joldan sharshap, ha'lsizlenip qalg'anın'ızda, olar Qudaydan qorqpay sizlerge hu'jim qılıp, artın'ızda qalg'an barlıq ha'lsiregenlerdi o'ltirgen edi.
19 Qudayın'ız Jaratqan İye sizlerge mu'lik etip berip atırg'an elde a'tirapın'ızdag'ı barlıq dushpanların'ızdı jen'ip, tınıshlıqqa eriskenin'izde, amalek xalqın joq qılıp, olardın' atın jer ju'zinen o'shirip taslan'lar. Bunı umıtpan'lar!».
