Nızamnın' qaytalanıwı 23 bob

Jaratqan İyenin' ja'miyetinin' arasına kirmeytug'ınlar(1-8),Ordanı pa'k tutıw(9-14),Ha'r tu'rli qag'ıydalar(15-25).

¹ «Tuqım bezi ezilgen yamasa jınısıy ag'zası kesilgen adam Jaratqan İyenin' ja'miyetine kirmeydi.

² Nekesiz tuwılg'an bala Jaratqan İyenin' ja'miyetine kirmeydi, ha'tteki, onın' keyingi onınshı a'wladına deyin Jaratqan İyenin' ja'miyetine kire almaydı.

³ Ammon yamasa moab xalqınan bolg'an adam Jaratqan İyenin' ja'miyetine kirmeydi. Ha'tteki, olardın' onınshı a'wladına deyin Jaratqan İyenin' ja'miyetine hasla kire almaydı.

⁴ O'ytkeni Mısırdan shıg'ıp kiyatırg'anın'ızda, olar jolda sizlerdi nan ha'm suw menen ku'tip almadı. Ja'ne de, Aram-Naharayımdag'ı Petor qalasınan bolg'an Beor ulı Bilamdı sizlerdi na'letlew ushın jallag'an edi.

⁵ Degen menen, Qudayın'ız Jaratqan İye Bilamg'a qulaq salıwdı qa'lemedi. Qudayın'ız Jaratqan İye sizlerdi su'ygeni ushın, na'letti jarılqawg'a aylandırdı.

⁶ O'mirin'iz dawamında olardın' tınıshlıg'ı ha'm iygiligi ushın ha'reket etpen'ler.

⁷ Edomlılardan bolsa, jerkenben'ler, olar sizlerdin' tuwısqanın'ızdur. Mısırlılardan da jerkenben'ler. O'ytkeni olardın' jerinde sizler kelgindi bolıp jasag'an edin'ler.

⁸ Olardan tuwılg'an u'shinshi a'wlad Jaratqan İyenin' ja'miyetine kire aladı».

⁹ «Dushpanların'ız benen urısıw ushın orda qurg'anın'ızda, ha'r qanday haramılıqtan saq bolın'lar.

¹⁰ Eger aran'ızda bir adamnın' tu'nde urıg'ı ag'ıp, haram bolsa, ol ordadan shıg'ıp ketsin ha'm sol jerde qalsın.

¹¹ Ol keshke qaray juwınıp alsın, ku'n batqannan keyin ordag'a qaytıwına boladı.

¹² Ordanın' sırtında da'retke shıg'atug'ın jerin'iz bolsın.

¹³ Quraljarag'ın'ızdın' arasında jer qazıw ushın bir belshe bolsın. Da'retke shıg'arda, shuqır qazıp, keyin onı ko'mip taslan'.

¹⁴ Ordan'ızdı pa'k saqlan'lar, sebebi Qudayın'ız Jaratqan İye sizlerdi qutqarıp, dushpanların'ızdı sizlerge ta'slim qılıw ushın, ordada sizler menen birge ju'redi. Eger de Jaratqan İye aran'ızda qanday da a'depsiz islerdi ko'rse, Ol sizlerden ju'z buradı».

¹⁵ «Xojayınınan qashıp, İzraildan pana izlep kelgen quldı xojayınına qaytarıp berip jibermen'ler.

¹⁶ Ol sizlerdin' aran'ızda, o'zi unatqan jerde, qa'legen qalalardın' birinde jasasın. Og'an jawızlıq qılman'lar.

¹⁷ Butxanalarda buzıqlıq penen shug'ıllanatug'ın izraillı hesh qanday hayal yamasa erkek bolmasın.

¹⁸ Qudayın'ız Jaratqan İye buzıqlıq penen shug'ıllanatug'ın hayal ha'm erkeklerden jerkenedi. Olardın' is haqısın Qudayın'ız Jaratqan İyenin' İbadatxanasına wa'de boyınsha beriletug'ın sıy etip alıp kelmen'ler.

¹⁹ İzraillı tuwısqanın'ızg'a puldı, nandı yamasa basqa da zatların'ızdı qarızg'a bergenin'izde, onnan u'steme talap qılman'lar.

²⁰ Basqa jat jerli adamnan u'steme alıwın'ızg'a boladı, biraq izraillı tuwısqanın'ızdan alman'lar. Sonda sizler mu'lik etip alıw ushın baratırg'an elde, Qudayın'ız Jaratqan İye sizlerdin' qol urg'an ha'r bir isin'izge bereket beredi.

²¹ Qudayın'ız Jaratqan İyege qanday da bir wa'de bersen'iz, onı keshiktirmey orınlan'lar. Qudayın'ız Jaratqan İye sizlerden wa'den'izdi orınlawın'ızdı talap qıladı. Eger wa'den'izdi orınlamasan'ız, o'zlerin'izge gu'na arttırıp alasız.

²² Eger wa'de bermegen bolsan'ız, gu'nalı bolmaysız.

²³ Al awzın'ızdan shıqqan wa'den'izdi so'zsiz orınlan'lar. O'ytkeni Qudayın'ız Jaratqan İyege o'z qa'lewin'iz benen wa'de berdin'iz.

²⁴ Tuwısqanın'ızdın' ju'zimzarlıg'ına kirgenin'izde, ju'zimnen toyg'anın'ızsha jewin'izge boladı, biraq onnan ıdısın'ızg'a terip alman'lar.

²⁵ Tuwısqanın'ızdın' egisligine kirgenin'izde, qolın'ız benen masag'ın u'zip alıwın'ızg'a boladı, biraq onın' eginlerin orıp alman'lar».