Nızamnın' qaytalanıwı 22 bob
1 «Eger de bir izraillı tuwısqanın'ızdın' adasqan sıyırın yamasa qoyın ko'rsen'iz, o'zin'izdi ko'rmegenge salman'lar. Onı o'z iyesine aparıp berin'ler.
2 Eger de maldın' iyesi sennen uzaqta bolsa yamasa kimnin' malı ekenin bilmesen', onı o'zin'nin' u'yin'e alıp bar. Maldın' iyesi malın izlep kelgen waqıtta, og'an qaytarıp beresen'.
3 Tuwısqanın'nın' eshegin, kiyimin yamasa basqa da joytqan na'rselerin tawıp alg'anın'ızda da anıq solay islen'ler. O'zin'izdi ko'rmegenge salman'lar.
4 Ja'ne de, izraillı bir tuwısqanın'ızdın' eshegi yamasa sıyırı jolda qulap jatırg'anın ko'rip qalsan'ız, onı ko'rmegenge salman'lar. Olardı ayaqqa turg'ızıw ushın tuwısqanın'ızg'a ja'rdem berin'ler
5 Hayallar erkektin' kiyimin, erkekler hayal adamnın' kiyimin kiymesin. Qudayın'ız Jaratqan İye bunday qılg'anlardan jerkenedi.
6 Jol-jo'nekey terekte yamasa jerde bir qustın' uyasına dus kelip qalsan'ız, qus ma'yek basıp atırg'an yamasa palapanları menen otırg'an bolsa, qustı palapanları menen birge qosıp alman'lar.
7 O'zin'izge tek g'ana palapanların alıwın'ızg'a boladı, biraq anasın bosatıp jiberin'ler. Sonda sizler abadan turmısqa erisip, o'mirin'iz uzaq boladı.
8 Taza u'y salg'anın'ızda, to'besin jiyeklep, qorshaw islep shıg'ın'lar. Sonda u'yin'izdin' to'besinen birew jerge qulap, o'lip qalsa, shan'arag'ın'ız bug'an juwapker bolmaydı.
9 Ju'zimzarın'ızg'a ju'zimnen basqa egin ekpen'ler. Bolmasa, ekken tuqımın'ız da, ju'zimzarın'ız da haram bolıp, o'zlerin'iz qollana almaysız.
10 Jerdi su'riw ushın eshek penen o'gizdi bir gu'ndege qospan'.
11 Ju'n ha'm zıg'ırdan aralastırılıp toqılg'an kiyim kiymen'.
12 Kiyimin'izdin' eteklerinin' to'rt mu'yeshine shashaq isletip, tiktirip qoyın'lar».
13 «Eger birew u'ylenip, qız benen jatqannan keyin, onı unatpay qalsa
14 ha'm onı ayıplap: „Bul qızg'a u'ylendim, biraq onın' menen jatqanımda, ol qız bolmay shıqtı“, – dep jaman atlı qılsa,
15 qızdın' ata-anası qızının' pa'kligin da'lilleytug'ın to'sektegi qızlıq belgini alıp, aqsaqallarg'a ko'rsetiw ushın qala da'rwazasına alıp barsın.
16 Qızdın' a'kesi aqsaqallarg'a bılay desin: „Qızımdı mına jigitke uzatqan edim. Al keyin ol qızımdı unatpay qalıptı.
17 Endi bolsa, qızın'ız qız bolıp shıqpadı, dep jalg'an ayıplap atır. Biraq mınaw qızımnın' pa'kligin da'lilleytug'ın qızlıq belgisi!“ Keyin qızdın' ata-anası qızının' qızlıq belgisi bar to'sekti aqsaqallardın' ko'z aldında jayıp, ko'rsetsin.
18 Qala aqsaqalları u'ylengen jigitti a'keldirip, sabalap jazalasın.
19 a'ne de, aqsaqallar sol jigitke ayıbı ushın ju'z shekel gu'mis to'letsin. Jigit izraillı pa'k bir qızdı jaman atlı qılg'anı ushın, gu'misti qızdın' a'kesine bersin. Qız sol jigittin' hayalı bolıp qalsın ha'm jigit o'miri dawamında qız benen ajırasıw huqıqına iye emes.
20 Al eger de sol adamnın' aytqanları durıs bolıp, qızdın' pa'kliginin' da'lili bolmasa,
21 qızdı a'kesinin' u'yinin' esigine alıp barsın. Qala xalqı sol qızdı tas boran qılıp o'ltirsin. O'ytkeni ol a'kesinin' u'yinde jasag'an waqtında buzıqlıq qılıp, İzrailda jerkenishli is qıldı. Solay etip, aran'ızdag'ı jawızlıqtı joq qılın'lar.
22 Eger de bir adam basqa birewdin' hayalı menen jatqan jerinen uslansa, onda erkek te, hayal da o'ltirilsin. Usılay etip, İzraildan jawızlıqtı joq qılın'lar.
23 Eger bir adam qalada basqa birew menen atastırılıp qoyılg'an bir qızdı ushıratıp qalıp, onın' menen jatsa,
24 ekewi de qala da'rwazasının' qasına alıp barılsın ha'm tas boran qılıp o'ltirilsin. Sebebi qız qalanın' ishinde bolsa da ja'rdem sorap, dawıslap baqırmadı, al erkek bolsa, basqa birewdin' bolajaq hayalının' abırayın to'kti. Solay etip, aran'ızdag'ı jawızlıqtı joq qılın'lar.
25 Eger de bir adam atastırılıp qoyılg'an bir qızdı dalada ushıratıp qalıp, onı uslap alıp zorlasa, onda tek sol zorlag'an adam g'ana o'ltirilsin.
26 Qızg'a hesh na'rse qılman'lar. O'ytkeni qızdın' o'limge ılayıq hesh qanday ayıbı joq. Bul biyma'lel birewge hu'jim qılıp, onı o'ltirgen adamnın' isine uqsaydı.
27 Sebebi ol adam atastırılg'an qızdı ashıq dalada uslap alg'an, al qız bolsa, ja'rdem sorap, baqırg'an. Degen menen, qutqaratug'ın hesh kim bolmag'an.
28 Eger de bir adam atastırılmag'an bir pa'k qızdı ushıratıp, onı uslap alsa ha'm onın' menen jatqan jerinen uslansa,
29 qız benen jatqan adam qızdın' a'kesine eliw shekel gu'mis bersin. Ol qızdı zorlag'anı ushın, og'an u'ylensin ha'm o'miri dawamında qız benen ajırasıw huqıqına iye emes.
30 Hesh kim a'kesinin' hayalına u'ylenbesin, usılay islep, a'kesin shermende qılmasın».
